1 Timoteo 1 - Ilagano Ipya Lya

Nimo gwa ngʼwa Timoteo mu Efeso

¹ Paulo, ntungʼwa wa ngʼwa Kristo Yesu gitumo kulagila kwa Mulungu Mpija wiswe umo kuli, na kwa Kristo Yesu ngʼwene kwisagilwa kwiswe;

² Kuli Timoteo, ngʼwana wane nghana mu kuzunya; kigongo, na kuchila kigongo na mhola, kufuma kuli Mulungu Siswe na kufuma kuli Kristo Yesu Seba wiswe.

³ Gitumo nali nukukomeleja kushinga mu Efeso, aho nali nuja Makedonia, ubalemeje banhu bamo batizulanga kulanga kungi,

⁴ Nulu batizudima ngano na chandikile cha shibyalilwe ishiti na kushila, ishikwenhaga mabugilijo ga halali, kutinda kuzenjiwa kwa Mulungu ukuli mu kuzunya; itaga giko.

⁵ Aliyo i nguno ya kalagilile ili butogwa ubufumile mu ngholo yape, na wiyanguji wa wiza, na kuzunya ukuti na buhwiganu:

⁶ Bamo bafugije mu mihayo iyi, baligilile ku kahayile ka dalali;

⁷ Batogilwe kubiza balangiba shilagilo; aliyo batitegeleja iyo bakuhayaga, nulu iyo bidimya.

Shilagilo shitatuulilwe ho kulwa batungilija

⁸ Aliyo tumanile giki, shilagilo shene sha wiza, ulu munhu ushitumamila kishilagilo,

⁹ Yamanika giki, shilagilo shitutuulwa ho kulwa munhu ntungilija, aliyo kulwa a ba kitigwa na abatulyehiwa, kulwa abati na ikujo na a ba shibi, kulwa abati bela na abatunamya Mulungu, na kulwa batulaguji ba basabo, na batulaguji ba baninabo, na kulwa babulagi ba banhu,

¹⁰ Na kulwa bajingi na bikenaguji bagosha na bagosha, na kulwa bakwabi ba banhu, na kulwa bamama, na kulwa bitonga bumama, na ulu guli ho mhayo gose gungi uyo ugukuhangijaga kulanga kwa bupanga;

¹¹ Gitumo evangeli ya ikujo ya Mulungu nkumilijiwa umo ili, iyo nubikijiwa nene.

Paulo ulumba no kulwa kigongo cha Seba

¹² Nene nanumba Kristo Yesu Seba wiswe, Uyo akaniguzuhya iki akanibala ndi ngʼwishigwa, unituula mo mu kwinhilija kwakwe;

¹³ U nene uyo kwandia nali ndi ndukaguji wa Mulungu, na nyajanyaja, na nghungu: aliyo naachilwa kigongo, iki nali nita mu butumana na mu butuzunya;

¹⁴ Na kigongo cha Seba wiswe chukwila no kihamo na kuzunya na kutogwa ukuli muli Kristo Yesu.

¹⁵ Uyu gwene mhayo gwa wishigwa, gwigelile kwanukulwa na banhu bose giki, Kristo Yesu akiza mu si kubapija a ba shibi; mu benabo nene nali wa kwandia:

¹⁶ Aliyo naachilwa kigongo, kulwa nguno iyi giki, muli nene u wa kwandia, Yesu Kristo oleche kwiyumilija kose, nabize kalolelo ku benabo abahaya kunzunya Wei kushika mu bupanga butushila.

¹⁷ Na lulu kuli Ntemi wa welelo na welelo, Uyo atakenagukaga, Uyo atabonagwa, Uyo ali Mulungu umo wike, ibize ho kukumilijiwa na ikujo welelo na welelo. Amina.

¹⁸ Kilagilile iki nakwinha bebe, ngʼwana wane Timoteo, gitumo buhangi wali butonga bukuhaya bebe, mu wenubu ulwage kulwa kwa wiza;

¹⁹ Ukumiche kuzunya na wiyanguji wa wiza; mihayo iyi bangi bayiponije kule, butubija kuzunya kwabo:

²⁰ Mu benabo bene Humenayo na Aleksandro; abo nali nabinha kuli Shetani, balangwe kuleka kunduka Mulungu.