1 Timoteo 4 - Ilagano Ipya Lya

Gitumo ilabiza mu shiku ja ku mhelo

¹ Aliyo Moyo Ngʼwela akuhayaga hape giki, mu shiku ja ku mhelo, bamo balinga mu kuzunya, balalondela mioyo ya bulembalembi, na shilangile sha masamva;

² Balabyulungalunga mu bumama; wiyanguji wabo wagunyiwa giti na chuma kisebu;

³ Balabyubalemeja banhu kutola, hangi balabyubalagila kuleka shiliwa isho Mulungu wali ushisema giki, shanukulwe na kulumba nabo abazunije na abamanile i nghana.

⁴ Iki buli kinhu chose icho Mulungu akakisema chene cha wiza, kiti cha ngilo ulu chanukulwa na kulumba:

⁵ Iki chejiwa na mhayo gwa Mulungu na kulomba.

Iyo ingʼwigelile nomeji kwita

⁶ Ulu ubizukija badugu mihayo iyi, ulabiza ntumami wa wiza wa ngʼwa Yesu Kristo, akulile mu mihayo ya kuzunya na mu kulangwa kwa wiza, uku ukakulondelaga.

⁷ Aliyo ngano ja bubi na ja bagikulu ujileme, aliyo wimanilije mu wela;

⁸ Iki wimaniliji wa mili wene buli na solobo ndo gwike: aliyo wela buli na solobo mu mihayo yose, wisagijiwa bupanga wa haha hangi ubo ubuhaya kubiza ho.

⁹ Uyu gwene mhayo gwa wishigwa, gwigelile kuzunyiwa na banhu bose.

¹⁰ Kulwa nguno iyi twiyumiiija mu kutumama na mu kusondagulwa, iki twangʼwisagilwa Mulungu mpanga, Uyo ali Mpija wa banhu bose, kutinda no wa benabo abazunya.

¹¹ Mihayo iyi uyilagilage na uyilangage.

¹² Munhu ose atizukudalaha busumba wako, aliyo ubize kalolelo ku bazunya mu kahayile na mu kashiminzile, na mu butogwa, na mu kuzunya na mu wela.

¹³ Komelaga mu nimo gwa kusoma, na kuganikila, na kulanga, kushisha naliza.

¹⁴ Utizugumanija ngabo uguli muli bebe, uyo wiinhiwa kulwa kuhangilwa na kutuulihva makono ga banamhala.

¹⁵ Uyikalalwe mihayo iyi, wifunye ko kuyo; kubelela kwako kumanike ku banhu bose.

¹⁶ Wilanghanage ngʼwenekele, hangi mu iyo ukulangaga; komelaga mu mihayo yeniyi, iki ulu wita giko ukwipija ngʼwenekele na abo abakukwigwaga.