2 Bakolinto 2 - Ilagano Ipya Lya

¹ Aliyo mu moyo gwane nali nusola mhayo uyu giki, natiza hangi ku bingʼwe nasunduhalile.

² Iki ulu namupinihaja, u wa kuniyeja ni nani, ulu ati uyo wapinihajiwa na nene?

³ Na nene nali nangʼwandikila mhayo gwenuyu giki, aho naliza, naleke kubona bupina mu benabo, abo shinigelile nene kubayegela; ndi na kusanya mu bingʼwe bose giki, kuyega kwane kwene kuyega kwa bingʼwe bose.

⁴ Iki nali nungʼwandikila bingʼwe kufuma mu kuluhiwa kwingi na busatu butale wa ngholo na shisoji shingi; iti giki, mupinihajiwe, aliyo mumane butogwa ubo ndi nabo ku bingʼwe wingi no kutinda.

Banekeje na kunshosha uwapinihala kulwa shibi shakwe

⁵ Aliyo ulu munhu ose upinihaja, atanipinihagije nene, aliyo wamupinihagije nusu nusu bingʼwe bose, natizumudidoheja kutinda.

⁶ U munhu ali giko, u nsango uyo wali witilwa na bingi gwangʼwigelwa.

⁷ Ili hambuhambu munkuulilwe, na kununguja munhu giti uyo, atizutubijiwa na bupina wingi kutinda.

⁸ Kulwa iyo nangʼwikumbilija mudimye butogwa wingʼwe kuli wei.

⁹ Iyo yene nguno nali nandika giki, nadegeleke namane ulu muli bigwi mu mihayo yose.

¹⁰ Aliyo uyo ngʼwankuulilwa mhayo gose nu nene nane nankuulilwa: iki iyo naankuulilwa, ulu naankuulilwa mhayo gose, nahene naankuulilwa kulwa nguno yingʼwe mu butongi wa ngʼwa Kristo;

¹¹ Shetani atizutushitila hapine; iki biswe tutajimililwe bukungiji wakwe.

Kulumba kulwa katumamile ka evangeli

¹² Aliyo aho nali nushika Troa kulomela evangeli ya ngʼwa Kristo, na aho nali nigulilwa nyango muli Seba,

¹³ Nahene nali natubona kwifula mu moyo gwane, iki nali natasangile ko Tito ndugu wane: aliyo nali nilaga nabo, huna nubuka kuja Makedonia.

¹⁴ Aliyo Mulungu alumve Uyo akututongelaga gwa mu bupyeni muli Kristo, na kwelecha kulwiswe u ngʼwaso gwa wiza gwa kumana Wei mu buli ipande.

¹⁵ Iki biswe tuli ngʼwaso gwa wiza gwa ngʼwa Kristo kuli Mulungu, mu abakupijiwagwa na mu abakuyagalaga:

¹⁶ Ku bangi tuli ngʼwaso gwa kucha kwa kushika mu kucha; na ku bangi tuli ngʼwaso gwa bupanga wa kushika mu bupanga. Ni nani uyo igelelilwe ku mihayo yeniyi?

¹⁷ Iki biswe tuti giti bingi abasulugija mhayo gwa Mulungu: aliyo tuli abo abakulungalungaga mu welwa ngholo, kina banhu abatungʼwa na Mulungu, tukuhayaga muli Kristo mu butongi wa Mulungu.