2 Bakolinto 3 - Ilagano Ipya Lya

Ikujo na katumamile ka ilagane ipya

¹ Angu, twandia hangi kwikumilija benekele? nulu hamo igongile biswe tubize na nyaluba ja kutukumilija ku bingʼwe nulu ja kukumilijiwa ningʼwe, gitumo bangi?

² I nyaluba yiswe ili bingʼwe, yandikilwe mu ngholo jiswe, imanikile na kusongʼwa na banhu bose;

³ Bingʼwe ngʼwaamanika giki, muli nyaluba ya ngʼwa Kristo iyatumangʼwa na biswe, itandikilwe na wino, aliyo na Moyo wa Mulungu Uyo ali mpanga; iti ha mabalala ga mawe, aliyo ha mabalala ga ngholo ja ki-mili.

⁴ U kusanya kwenuko tuli nako kuli Mulungu kulwa Kristo:

⁵ Iti giki, twiyigeja biswe benekele kugwiganika mhayo gose giti gwafuma mu biswe benekele; aliyo wigeja wiswe wafuma kuli Mulungu;

⁶ Uyo hangi waatwigeja kubiza batumami ba ilagane ipya; iti ba nuguta, aliyo ba moyo; iki nuguta ikubulagaga, aliyo moyo gukuhimbuchaga.

⁷ Aliyo ulu katumamile ka kucha akali kandikilwe na kolilwe ha mawe kali kiza ngʼwikujo, kushisha nose bana ba Israeli bali batudula kubukamilija bushu wa ngʼwa Musa kulwa nguno ya bungʼweku wa bushu wakwe; ubu wahaya kushila:

⁸ A katumamile ka moyo katubiza na ikujo kutinda ilo?

⁹ Iki ulu katumamile ka kulekanya nsango kali na ikujo, a katumamile ka butungilija kali na ikujo ilitindile no.

¹⁰ Iki nulu iyo yali yakujiwa, nahene yali iti na ikujo mu mhayo uyu kuhva nguno ya ikujo ilitindile no.

¹¹ Iki ulu ilo ilyahaya kushila lyali na ikujo, kutinda no ilikushingaga ho lili na ikujo.

¹² Ali, iki tuli na kwisagilwa ukuli chene, tukuhayaga na bugimu no.

¹³ Tuti giti Musa uwali ufikija bushu wakwe na ngʼwenda, bana ba Israeli batizukamilija nghalilo ya iyo yali yahaya kukalika:

¹⁴ Aliyo maganiko gabo gali guganghanajiwa: iki kushisha lelo iyi, ulu busoma ilagane lya kale, ifikigijo lyenilo litali lili ho, iki batali kukundulilwa giki, muli Kristo lyinjiwa ho.

¹⁵ Aliyo kushisha lelo iyi, buli aho Musa akusomagwa, ifikigijo lili ho ha ngholo jabo.

¹⁶ Aliyo aho ngholo yungalukila Seba, ifikigijo ilo likwinjiwagwa ho.

¹⁷ Iki Seba hu ngʼwene Moyo Ngʼwenuyo: na aho ali ho Moyo wa Seba, nahene kuli ho kutungulwa.

¹⁸ Aliyo biswe bose na bushu butafikigije, tukulolaga ikujo lya Seba, giti ngʼwilole, twalujiwa mu suso yakwe umo ali, kufuma ngʼwikujo kushisha ngʼwikujo, gitumo likufumaga kuli Seba Uyo ali Moyo.