1 Timoteo 3 - Ilagano Ipya Lya

Mihayo ya banamhala ba kanisa, na ya binhilija

¹ Uyu gwene mhayo gwa wishigwa, Ulu munhu uhahalila ku bulanghani wa kanisa akukalalagwa nimo gwa wiza.

² Kulwa iyo nanghani shigelile abize munhu uyo atusuchiwa, ngoshi wa nkima umo, ngʼwilindi ngʼwenekele, wa masala madekanu, uyo akushiminzaga wima, ngʼwegeleja wa bageni, ndebeji mu kulanga;

³ Ati nkolwa wa shikoji, ati ntuji wa banhu, ati nyecha; aliyo ali mpolo, ati nyombo, nulu ngʼwikumva wa sabo;

⁴ Uyo akusugaga chiza kaya yakwe, ali na bana banyehelile mu bubyedeku bose;

⁵ (Aliyo ulu munhu atamanile kusuga kaya yakwe ngʼwenekele, akwilinda kinahe i kanisa ya Mulungu?)

⁶ Atizubiza mypa mu kuzunya, akije kudosa na kugwa mu nsango gwa Shetani.

⁷ Hangi shingʼwigelile akanilwe ali wa wiza na abo abali hanze; atizugwa mu kudalahwa na ntego gwa ngʼwa Shetani.

⁸ Na giko binhilija nabo shibigelile babize bikaji ba miso, batizubiza na mihayo ibili, batiyinhile ku shikoji, bati banyecha;

⁹ Abadimile ya kwigeniha ya kuzunya mu wiyanguji wela.

¹⁰ Na abo bagengʼwe tange; huna lulu bamanike giki, bati na kilingo, huna bagutumame nimo gwa winhilija.

¹¹ Giko hangi bakima nabo babize bikaji ba miso, bati basigani, bati bangʼwi ba shikoji, bali bishigwa mu mihayo yose.

¹² Binhilija ba kanisa babize buli munhu ngoshi wa nkima umo, bakusugaga chiza bana babo mu kaya jabo.

¹³ Iki abo abakwinhilijaga chiza, bibegeja butale wa wiza, na bugimu butale mu kuzunya ukuli muli Kristo Yesu.

¹⁴ Mihayo iyi nakwandikila, nisagililwe kwiza kuli bebe wangu;

¹⁵ Aliyo ulu nudila, bebe umane gitumo ibigelile banhu kushiminza mu numba ya Mulungu, i yene kanisa ya Mulungu mpanga, hangi yene ikingi na musingi gwa ya nghana.

¹⁶ Na mhayo uyu gwene guti gwa kuhalalikwa giki, kwigeniha kwa kungʼogoha Mulungu kwene kutale; Mulungu wali wigengelechiwa mu mili, ukanilwa ali ntungilija mu Moyo Ngʼwela, ubonwa na bamalaika, ulomelwa mu bana mahanga, uzunyiwa mu ba mu si, wanukulwa ngʼwigulu ngʼwikujo.