1 Yohana 2 - Ilagano Ipya Lya

Yesu ali nombeji wa bazunya

¹ Bana bane bado, nangʼwandikila yeniyi giki, mutizita shibi. Munhu ulu wita shibi, tuli na nombeji kuli Siswe, Ngʼwene Yesu Kristo ntungilija.

² Hu na Ngʼwene kihongelo cha shibi shiswe; iti kulwa shiswe gwike, aliyo hangi kulwa shibi sha ba mu si bose.

Shimanikijo sha bazunya gete (1) Kungʼwigwa Yesu

³ Mu mhayo uyu tumanile giki, twaamana Wei, ulu tushidima shilagilo shakwe.

⁴ Uyo alihaya giki, naamana Wei, aliyo atushidimaga shilagilo shakwe, ali nomolomo, nayo i nghana iti mo muli wei;

⁵ Aliyo uyo ose ugudima mhayo gwakwe, muli ngʼwenuyo butogwa wa Mulungu waashikilijiwa nghana. Mu mhayo uyu tumanile giki, tuli muli Wei.

⁶ Uyo alihaya giki, akwikalaga muli Wei, shingʼwigelile kushiminza gitumo Wei waashiminzaga.

(2) Kubatogwa badugu

⁷ Badugu, natungʼwandikilaga kilagilo kipya, aliyo kilagilo cha kale, icho ngʼwali nacho kufuma kwandia: i kilagilo cha kale kili mhayo uyo ngʼwaagwigwa kufuma kwandia.

⁸ Hangi nangʼwandikila kilagilo kipya, ikili mhayo gwa nghana muli Wei na mu bingʼwe, iki giiti kikubitaga, na isana i lya nghana likwakaga haha.

⁹ Uyo alihaya giki, ali ngʼwisana aliyo unkolwa nduguye, atali mu giiti na kushisha haha.

¹⁰ Uyo antogilwe nduguye, akwikalaga ngʼwisana, hangi muli wei mhayo gwa kwipama guti mo.

¹¹ Aliyo uyo unkolwa nduguye ali mu giiti, hangi ukushiminzilaga mu giiti, atamanile uko ajile, iki giiti chaamokuja miso gakwe.

¹² Nangʼwandikila bingʼwe bana bado, iki ngʼwaalekejiwa shibi shingʼwe kulwa nguno ya lina lyakwe.

¹³ Nangʼwandikila bingʼwe bababa, iki ngʼwaamana Wei, Uyo ali ho kufuma kwandia. Nangʼwandikila bingʼwe basumba, iki ngʼwaampyena u mi. Nangʼwandikila bingʼwe bana bado, iki ngʼwaamana Siswe.

¹⁴ Nangʼwandikila bingʼwe bababa, iki ngʼwaamana Uyo ali ho kufuma kwandia. Nangʼwandikila bingʼwe basumba, iki muli na nguzu, na mhayo gwa Mulungu gukwikalaga mu bingʼwe, hangi ngʼwaampyena u mi.

(3) Kuleka kushitogwa sha mu si

¹⁵ Mutizutogwa si, nulu mihayo iyili mo mu si. Ulu munhu ose utogwa si, butogwa wa ngʼwa Siswe buti mo muli wei;

¹⁶ Iki yose iyili mo mu si, kwikumva kwa mili, na kwikumva kwa miso, na budoshi wa bupanga, itafumile kuli Siswe, aliyo ili ya mu si.

¹⁷ Na si ikubitaga hamo na kwikumva kwayo: aliyo uyo akwitaga iyo Mulungu atogilwe akwikalaga ho welelo na welelo.

(4) Kufambula giki, Yesu ali Kristo

¹⁸ Bana bado, lili ikanza lya nghalilo, na gitumo ngʼwali ngʼwigwa giki, ngʼwilwisha wa ngʼwa Kristo akwiza, na haha bilwisha ba ngʼwa Kristo bingi bamala kwilonga, kulwa iyo tumanile giki, lili ikanza lya nghalilo.

¹⁹ Bali binga mo mu biswe, iki bali bati ba mu biswe; iki ulu ni bali ba mu biswe, ni bikala hamo na biswe; aliyo bakinga ho, bigengeleke giki, bati bose ba mu biswe.

²⁰ Na bingʼwe muli nako kamaalilwe kufuma kuli Uyo Ngʼwela, na mumanile mihayo yose.

²¹ Natangʼwandikilile bingʼwe giki, mutayimanile i nghana, aliyo giki, muyimanile, hangi giki, kuduhu bulomolomo ubufuma mu nghana.

²² Nomolomo ali nani ulu ati uyo akulemaga mhayo uyu, Yesu ali Kristo? Ngʼwenuyo ali ngʼwilwisha wa ngʼwa Kristo uyo akunemaga Siswe na Ngʼwana.

²³ Uyo ose akunemaga Ngʼwana, nu Siswe ati nanghwe; uyo akuntambulaga Ngʼwana, nu Siswe ali nanghwe.

(5) Mihayo yakwe mubo

²⁴ Iyo ngʼwaayigwa kufuma kwandia yikale mu bingʼwe. Iyo ngʼwaayigwa kufuma kwandia ulu yikala mu bingʼwe, na bingʼwe mukwikala muli Ngʼwana na muli Siswe.

²⁵ Na uku u kwene kwisagija uko utwisagija giki, bupanga butushila.

²⁶ Mihayo iyi nangʼwandikila bingʼwe ya ku benabo abaligema kumulembalemba.

²⁷ Aliyo kamaalilwe ako ngʼwaanukula hali Wei kakwikalaga mu bingʼwe, ningʼwe muti na nguno ya munhu ose amulange; aliyo gitumo kamaalilwe kenako kakumulangaga mihayo yose, nako kali ka nghana, kati bulomolomo yaya; gitumo kaamulanga, mukwikala muli Wei.

(6) Kwikala muli Wei

²⁸ Haha lulu, bana bado, ikalagi muli Wei giki, aho aligengeleka, tubize na bugimu, tutalizudingʼwa minala mu butongi wakwe aho alilonga.

Mulungu ali ntungilija, bakwe bakwitaga ska butungilija

²⁹ Ulu mumanile giki, Wei ali ntungilija, mumanile hangi giki, uyo ose akwitaga butungilija waabyalwa nanghwe.