1 Batesalonike 5 - Ilagano Ipya Lya

Bazunya bikale batengeke, batizusangwa biyibile

¹ Aliyo mihayo ya makanza na shiku, badugu, muti na nguno nangʼwandikile.

² Iki bingʼwe benekele mumanile nghana giki, lushiku lwa Seba lukwizaga giti ngʼwibi mu bujiku.

³ Iki aho bakuhayaga giki, Mhola na kaholele, ngʼwikanza lyene buyagajiwa bukubifumbukija, giti kulungʼwa busungu kwiza kuli nkima ali nda; nabo batalapuluguka.

⁴ Aliyo bingʼwe badugu, muti mu giiti, lushiku lwenulo lumufumbukije giti ngʼwibi.

⁵ Iki bingʼwe bose muli bana ba isana na bana ba limi; tuti ba bujiku nulu ba giiti;

⁶ Huna lulu tutizulala giti bangi, aliyo twikale miso na ba masala madekanu.

⁷ Iki a balaji bakalalaga bujiku; na bakolwa walwa bakakolagwa bujiku.

⁸ Aliyo biswe abo tuli ba limi, tubize ba masala madekanu, tuzwale lumuda lwa mu kikuba lwa kuzunya na butogwa; na ngofila yiswe ya chuma ibize kwisagilwa kwa bupiji.

⁹ Iki Mulungu atatwitegile tushike mu bupelanu, aliyo tupandike bupiji kulwa Seba wiswe Yesu Kristo.

¹⁰ Uyo waatuchilila biswe giki, nulu tuli miso, nulu tulalile, nahene, tubize bapanga hamo nanghwe.

¹¹ Kulwa iyo ikomelejagi benekele na benekele na ngʼwizenje gitumo mukwitaga.

Iyo Mulungu atogilwe bakwe kwiyita gwa

¹² Aliyo badugu, tutogilwe mubamane abo abakukoyakoyaga kulwa nguno yingʼwe, na abakumusugaga muli Seba, na bakumuganikilaga;

¹³ Mubinhe ishima no mu butogwa kulwa nguno ya milimo yabo. Ikalagi na mhola benekele na benekele.

¹⁴ Hangi badugu, twamukomeleja baganikilagi abali buyagabuyaga, batimbyagi ngholo a bagwa ngholo, badimyagi a bagokolo, iyumilijagi na banhu bose.

¹⁵ Ilanghanagi, munhu ose atizumalila igudi ngʼwiye; aliyo shiku jose kobagi kwiyitila benekele na benekele Shitwa sha wiza, na ku banhu bose.

¹⁶ Yegagi gwa;

¹⁷ Lombagi gwa gwa gwa;

¹⁸ Mu buli mhayo lumbagi: iki hu yene Mulungu atogelilwe muli Kristo Yesu ku bingʼwe.

¹⁹ Mutizunjimya Moyo Ngʼwela;

²⁰ Mutizudalaha mihayo ya buhangi;

²¹ Igemagi mihayo yose; dimagi ya wiza;

²² Ihungagi mu buli mhayo gose gwa bubi.

Kulomba kwa kumalija

²³ Na Mulungu wa mhola ngʼwenekele angʼweje nghana nghana; mioyo yingʼwe na ngholo na mibili shibaladwe mu bushikanu, shiti na kilingo ngʼwikanza lya kwiza kwakwe Seba wiswe Yesu Kristo.

²⁴ Wei ali ngʼwishigwa Uyo waangʼwitana, nanghwe akugwita.

²⁵ Badugu, mutulombele.

²⁶ Bagishagi badugu bose na kubipa kwela.

²⁷ Namulahilila kuli Seba giki, nyaluba iyi isongʼwe ku badugu bose.

²⁸ Kigongo cha Seba wiswe Yesu Kristo kibize hamo ningʼwe. Amina.