2 Bakolinto 4 - Ilagano Ipya Lya

Kalomelele ka ngʼwa Paulo kali hape

¹ Kulwa iyo, iki tuli na butumami ubu, gitumo twali tuchilwa kigongo, tutoloha;

² Aliyo twaayilema mihayo ya minala iyibisile, tutushiminzaga nyasalasala, nulu tutusanjaga mihayo ya Mulungu na bulembalembi; aliyo kulwa kuyolecha hape i nghana, wiyanguji wa buli munhu butukumilije mu butongi wa Mulungu.

³ Aliyo nulu evangeli yiswe ifikigije, nahene ifikigije kubo abajimilile;

⁴ Abo mulungu wa si iyi waabokuja maganiko gaho abatuzunya, litizubakila isana lya evangeli ya ikujo lya ngʼwa Kristo, Uyo ali suso ya Mulungu.

⁵ Iki tutilomelaga biswe benekele, aliyo Kristo Yesu giki, ali Seba, na biswe giki, tuli batumami bingʼwe kulwa nguno ya ngʼwa Yesu.

⁶ Iki Mulungu Uyo waahaya giki, Isana lyake kufuma mu giiti, huna ngʼwene Uyo waaka mu ngholo jiswe, atwinhe isana lya bumani wa ikujo lya Mulungu mu bushu wa ngʼwa Yesu Kristo.

⁷ Aliyo busabi ubu wa mpango tuli nabo mu shiseme sha bulongo giki, u wingi wa nguzu kutinda bubize bufumile kuli Mulungu, iti mu biswe.

Nguzu ja Mulungu jikutumamilaga mu shiseme sha bulongo

⁸ Twashitelejiwa mapande gose, aliyo tutuhehenala; twazwangana, aliyo tutugwa ngholo;

⁹ Twakubiwa, aliyo tutulekanijiwa; twatalichiwa, aliyo tutuyagajiwa;

¹⁰ Tukabuchaga gwa mu mibili yiswe kabulagilwe ka ngʼwa Yesu, bupanga wa ngʼwa Yesu nabo butendwe mu mibili yiswe.

¹¹ Iki biswe aba tuli bapanga tukinhagwa ko gwa tuche kulwa nguno ya ngʼwa Yesu, u bupanga wa ngʼwa Yesu nabo bumanike mu mibili yiswe ya kucha.

¹² Giko lulu kucha tukwitaga mu biswe, aliyo bupanga mu bingʼwe.

¹³ Aliyo iki tuli na moyo gwenuyu gwa kuzunya, gitumo yaandikwa giki, Nali nuzunya, na kulwa nguno iyo nuhaya; na biswe twaazunya, na kulwa nguno iyo twahaya;

¹⁴ Iki tumanile giki, Uyo waanjucha Seba Yesu, alatujucha na biswe muli Yesu, na alatwimilija kihamo na bingʼwe ku butongi wakwe.

¹⁵ Iki mihayo yose ili ho kulwa nguno yingʼwe giki, kigongo chongejiwe no kulwa kulumba kwa bingi, kulumba kukwijiwe kwikujo lya Mulungu.

¹⁶ Kulwa iyo tutugwa ngholo; iki nulu munhu wiswe wa hanze akakenagukaga, aliyo munhu wiswe wa mugati akudoganyiwagwa bupya buli lushiku.

¹⁷ Iki u kuluhiwa kwiswe kubupu, ukuli kwa kakanza kado duhu, kukutwitilaga ikujo lya welelo lingi no kutinda;

¹⁸ Kunu tutushilolaga shinhu ishikabonagwa, aliyo isho ishitabonagwa: iki ishabonwa shene shengemekije duhu, aliyo ishitabonagwa shene shili sha welelo.