1 Timoteo 2 - Ilagano Ipya Lya

Kulomba, na mihayo ya bagosha na bakima mu kanisa

¹ Kulwa iyi nakomeleja kutinda yose giki, kwikumilija, na kulomba, na kulombela, na kulumba, shitwe kulwa banhu bose;

² Kulwa batemi na kulwa batale bose; twikale bapanga mu mhola na mu bulembezu mu wela bose na bubyedeku.

³ Iki mhayo uyu gwene gwa wiza, guntogile Mulungu Mpija wiswe;

⁴ Uyo atogilwe banhu bose kupijiwa na kushika mo mu kuyitegeleja i nghana.

⁵ Iki Mulungu ngʼwene umo, na nsangija wa Mulungu na banhu nanghwe umo, ngʼwene munhu Kristo Yesu,

⁶ Uwali wiyinha ko ngʼwenekele abize kikomolelo cha ku bose; mhayo uyu gulakanilwa mu makanza gago;

⁷ Ku mhayo uyu naatuulwa ho kubiza nomeji na ntungʼwa (ndihaya nghana muli Kristo, natuhayaga bumama); nangi wa bana mahanga mu kuzunya na mu nghana.

⁸ Kulwa iyi natogilwe bagosha balombe buli ipande lyose, babukije higulya makono mela, bati na bupelanu na halali.

⁹ Na hangi giko bakima bigalile benekele mu shizwalo ishigelile, hamo na bukonu na wibembu; iti mu kushiba nzwili, nulu kuzwala zahabu na lulu, nulu mienda ya mpango no;

¹⁰ Aliyo bigalile na shitile sha kigongo gitumo ibigelile bakima abihaya bangʼogohile Mulungu.

¹¹ Nkima ilange mu buhumuzu na bulyehu bose.

¹² Aliyo natunzunilija nkima kulanga, nulu kunsuga ngosha, aliyo ikale nghumuzu.

¹³ Iki Adamu akabumva tange, hunaho Eva;

¹⁴ Na Adamu walatulemva, aliyo nkima iki wali ulemva akingila mu busobya.

¹⁵ Aliyo alapijiwa mu kubyala bana, ulu bushinga mu kuzunya mu butogwa na wela hamo na wibembu.