1 Batesalonike 2 - Ilagano Ipya Lya

Paulo umo wali mu Thesalonika

¹ Iki bingʼwe benekele, badugu, mukumanile kwingila kwiswe ku bingʼwe giki, kwali kutubiza kwa dalali:

² Aliyo aho twali twamala kunyajanyajiwa kwandia na kwilambagulilwa mu Filipi, gitumo mumanile, nahene twali na bugimu muli Mulungu wiswe kuyihaya evangeli ya Mulungu ku bingʼwe mu kwilwilila kwingi.

³ Iki buganikiji wiswe buti wa kijimija, nulu wa busoso, nulu wa nyasalasala:

⁴ Aliyo gitumo twali tubona kuzunilijiwa na Mulungu kubiza basanyiwa kuyitumamila evangeli, i chene tukuhayaga; iti giki, tuli bayeja ba banhu aliyo ba Mulungu Uyo akujigemaga ngholo jiswe.

⁵ Iki twali tutinatumamila mihayo ya kugimbilija na kamo yaya, gitumo mumanile, nulu ya ikundikijo lya kwikumva shikolo: Mulungu ali nkaniji;

⁶ Nulu twali tutukoba ikujo ku banhu, nulu ku bingʼwe nulu ku bangi yaya, aho twali twabiza na budula kumuhehenaja giti batungʼwa ba ngʼwa Kristo.

⁷ Aliyo twali tubiza bafula ku bingʼwe, gitumo neji akubatogagwa na akubalindaga bana bakwe:

⁸ Giko hangi, iki twali twamukumbula na butogwa no, tuyejiwa no kungʼwinha, iti evangeli ya Mulungu gwike, aliyo hangi na bupanga wiswe pye, iki bingʼwe ngʼwaabiza batogwa ku biswe.

⁹ Iki bingʼwe badugu, mukwizukagwa kutumama kwiswe kwa bunoge na makoye: iki twali tutumama milimo limi na bujiku, giki, tutizunubyalubya munhu ose mu bingʼwe, giko twali tumulomela evangeli ya Mulungu.

¹⁰ Bingʼwe muli bakaniji nu Mulungu nu Ngʼwene, gitumo twali tushiminza mu bingʼwe abazunya, mu wela na mu butungilija na mu kikalile akati na kilingo;

¹¹ Gitumo mumanile umo tunganikila buli munhu ose ku bingʼwe gitumo sabo akuganikilaga bana bakwe, na kumutimbya ngholo, na kumukanila;

¹² Giki, mushiminze gitumo shingʼwigelelilwe kuli Mulungu, Uyo waangʼwitana kwingila mu butemi wakwe na ngʼwikujo lyakwe.

¹³ Kulwa nguno iyi hangi, tukunumbaga Mulungu gwa, iki aho ngʼugwanukula mhayo gwa Mulungu uyo ngʼugwigwa ku biswe, ngʼwali mutugwanukula giti mhayo gwa banhu, aliyo gitumo nghana guli, mhayo gwa Mulungu, ugukwitaga mu bingʼwe abazunya.

¹⁴ Iki bingʼwe badugu, ngʼwaabiza balondeji ba kanisa ja Mulungu ijili mu Buyudaya muli Kristo Yesu: iki ningʼwe ngʼwali ngʼuluhiwa na banhu ba ihanga lyingʼwe gitumo boi bali buluhiwa na Bayudaya;

¹⁵ Abo bali bumulaga Seba Yesu, na bahangi, na butuyunjayunja biswe, batanyejaga Mulungu, hangi bati na busangi na banhu bose;

¹⁶ Butulemeja kubatambulila bana mahanga bapijiwe; bokalilija shibi shabo gwa; aliyo nu bupelanu washikile kubo kushisha kokala pa.

¹⁷ Aliyo biswe, badugu, aho twaalekana na bingʼwe ikanza ido mu mili, aliyo iti mu ngholo, twali tujangila na nghumbu nhale kumubona bushu wingʼwe;

¹⁸ Kulwa iyo twali tutogilwe kwiza ku bingʼwe, u nene Paulo, iti kamo nulu kabili yaya, aliyo Shetani utuhangija.

¹⁹ Iki kwisagilwa kwiswe, nulu buyegi, nulu ngikili ya kwikumilija kwiswe ni ki? Iti bingʼwe mu miso ga Seba wiswe Yesu aho aliza?

²⁰ Iki bingʼwe muli ikujo lyiswe na buyegi wiswe.