2 Bakolinto 13 - Ilagano Ipya Lya

Bakenaguji batukija kulekanyiwa nsango

¹ Ulu lwene lukangala lwa kadatu nizile ku bingʼwe. Mu kuhaya kwa bakaniji babili nulu badatu, buli mhayo guladimiwa.

² Nali natongaga kumuwila, gitumo aho nali nali ho lugendo lwa kabili, giko ni haha aho nati ho, natonga kuhandikila aho abali bita shibi kale, na ku bangi bose giki, ulu naliza hangi, natumulendegetela.

³ Iki mulikoba kimanikijo cha ngʼwa Kristo, Uyo akalungalungaga muli nene; Uyo ati ngokolo ku bingʼwe, aliyo ali wa nguzu mu bingʼwe:

⁴ Iki nulu wali ukongʼwa mu bugokolo, aliyo ali mpanga kulwa nguzu ja Mulungu. Iki na biswe tuli bagokolo muli Wei, aliyo tukwikala bapanga hamo nanghwe kulwa nguzu ja Mulungu ku bingʼwe.

⁵ Igemagi benekele ulu muli mo mu kuzunya: igemagi bingʼwe benekele. Nulu mutamanile bingʼwe benekele giki, Yesu Kristo ali mu bingʼwe? Numho muli balengʼwa?

⁶ Aliyo nisagilwa giki, mukumana giki, biswe tuti balengʼwa.

⁷ Twanomba Mulungu giki, mutizita mhayo gose gwa bubi; iti giki, biswe tubonwe tuti na buka, aliyo giki, bingʼwe ngʼwite iyo igelile, nulu biswe tubize giti tuli balengʼwa.

⁸ Iki tutudula kwita mhayo gwa wanishi ku nghana, aliyo ha lwande lwa nghana.

⁹ Iki twayega aho biswe tuli bagokolo, na bingʼwe muli na nguzu: nu kulomba twalomba giki, mushikane.

¹⁰ Hi nguno nangʼwandikila mihayo iyi aho nati ho, giki, ulu nalabiza ho natizubutumamila bukali, gitumo budula ubo Seba waaninha kulwa kumuzenja, nulu iti kulwa kumukambula.

Kalagilile

¹¹ Ya kumalija, badugu, ikalagi mhola, mushikane; mulungujiwe; bizagi na iganiko limo, ikalagi mu mhola: na Mulungu wa butogwa na wa mhola akubiza hamo ningʼwe.

¹² Igishagi benekele na benekele na kibipile kela.

¹³ Bela bose bamugisha.

¹⁴ Kigongo cha Seba Yesu Kristo, na butogwa wa Mulungu, na kusangila kwa Moyo Ngʼwela shikale hamo ningʼwe bose. Amina.