1 Timoteo 5 - Ilagano Ipya Lya

Ya kungunana nomeji mu nimo gwakwe

¹ Utizunghama namahala na bukali, aliyo unganikile giti so; a basumba nabo giti bana bangʼwingʼwe;

² A bagikulu nabo giti banoko; na a bashike giti balumbuyo, mu wela bose.

³ Bakujage bachilwa abali bachilwa gete.

⁴ Aliyo ulu nchilwa ose ali na bana nulu bizukulu, bilange tame i nhungwa ya kuzunya mu kaya jabo, na kubakuulila babyaji babo: iki gwene gwa wiza hangi guntogile Mulungu.

⁵ Aliyo nchilwa gete, uwalekwa wiyene, uyo watuula ho kwisagilwa kwakwe muli Mulungu, hangi akushingaga mu kudaya na kulomba limi na bujiku.

⁶ Aliyo uyo akwikalaga mu kwiyeja ngʼwenekele achile aho atali mpanga.

⁷ Mihayo iyi ubalagile babize batusuchiwa.

⁸ Aliyo munhu ose ulu atubalinda abo akubasugaga, na kutinda a ba mu kaya yakwe, ngʼwenuyo walemaga u buzunya, hangi ali wa bubi kutinda uyo atinazunya.

⁹ Nchilwa atizandikwa mu bachilwa ulu atali kumala miaka makumi atandatu, walali like wa ngosha umo,

¹⁰ Alikanilwa ali na shitile sha wiza, giki, wali ubalela bana, wali ubegeleja bageni, wali oja mhambala ja bela, wali ubambilija abali mu kuluhiwa, na wali ulondela buli nimo gwa wiza na bukomezu.

¹¹ Aliyo bachilwa abatali bashike uleme kuyandika, iki aho balalemelwa kasugile ka ngʼwa Kristo balatogwa kutolwa,

¹² Bali na nsango iki bukuponya kuzunya kwabo kwa kwandia.

¹³ Na hangi bimanilija kubiza bolo, buyelayela mu manumbanumba, nulu bati bolo bike aliyo bubiza ba kasombandasi na bishatya, bulungalunga iyitindile kuhayiwa.

¹⁴ Kulwa mhayo uyu natogihve giki, bachilwa abati bagikulu batolwe, babyale bana, basuge mihayo ya mu kaya, batizungʼwinha ngʼwanishi i nguno ya kusondagula.

¹⁵ Iki ni haha bamo bamala kugaluka kunondela Shetani.

¹⁶ Nzunya, ngosha nulu nkima, ulu ali na bachilwa, abagunane wei, kanisa itizudidohelwa, aliyo ibagunane bachilwa a bapina.

¹⁷ Banamhala abakusugaga chiza babalwe bigelile kwinhiwa ikujo nghangala ibili, kutinda binhiwe benabo abakutumamaga mu mhayo na mu kulanga.

¹⁸ Iki Shandikwa shuhaya giki, Utizutunga nomo gwa ngʼombe aho ikupandagilaga ngano ha lubuga, na hangi giki, Ntumami igelelilwe mhela yakwe.

¹⁹ Utizuzunya kubulwa kwa namhala numho bigele bakaniji babili nulu badatu.

²⁰ Abo babihije ubahugule mu butongi wa bose, na bangi nabo bogohe.

²¹ Nakulagila bebe mu butongi wa Mulungu na Yesu Kristo na bamalaika basolwa giki, uyite mihayo iyi uti na sololo, utizusolanhya kuntogwa umo kutinda ungi.

²² Utizanguhilija kuntuulila munhu makono, nulu utizubiza na busangi mu shibi sha bangi; wilinde wikale ngʼwela.

²³ Kufuma haha utizungʼwa minzi gwike aliyo ungʼwe minzi ga mizabibu mado kulwa nguno ya nda yako, na kulwa busatusatu ubo uli nabo nghangala ningi.

²⁴ Shibi sha banhu bamo shili hape, shili shangu kulekanyiwa nsango; aliyo bangi shibi shabo shililonga hanuma.

²⁵ Giko hangi na shitile sha wiza sha bamo shigengeleka hape, aliyo ishili chene shitudula kubiswa.