1 Batesalonike 4 - Ilagano Ipya Lya

Paulo ubaganikila kushiminza mu wela na mu kwitogwa

¹ Na hangi ya kumalija, badugu, twangʼwikumbilija na kumuganikila muli Seba Yesu giki, gitumo ngʼwiinhiwa na biswe umo shingʼwigelile kushiminza na kunyeja Mulungu, shiminzagi giko, mukwije no.

² Iki mumanile shilagilo isho twaangʼwinha muli Seba Yesu.

³ Iki iyo Mulungu atogilwe yene iyi giki, kwejiwa kwingʼwe, muwihungage bujingi:

⁴ Buli munhu mu bingʼwe amane kugulinda mili gwakwe mu wela na ngʼwikujo,

⁵ Iti mu nghumbu ya kwikumva, giti bana mahanga abatamanile Mulungu;

⁶ Munhu atizunghunga nduguye nulu kungʼwitila kibi mu mhayo gwenuyu: iki Seba ali nghwimi wa njigu mu mihayo yeniyi yose, gitumo hangi twali twandia kumuwila na kumubugula.

⁷ Iki Mulungu atatwitanilile mu busoso aliyo ku wela.

⁸ Kulwa iyo uyo akulemaga, atunemaga munhu aliyo akunemaga Mulungu, Uyo waangʼwinha bingʼwe Moyo Ngʼwela wakwe.

⁹ Hangi i mihayo ya kubatogwa badugu, muti na nguno nangʼwandikile: iki bingʼwe benekele ngʼwalangwa na Mulungu kwitogwa.

¹⁰ Iki nghana mhayo gwenuyu mukubitilaga badugu bose abali mu Makedonia yose. Aliyo twangʼwikumbilija, badugu, ngʼongeje no;

¹¹ Hangi komelagi no kulembela, na kwita milimo yingʼwe, na kutumama milimo na makono gingʼwe benekele, gitumo twali twamulagila;

¹² Giki, mushiminze mu butengeke mu butongi wabo abali hanze, mubize muti na kugayiwa kose.

Kushoka kwa ngʼwa Yesu

¹³ Aliyo badugu, tutatogilwe bingʼwe kwikala mutamanile mihayo ya benabo abalalaga; mutizita ilundu gitumo bali abati na kwisagilwa.

¹⁴ Iki ulu tuzunya giki, Yesu akacha na hangi ujuka, giko hangi na benabo abalalaga muli Yesu, Mulungu alabenha hamo nanghwe.

¹⁵ Iki twamuwila yeniyi kulwa mhayo gwa Seba giki, biswe abo tuli bapanga, abo tulasagila kushisha kwiza kwa Seba tutalabatanga abo bamala kulala.

¹⁶ Iki Seba ngʼwenekele alika kufuma ngʼwigulu na kuhamuka kutale, na ilaka lya malaika ntale, na ipembe lya Mulungu: nabo abali bachila muli Kristo balajuka tange;

¹⁷ Hunaho biswe aba tuli bapanga, abo twasagila, tulahwehulwa kutwalwa kihamo nabo mu malunde kulumana na Seba higulya: na giko tulabiza hamo na Seba welelo na welelo.

¹⁸ Kulwa iyo ilungujagi benekele na benekele na mihayo iyi.