2 Bakolinto 7 - Ilagano Ipya Lya

¹ Kulwa iyo, iki tuli na kwisagijiwa kwenuku, batogwa, twiyejage benekele mu mabusoso gose ga mili na ga moyo, tubyubushikanya wela tungʼogohile Mulungu.

Butogwa wa ngʼwa Paulo ku Bakorintho

² Mutugalihigije mu ngholo jingʼwe: biswe tutangʼwitilile munhu kibi, tutankenagulile munhu, tutangʼwibonelile munhu.

³ Natuhayaga mhayo uyu kumulekanya giki, muli ba bubi: iki namala kuhaya kale giki, bingʼwe muli mu ngholo jiswe, nulu tuche hamo, nulu tubize bapanga hamo.

⁴ Bugimu wa kuhaya wane buli butale ku bingʼwe, kwikumilija kwane kuli kutale kulwa nguno yingʼwe: nizulile na kulungujiwa, nasesekela na buyegi mu kuluhiwa kwiswe kose.

⁵ Iki nulu aho twali tushika Makedonia nahene mibili yiswe yali iti na kwifula, aliyo twali tuluhiwa mapande gose; hanze lyali lili ho ilwa, mugati wali buli mo boba.

⁶ Aliyo nahene, Mulungu Uyo akubalungujaga abadohelejiwa, wali utulunguja kulwa kwiza kwa ngʼwa Tito;

⁷ Nulu iti kulwa kwiza kwakwe gwike, aliyo hangi kulwa kulunguja uko wali ulungujiwa nako mu bingʼwe, aho utusombolela nghumbu jingʼwe, na kapinihalile kingʼwe, na bujangizu wingʼwe kulwane; nose nali nuyega kutinda. Bakorintho bupinihala no kulwa shibi sha mu kanisa yabo

⁸ Iki nulu nali numupinihaja na nyaluba yane, nahene natideta giki, nahuba: nulu nali nideta; iki nabona giki, nyaluba yeniyo yali yumupinihaja, aliyo nahene yali ili ikanza duhu.

⁹ Ali haha nayega, iti kulwa nguno mukapinihajiwa bingʼwe, aliyo kulwa nguno iyi, ngʼwali ngʼupinihajiwa kushisha ngʼoya; iki ngʼwali ngʼupinihajiwa gitumo igelile kuli Mulungu, ngʼwali mutugehelwa mu mhayo gose kulwa nguno yiswe.

¹⁰ Iki kupinihala ukwigelile kuli Mulungu kukwitaga koya kushisha mu bupiji, u koya kwenuku kuti na nimo kwideta: aliyo kupinihala kwa si kukwitaga kucha.

¹¹ Iki lolagi mhayo gwenuyu, ambu ngʼwali ngʼupinihala gitumo igelile kuli Mulungu, kupinihala kwenuko kwali kwita bukomezu kinahe mu bingʼwe, ali chene, kwali kwita kwilwilila kinahe mu bingʼwe, ali chene, na kupelana kinahe, ali chene, na kogoha kinahe, ali chene, na nghumbu kinahe, ali chene, na bujangizu kinahe, ali chene, na kuwima njigu kinahe! Mu mihayo yose ngʼwali ngʼwiyolecha muti na buka mu mhayo uyu.

¹² Kulwa iyo, nulu nali nungʼwandikila, nahene nali natandikile kulwa nguno ya ngʼwenuyo wali usobya, nulu kulwa nguno ya ngʼwenuyo wali usobiwa, aliyo giki, bukalalwa wingʼwe kulwiswe bumanike hape ku bingʼwe mu miso ga Mulungu.

¹³ Kulwa iyo twaalungujiwa: na mu kulungujiwa kwiswe twaayega kutinda no kulwa buyegi wa ngʼwa Tito, iki moyo gwakwe gwali gwifujiwa na bingʼwe bose.

¹⁴ Iki nulu nali numukumiligija kuli wei, nahene natagokile; aliyo gitumo twali tumuwilila mihayo yose mu nghana, giko nu kwikumilija kwiswe uko nali nuhaya ku butongi wa ngʼwa Tito, kwali kwa nghana.

¹⁵ Na butogwa wakwe ku bingʼwe wabizaga wingi no kutinda, aho akwizukagwa wigwi wa bingʼwe bose, gitumo ngʼwali mungʼwegeleja na kogoha na kuzuguma.

¹⁶ Nayega iki nadula kumusanya mu mihayo yose.