2 Bakolinto 5 - Ilagano Ipya Lya

Nghumbu ya kushika mu numba ya ngʼwigulu

¹ Iki tumanile giki, i numba ya si i ya ihema lyiswe, ulu yusambulwa, tuli na nzengo gwa kufumiila kuli Mulungu, i numba ya welelo itabejiwe na makono, iyili ngʼwigulu.

² Iki mu iyi tukuganghilaga, tuhahalilile kuzwalichiwa na nzengo gwiswe gwa kufuma ngʼwigulu:

³ Ulu ili chene tuzwikile, tutalilonga tuli duuhu.

⁴ Iki biswe aba tuli ngʼwihema ili, tukuganghilaga tudidohelilwe; iti giki, tutogilwe kukungulwa, aliyo tutogilwe kuzwalichiwa, giki, i sha kucha shimilwe na bupanga.

⁵ Aliyo Uyo wali utwita biswe kulwa nguno ya mhayo gwenuyu ngʼwene Mulungu, uwaatwinha ngumili ya Moyo Ngʼwela.

⁶ Kulwa iyo tuli batimbya ngholo shiku jose, tumanile giki, aho tutali tuzengile mu mili, tuti ho hamo na Seba.

⁷ (Iki tukushiminzaga kulwa kuzunya, iti kulwa kubona);

⁸ Nghana tuli batimbya ngholo, tulibona ili hambuhambu kwikala tuti mo mu mili, na kubiza ho hamo na Seba.

Kalumamilwe ka evangeli mu boba na mu butogwa

⁹ Kulwa iyo nulu tuli kunu nulu tuti ho kunu, tukuhahalilaga kunyeja Wei.

¹⁰ Iki shitwigelile biswe bose kolechiwa ku butongi wa isumbi lya ngʼwa Kristo lya kulekanya nsango; buli munhu anukule iyo yali yitwa mu mili, gitumo iyo wali wita, nulu ya wiza, nulu ya bubi.

¹¹ Kulwa iyo, iki tumanile lyogohya lya Seba, twabazunisha banhu; aliyo tolechiwa kuli Mulungu; na nene ndisanya giki, tolechiwa nu mu wiyanguji wingʼwe.

¹² Tutushokelaga kwikumilija hangi ku bingʼwe, aliyo ili giki, twangʼwinha nguno ya kwikumiligija kulwiswe, mubone mhayo gwa kubashokeja abo abikumiligija mu iyo yabonwa, iti ya mu ngholo.

¹³ Iki nulu twahugana, nahene ili kulwa nguno ya Mulungu: nulu tuli na masala madekanu, nahene ili kulwa nguno yingʼwe.

¹⁴ Iki butogwa wa ngʼwa Kristo bukutuhadikijaga; iki twapima giki, ulu umo ubachilila bose, nahene bose bali bucha;

¹⁵ Nanghwe ubachilila bose giki, abali bapanga batizikala bapanga hangi ku boi benekele, aliyo babize bapanga kuli Uyo wali ucha na ujuka kulwabo.

¹⁶ Hu yene lulu kufuma haha tutamanile munhu ose gitumo ali mu mili: nulu twali tumanile Kristo gitumo walali mu mili, aliyo kufuma haha tutamanile Wei giko hangi.

¹⁷ Kulwa iyo munhu ose ulu ali muli Kristo, ali kisengʼwa kipya: mihayo ya kale yaabita; lolaga yose yaabiza mipya.

¹⁸ Aliyo mihayo yose, fumiilo yayo kuli Mulungu, Uyo waatwisangija kuli Wei ngʼwenekele muli Kristo, nanghwe utwinha kubutumamila winhilija ubu wa busangija;

¹⁹ Wene giki, Mulungu ubiza muli Kristo, ubasangija ba mu si kuli Wei Ngʼwenekele, atubabalila bukenaguji wabo; nanghwe waatwinha biswe kugutumamila mhayo gwa busangija.

²⁰ Hu yene lulu, biswe tuli batumijiwa kulwa nguno ya ngʼwa Kristo, ili giti Mulungu akungʼwikumbilijaga mu milomo yiswe: twangʼwikumbilija ha ngʼwanya gwa ngʼwa Kristo giki, isangijagi na Mulungu.

²¹ Iki Wei akangʼwita Uyo wamtamanile shibi kubiza shibi kulwiswe; biswe tubize butungilija wa Mulungu muli Wei. Bushikanu wa ngʼwa Paulo mu butumami wa evangeli