1 Yohana 4 - Ilagano Ipya Lya

Moyo wa nghana na moyo wa bumama

¹ Batogwa, mutizuzunya buli moyo gose, aliyo igemagi i mioyo ulu ifumile kuli Mulungu; iki bahangi ba bumama bingi bilongile mu si.

² Mu mhayo uyu mugumanile Moyo wa Mulungu: buli moyo ugulitambula giki, Yesu Kristo wiiza mu mili, gwenuyo gufumile kuli Mulungu:

³ Na buli moyo ugututambula giki, Yesu Kristo wiiza mu mili, gwenuyo gutafumile kuli Mulungu: na uyu gwene moyo gwa ngʼwilwisha wa ngʼwa Kristo, uyo ngʼungʼwigwa giki, aliza; na haha wamalile kubiza mo mu si.

⁴ Bingʼwe bana bane, muli ba Mulungu, hangi ngʼwamala kubapyena: iki Uyo ali mu bingʼwe ali ntale kutinda uyo ali mu si.

⁵ Abo bali ba mu si: kulwa iyo bakuhayaga ya mu si, na si nayo yubigwa.

⁶ Biswe tuli ba Mulungu: uyo amanile Mulungu akutwigwaga; uyo ati wa Mulungu atutwigwaga. Mu mhayo uyu twaagumana moyo gwa nghana na moyo gwa bujimiji.

Mulungu ali butogwa Bakwe bitogagwe

⁷ Batogwa twitogagwi: iki butogwa buli wa Mulungu; na buli uyo watogwa waabyalwa na Mulungu, hangi amanile Mulungu.

⁸ Uyo atutogwa atamanile Mulungu; iki Mulungu ngʼwene butogwa.

⁹ Mu mhayo uyu butogwa wa Mulungu wiigengeleka ku biswe giki, Mulungu waantuma Ngʼwana wakwe uwaabyalwa umo wike mu si, tubize bapanga muli Wei.

¹⁰ Ubu wene butogwa, iti giki, biswe twali tuntogwa Mulungu, yaya, aliyo Wei waatutogwa biswe, na untuma Ngʼwana wakwe kubiza kihongelo cha shibi shiswe.

¹¹ Batogwa, ulu Mulungu waatutogwa biswe giko, shitwigelile na biswe twitogwe.

¹² Ati ho munhu uwamona Mulungu kufuma kale: ulu twitogwa, Mulungu akwikalaga mu biswe, na butogwa wakwe waashikanyiwa mu biswe:

¹³ Kulwa iyi tumanile giki, tukwikalaga muli Wei, nanghwe mu biswe, iki waatusangigija na Moyo wakwe.

¹⁴ Niswe twaabona hangi twakanila giki, Siswe waantuma Ngʼwana wakwe kubiza Mpija wa ba mu si.

¹⁵ Uyo ose utambula giki, Yesu ali Ngʼwana wa Mulungu, Mulungu akwikalaga muli wei, nanghwe muli Mulungu.

¹⁶ Na biswe twaabumana na twaabuzunya butogwa ubo Mulungu ali nabo ku biswe. Mulungu ngʼwene butogwa; na uyo akwikalaga mu butogwa, akwikalaga muli Mulungu, na Mulungu akwikalaga muli wei.

¹⁷ Giko butogwa waashikanyiwa mu biswe, tubize na bugimu mu lushiku lwa kulekanyiwa nsango: iki gitumo Wei ali, na biswe tuli chene mu si umu.

¹⁸ Boba buti mo mu butogwa: aliyo butogwa ubushikanile bukwinjaga boba, iki boba buli na nsango, na uyo ali na boba atushikanyiwa mu butogwa.

¹⁹ Biswe twaantogwa, iki Wei wandia kututogwa biswe.

²⁰ Ulu munhu uhaya giki, Nantogwa Mulungu, aliyo unkolwa nduguye, ngʼwene ali mama: iki uyo atantogagwa nduguye uyo akumonaga, alantogwa kinahe Mulungu, Uyo atamonaga?

²¹ Na kilagilo iki twiinhiwa nanghwe giki, uwantogwa Mulungu, antogwe nu nduguye.