2 Bakolinto 12 - Ilagano Ipya Lya

Kugunguhiwa na kudohetejiwa kwa ngʼwa Paulo

¹ Nihadikija kwikumilija nulu itigelile; aliyo nakuhaya ya kolechiwa na ya kukundulwa kwa Seba.

² Namanile munhu umo muli Kristo, haha yashikaga miaka ikumi na ine, munhu ngʼwenuyo wali uhwehulwa kutwalwa ngʼwigulu lya kadatu (nulu walali mu mili natamanile; nulu walati mu mili, nahene natamanile; Mulungu amanile).

³ Na nene namanile munhu ngʼwenuyo, (nulu walali mu mili, nulu walati mu mili, natamanile; Mulungu amanile);

⁴ Giki, munhu ngʼwenuyo wali uhwehulwa kutwalwa ku ngunda gwa Mulungu, nanghwe wali wigwa mihayo iyitudula kuhayiwa, iyitigelile munhu kuyihaya.

⁵ Uyo ali giko hu ngʼwene nakwikumilija muli wei, aliyo kulwane ngʼwenekele natikumilija, ulu iti mu mabugokolo gane.

⁶ Iki nulu ni natogilwe kwikumilija, ni natubiza nchiluchilu, iki ni nahaya ya nghana: aliyo naleka, munhu ose atizuniganikila kutinda iyo wahona kuli nene, nulu iyo wigwa kuli nene.

⁷ Na kulwa nguno iyi, natizukilanija kwikumilija kulwa wingi wa makukundulilwa, hi nguno nali ninhiwa lihwa mu mili, lyene ntungʼwa wa ngʼwa Shetani kunitula, giki, natizukilanija kwikumilija.

⁸ Kulwa mhayo uyu nali nungʼwikumbilija Seba nghangala idatu, mhayo uyu guninge ho.

⁹ Nanghwe uniwila giki, Kigongo chane chakwigela: iki nguzu jane jikushikanaga mu bugokolo. Kulwa iyo nayega no kwikumilija mu bugokolo wane, nguzu ja ngʼwa Kristo jikale muli nene.

¹⁰ Kulwa iyi naliyegela mu bugokolo, mu budalahwa, mu buluhi, mu kunyajanyajiwa, mu makoye, kulwa nguno ya ngʼwa Kristo: iki ulu ndi ngokolo hu ndi wa nguzu.

Shimanikijo sha butungʼwa wakwe

¹¹ Nabiza nchiluchilu; bingʼwe ngʼwanihadikija; iki shali shinigelile kukumilijiwa na bingʼwe: iki a batungʼwa a batale batanilebije mu mhayo gose, nulu nabize nati kinhu.

¹² Nghana shimanikijo sha ntungʼwa shali Shitwa mu bingʼwe mu kwiyumilija kose, mu shimanikijo, mu sha kukumya, mu Shitwa sha nguzu.

¹³ Iki mhayo ki uyo ngʼwali ngʼugehelwa kutinda kanisa jingi, ulu iti mu mhayo uyo giki, natamulubalubije? nikuulilagwi busobya ubu.

Paulo ubamanicha giki, akwiza

¹⁴ Lolagi, ulu lwene lukangala lwa kadatu namalila kwiza ku bingʼwe; nahene natumulubyalubya: iki natukoba shinhu shingʼwe aliyo ndimukoba bingʼwe: iki itigelile bana kubabikila shikolo babyaji, aliyo babyaji bababikile shikolo bana.

¹⁵ Na nene ndi na buyegi kufunya shikolo na kufunyiwa nene ngʼwenekele kulwa bupanga wingʼwe. Nulu nongeja kumutogwa no, huna bingʼwe ngʼwagehya kunitogwa?

¹⁶ Aliyo nulu ibize giko, nahene nali natumulubyalubya; aliyo iki nali na masala, numugwasha na masalasala.

¹⁷ Angu, hamo nali nungʼwibonela nabone solobo mu benabo nabatumaga ku bingʼwe?

¹⁸ Nakanganikila Tito, hangi nuntuma ndugu ngʼwenuyo hamo nanghwe. Angu, Tito wali ungʼwingija kinhu? Angu, twali tutushiminzila mu moyo gumo? twali tutushiminzila mu kapandile kamo?

Paulo ubahugula, aleke kubasanga bati wima mu kuzunya kwabo

¹⁹ Angu mulitwiganikila giki, tukungʼwiyandayandilaga? Mu butongi wa Mulungu twalungalunga muli Kristo aliyo mihayo yose, batogwa, ili kulwa kumuzenja.

²⁰ Iki nogoha, aho naliza, natizumusanga muti gitumo natogelilwe; na nene nane mutizunibona ndi gitumo bingʼwe mutatogelilwe; natizusanga hamo buli ho wilemelwa, na wilu, budaki, na buyombo, na busonghanya, na busigani, na budoshi, na wiyogeji;

²¹ Na hangi aho ndiza Mulungu atizunidoheleja mu butongi wingʼwe, nane nabone bupina kulwa bingi abali bita shibi kale, na koya batoyile mu buhali na bujingi, na busoso isho bali bita.