2 Bakolinto 10 - Ilagano Ipya Lya

Paulo ubulwilila butungwa wakwe

¹ Aliyo lulu, u nene Paulo nangʼwikumbilija kulwa bufula na bufuku wa ngʼwa Kristo, u nene, uyo ndi ngʼwidoheleja aho ndi hamo ningʼwe, aliyo ulu nati ko ndi ngimu ku bingʼwe;

² Ali chene, nangʼwikumbilija, aho ndi ho natizubiza na bugimu ubu nabusanije hubiza nabo ku bamo, abakutupimaga biswe giki, tukushiminzaga kimili.

³ Iki nulu twashiminza mu mili, aliyo kulwa, tutalwaga ki-mili,

⁴ (Iki shilanga sha bulugu wiswe shiti sha ki-mili, aliyo shili na budula kulwa Mulungu kugagwisha mamizengo ga nguzu);

⁵ Tukugagwishaga maganiko, na buli kinhu cha higulya ichigunguhije kubukilila bumani wa Mulungu, na hangi kulisesehaja buli iganiko libize lili na wigwi kuli Kristo;

⁶ Tumalilile kuwinha nsango bukitigwa bose, aho wigwi wingʼwe bulashikila.

⁷ Angu, mukuyidililaga mihayo ya kubonwa duhu? Ulu munhu wisanya ngʼwenekele giki, wei ali wa ngʼwa Kristo, idedekanyage ngʼwenekele giki, gitumo wei ali wa ngʼwa Kristo, niswe tuli ba ngʼwa Kristo.

⁸ Iki nulu nongeja kwikumilija hado kulwa budula wiswe (ubu Seba watwinha kumuzenga, iti kumugwisha), nahene nataladingʼwa minala:

⁹ Natizubonwa giki, natogilwe kungʼogohya na nyaluba jane.

¹⁰ Iki balihaya giki, Nyaluba jakwe hene jili na mihayo mitale na ja nguzu; ali u mili gwakwe, ulu ali ho, gwene ngokolo, na kahayile kakwe dalali.

¹¹ Munhu giti uyu ni iganikage giki, umo tuli mu mihayo ya nyaluba aho tuti ho, hu umo tuli mu kitile aho tuli ho.

¹² Iki tuti na bugimu kwibala nulu kwilenganija na bangi abakwikumiligijaga benekele: aliyo boi iki bipima boi na boi, na bilenganija boi na boi, bati na kitegelegeje.

¹³ Aliyo biswe tutalikumilija kukila umo tuli, aliyo tukwikumilija kulenganila na kagelekelelwe ka Mulungu, ako akatugelekela kubiza ngele ya kushika nu ku bingʼwe.

¹⁴ Iki tutunanamilaga benekele kukilila ngelelo yiswe himba giki, tutashikaga ku bingʼwe, iki tukashika nu ku bingʼwe na evangeli ya ngʼwa Kristo.

¹⁵ Tutikumilija kutinda umo tugelelile, nulu mu milimo ya banhu bangi; aliyo tuli na kwisagilwa uku giki, kuzunya kwingʼwe aho kulakula, tulakumilijiwa mu bingʼwe gitumo kagelekelelwe kiswe umo kali kushika mu kukwila no,

¹⁶ Nose tulalomela evangeli na ku mapande ga kukila ku bingʼwe, tutizikumiligija mu kagelekelelwe ka ungi mu mihayo iyamaliihva kubejiwa.

¹⁷ Aliyo uyo akikumilijaga, ikumiligijage muli Seba.

¹⁸ Iki uyo wazunilijiwa ati ngʼwenuyo akwikumilijaga, aliyo ngʼwenuyo Seba unkumilija.