1 Yohana 3 - Ilagano Ipya Lya

¹ Lolagi, butogwa ki ubo Siswe waatwinha biswe, twitanwe bana ba Mulungu; kulwa mhayo uyo si itatumanile biswe, iki yali itamanile Wei.

² Batogwa, haha tuli bana ba Mulungu, na itali kwigengeleka umo tulabizila; aliyo tumanile giki, aho aligengeleka, tulabiza twikolile nanghwe, iki tulamona gitumo ali.

³ Na buli uyo akungʼwisagililagwa Wei giko, akwiyejaga ngʼwenekele gitumo Wei ali ngʼwela.

⁴ Buli uyo akwitaga shibi, akwitaga bugomi hangi, iki shibi shene bugomi.

⁵ Ningʼwe mumanile giki, Wei wali wigengeleka ashinje shibi shiswe; na muli Wei shibi shiti mo.

⁶ Buli uyo akwikalaga muli Wei atitaga shibi; buli uyo akwitaga shibi atamonaga, nulu atamanaga Wei.

⁷ Bana bado, munhu ose atizumulembalemba; uyo akwitaga butungilija ali ntungilija, gitumo na Wei ali ntungilija;

⁸ Uyo akwitaga shibi ali wa ngʼwa Shetani; iki Shetani akitaga shibi kufuma kwandia. Kulwa mhayo uyu Ngʼwana wa Mulungu wali wigengeleka ayisambule milimo ya ngʼwa Shetani.

⁹ Buli uyo waabyalwa na Mulungu atitaga shibi, iki lubiyu lwakwe (lwa Mulungu) ikwikalaga muli wei; nanghwe atudula kwita shibi, iki waabyalwa na Mulungu.

¹⁰ Mu mhayo uyu bana ba Mulungu na bana ba ngʼwa Shetani bigengeleka. Buli uyo atitaga butungilija ati wa Mulungu, nulu uyo atuntogwa nduguye.

Kwitogwa kwa nghana kolechiwa mu Shitwa

¹¹ Iki uyu guli mhayo uyo ngʼwaagwigwa kufuma kwandia giki, twitogagwe benekele na benekele;

¹² Iti giti Kaini uwali wa ngʼwenuyo mi, nanghwe akamulaga nzunaye; nanghwe akamulagila nguno ki? Iki Shitwa shakwe shali shili sha bubi, aliyo sha nzunaye shali shili sha butungilija.

¹³ Mutizukumya, badugu bane, ulu si yamukolwa.

¹⁴ Biswe tumanile giki, twaabita kwinga mu kucha kushika mu bupanga, iki tukubatogagwa badugu. Uyo atuntogagwa nduguye akwikalaga mu kucha.

¹⁵ Buli uyo wankolwa nduguye ali mulagi: na mumanile giki, ati ho mulagi uyo aii na bupanga butushila bukwikalaga muli wei.

¹⁶ Mu mhayo uyu twaabumana butogwa, iki Wei waabutuula ho bupanga wakwe kulwiswe; huna shitwigelile na biswe kubutuula ho bupanga wiswe kulwa badugu.

¹⁷ Aliyo munhu uyo ali nasho shikolo sha si iyi, ulu umona nduguye ali na kugayiwa, ukija kungʼwitila kigongo, angu, butogwa wa Mulungu bukwikalaga muli wei kinahe?

¹⁸ Bana bane, tutitogagwe mu mhayo, nulu mu lulimi duhu; aliyo mu Shitwa na mu nghana.

¹⁹ Kulwa mhayo uyu tukumana giki, tuli ba nghana, hangi tulatimbya ngholo jiswe mu butongi wakwe:

²⁰ Iki ulu ngholo jiswe jutulekanya, Mulungu ali ntale kutinda ngholo jiswe, nanghwe amanile mihayo yose.

²¹ Batogwa, ulu ngholo jiswe jitutulekanya, tuli na bugimu kuli Mulungu.

²² Na iyo yose tunomba, twinhiwa nanghwe, iki tukudimaga shilagilo shakwe na kuyita iyo atogilwe mu miso gakwe.

²³ Iki chene kilagilo chakwe giki, tulizunye lina lya Ngʼwana wakwe Yesu Kristo, na kwitogwa benekele na benekele gitumo waatulagila.

²⁴ Uyo akushidimaga shilagilo shakwe akwikalaga muli Wei, nanghwe muli wei. Kulwa mhayo uyu tumanile giki, akwikalaga mu biswe, kulwa Moyo uyo waatwinha.