1 Timoteo 6 - Ilagano Ipya Lya

¹ Bose abali mu butungwa wa busese babinhe basabobugonzo ikujo lyose, lina lya Mulungu litizudukwa nulu kulanga kwiswe.

² Nabo abali na basabo-bugonzo abazunya, batizubadalaha, iki bali badugu babo; aliyo hambuhambu babatumamile, babinhilije, iki bali bishigwa na batogwa, bisangija mu solobo ya milimo yabo. Mihayo iyi langaga na ganikilaga.

³ Munhu ose ulu akulangaga yingi, hangi utazunije mihayo mipanga ya Seba wiswe Yesu Kristo, nulu utazunije kulanga ukulenganilile na wela:

⁴ Ngʼwene ndoshi, atamanile mhayo gose, aliyo asalile, wikumva mabugilijo na halali ya mihayo, muyo shufuma wilu na halali na budukaguji na witingʼwa wa bubi,

⁵ Na mahalali agatakalikaga ga banhu abakenagukile mu masala gaho, na nghana yabagaya, biganika giki, kazunije ka wela kene nzila ya kusabila mo: abali giko wikomanye nabo.

⁶ Aliyo kazunije ka wela na wigelelwa kene solobo nhale:

⁷ Iki twali tutenhile kinhu mu si, na giko hangi tutudula kwinga nacho;

⁸ Nahene ulu tuli na shiliwa na shizwalo, shene shitwigele.

⁹ Aliyo abo abatogilwe kusaba, bagwa mu kugengʼwa na mu mbeto, na mu kwikumva kungi na kungi kwa buchiluchilu na bukenaguku, ukubalibija banhu mu kukenagulwa na mu kuyagala.

¹⁰ Iki kwikumva feza kwene itina lya bubi bose: iyo bamo buyikumva, huna bunyangʼwa mu kuzunya na bichima benekele na mabupina mingi.

¹¹ Aliyo bebe, munhu wa Mulungu, ipelage yeniyo; aliyo londelaga butungilija, wela, kuzunya, butogwa, kwiyumilija na bufula.

¹² Lwaga bulugu wa wiza wa kuzunya, dimaga bupanga butushila ubo witanilwa mo, hangi waakanila kuzunya kwa wiza mu miso ga bakaniji bingi.

¹³ Nakulagila mu butongi wa Mulungu, Uyo akushinhaga bupanga shinhu shose, na mu butongi wa ngʼwa Yesu Kristo, Uyo wali ukanila kuzunya kwa wiza ku butongi wa Pontio Pilato, giki:

¹⁴ Dimaga iyo waalagilwa, uti na ibado nulu kilingo kushisha kwilonga kwa Seba wiswe Yesu Kristo;

¹⁵ Uko alolecha mu ngelo yakwe Uyo ali wa lubango na wa budula bose Wei wike, Ntemi wa batemi, na Seba wa baseba,

¹⁶ Uyo wike ali na butucha, akwikalaga ngʼwisana ilitegelwa na munhu, Uyo atabonilwe na munhu nulu umo, hangi ati ho munhu wadula kumona; kuli Wei libize ikujo na budula welelo bose. Amina.

¹⁷ Balagilage abali basabi mu si iyi, batizudosa nulu batizusanya busabi ubuti wa nghana, aliyo bansanye Mulungu Mpanga Uyo akutwinhaga shinhu shose mu wila tuyegele musho;

¹⁸ Bite shitile sha wiza, babize basabi mu shitile sha wiza, na bamalilile mu wila, na bangu kugaba shikolo shabo;

¹⁹ Bibikile wibikiji bubize musingi gwa wiza mu ngelo yahaya kwiza, babudime bupanga butushila.

²⁰ Bebe Timoteo, ilindage iyo wabikijiwa, iligage kalungalungile ka nyachiluchilu na ka dalali, na buhalaliji wa bumani wa si ubukuhayiwagwa mu bumama;

²¹ Ubo bangi, iki babuzunije, bahubaga mu kuzunya. Kigongo kibize na bebe. Amina.