2 Bakolinto 6 - Ilagano Ipya Lya

¹ Huna lulu biswe, aba tukutumamaga kihamo nanghwe, twangʼwikumbilija mutizanukula kigongo cha Mulungu dalali,

² (Iki Wei wahaya giki, Nali nukwigwa ngʼwikanza ilizuniligije, na mu lushiku lwa bupiji nali nukugunana: lolaga, haha hi lyene ikanza ilizuniligije; lolaga, haha hu lwene lushiku lwa bupiji.)

³ Biswe tutatuulaga ho mhayo gose gwa kwipamya, u kwinhilija kwiswe kutizuhayiwa kibi;

⁴ Aliyo mu mihayo yose tumanika tuti na buka aba tuli batumami ba Mulungu mu kwiyumilija kwingi, mu kuluhiwa, mu buluhi, mu bupina,

⁵ Mu kutulwa, mu kutungwa kwa mu jela, mu kuubukilwa na banhu, mu milimo ya bunoge, mu kwikala miso, mu kudila nzala;

⁶ Mu wibembu, mu bumani, mu kwiyumilija, mu shitile sha kigongo, mu Moyo Ngʼwela, mu butogwa ubuti na buhwahwa,

⁷ Mu mhayo gwa nghana, mu nguzu ja Mulungu; kulwa shilanga sha butungilija ku nkono gwa bulyo na gwa lumoso,

⁸ Kulwa kukujiwa na kudalahwa, kulwa kutulanyiwa na kukumilijiwa; giti tuli balembalembi, aliyo tuli ba nghana;

⁹ Giti tutamanikile, aliyo tumanikile; giti tukuchaga, lolaga, tuli bapanga; giti tuli batulwa, na kubulagwa yaya;

¹⁰ Giti abapinihalile, aliyo tukuyegaga gwa; giti bahabi, aliyo twabasabya bingi; giti aba tuti na kinhu, aliyo tuli nasho shose.

Kwikomanya ukulagililwe, ni nguno yaho

¹¹ Bingʼwe Bakorintho, milomo yiswe yasamiwa ku bingʼwe, ngholo jiswe jagalihiwa.

¹² Mutapinehile mu biswe, aliyo ngʼwapinehile mu ngholo jingʼwe benekele.

¹³ Ali lulu, shokejagi gitumo ngʼwali ngʼwinhiwa (nahaya giti ku bana bane) mugalihyiwe ningʼwe.

¹⁴ Mutizutunganigijiwa ngʼwikondejo limo kihamo na bati bazunya: iki butungilija buli na busangi ki na buti butungilija? nulu isana lili na busangi ki na giiti?

¹⁵ Hangi kuli ho kwigwindanya ki Kristo na Beliali? nulu nzunya ali na busangi ki na uyo ati nzunya?

¹⁶ Hangi hekalu ya Mulungu ili na ngʼwigwano ki na shikolile sha kulamiwa? iki biswe tuli hekalu ya Mulungu mpanga; gitumo Mulungu uhaya giki. Nakwikala mubo, hangi nakushiminzila mubo; Nene nakubiza Mulungu wabo, nabo bakubiza banhu bane.

¹⁷ Kulwa iyi, fumagi mubo, ngʼwikomanye, uhaya Seba, mutizukuumya kinhu kisoso; na Nene nakungʼwegeleja,

¹⁸ Nakubiza Singʼwe ku bingʼwe, ningʼwe mukubiza bana bane bagosha na bakima, uhaya Seba wa budula bose.