2 Bakolinto 1 - Ilagano Ipya Lya

Kugisha kwa ngʼwa Paulo

¹ Paulo, ntungʼwa wa ngʼwa Kristo Yesu kulwa butogwa wa Mulungu, na Timoteo ndugu wiswe, ku kanisa ya Mulungu iyili mu Korintho, kihamo na bela bose abali mu si yose ya Akaya:

² Kigongo kibize ku bingʼwe na mhola, ishufuma kuli Mulungu Siswe, na kuli Seba Yesu Kristo. Kulumba kuli Mulungu kulwa kulungujiwa na kupijiwa

³ Akumilijiwe Mulungu, Ise wa Seba wiswe Yesu Kristo, u Siswe wa kigongo, na Mulungu wa kulunguja kose;

⁴ Uyo akutulungujaga mu makoye giswe gose, biswe tubaluuguje abali mu makoye gose, na kulunguja uku biswe tukulungujiwagwa nako na Mulungu.

⁵ Iki gitumo makuluhiwa ga ngʼwa Kristo gakukwilaga mu biswe, giko hangi nu kulungujiwa kwiswe kukukwilaga kulwa kulungujiwa na Kristo.

⁶ Aliyo nulu ulu tuluhiwa, nahene ili kulwa nguno ya kulungujiwa kwingʼwe na bupiji wingʼwe: na hangi nulu tulungujiwa, nahene ili kulwa nguno ya kulungujiwa kwingʼwe ukukutumamaga mu kwiyumilija kwa kuluhiwa uku tukuluhaluhiwagwa nako na biswe; nulu tulungujiwa, ili kulwa nguno ya kulungujiwa kwingʼwe na bupiji wingʼwe.

⁷ Na kwisagilwa kwiswe ku bingʼwe kuli kudimu, iki tumanile giki, gitumo muli mu busangi wa mu kuluhiwa, giko hangi muli mu busangi wa kulungujiwa.

⁸ Iki tutatogilwe bingʼwe, badugu, kwikala mutamanile mihayo ya makoye ayo gali gatugwila mu Asia, giki, twali tubunwa no, kushisha nose tugwa ngholo giki, tutikala bapanga:

⁹ Ali chene, biswe benekele twali twilekanya benekele nsango gwa kucha, tutizisanya benekele, aliyo muli Mulungu Uyo akajuchaga bafu:

¹⁰ Uyo waatupija mu kucha kutale giko, hangi akutupijaga; Uyo tunsanije alatupija nu ku butongi;

¹¹ Bingʼwe ningʼwe, ngʼutugunana mu kulomba kwingʼwe kulwiswe giki, bingi balumbe kulwa nguno yiswe kulwa kigabilwc icho twali twinhiwa kulwa kulombelwa na banhu bingi.

Kikalile ka ngʼwa Paulo

¹² Iki kwikumilija kwiswe hu kwene giki, bukaniji wa wiyanguji wiswe buli giki, i shikalile shiswe mu si iyi shali shili mu wela na mu nghana ya Mulungu, shali shiti mu masala ga ki-mili, aliyo shene mu kigongo cha Mulungu, na kutinda no ku bingʼwe.

¹³ Iki tutungʼwandikila mihayo yingi ulu iti iyo ngʼwisoma na kuyitambula giki, ili ya nghana; hangi nisagilwa giki, mukuyitambula kushisha ku mhelo;

¹⁴ Gitumo ngʼwali ngʼututambula giki, biswe tuli kwikumilija kwingʼwe gitumo na bingʼwe muli kwikumilija kwiswe mu lushiku lwa Seba Yesu.

I nguno ya kudila kwa ngʼwa Paulo kushika kubo

¹⁵ Na mu kusanya uku nali natogilwe kwiza ku bingʼwe kwandia, mubone kigabilwe cha kabili;

¹⁶ Na kubita ku bingʼwe kuja Makedonia, na hangi kufuma Makedonia na kushoka ku bingʼwe huna munishindikile mu lugendo lwane kuja Buyudaya.

¹⁷ Aliyo aho nali niganika giko, himba nali nubiza ndi ngalugalu? nulu hamo mihayo iyo nasola kwita, nasola kuyita ki-mili duhu, huna nabize munhu wa ee, ee, na hangi, yaya, yaya?

¹⁸ Aliyo gitumo Mulungu ali ngʼwishigwa, mhayo gwiswe ku bingʼwe gwali guti ee na yaya.

¹⁹ Iki Ngʼwana wa Mulungu, Yesu Kristo Uyo uwaalomelwa mu bingʼwe na biswe, nene na Silvano na Timoteo, walati ee na yaya, aliyo muli Wei ili mo ee duhu.

²⁰ Iki kwisagija kose kwa Mulungu kuli ee muli Wei, na hangi Amina muli Wei, Mulungu abone kukujiwa mu biswe.

²¹ Aliyo uwaatulambya biswe hamo na bingʼwe muli Kristo, na kutwitiila maguta, ngʼwene Mulungu;

²² Uyo hangi waatutuulila kimanikijo, na utwinha ngumili ya Moyo Ngʼwela mu ngholo jiswe.

²³ Aliyo nangʼwitana Mulungu abize nkaniji ku moyo gwane giki, kulwa nali natogilwe kumuchila kigongo nali natiza Korintho.

²⁴ Iti giki, biswe tuli basugi ba kuzunya kwingʼwe aliyo tuli bagunani ba kuyega kwingʼwe: iki mu kuzunya muhandikilile.