1 Bakolinto 9 - Ilagano Ipya Lya

Ntumami wigelelilwe mhela yakwe

¹ Angu, nene nati ntungʼwa? nene nati ngʼwana wa banhu? nene natamonile Yesu Kristo Seba wiswe? bingʼwe muti milimo yane muli Seba?

² Ulu nati ntungʼwa ku bangi, nahene ku bingʼwe ndi ntungʼwa; iki bingʼwe muli kimanikijo cha butungʼwa wane muli Seba.

³ Kwitolongola kwane ku benabo abalinilekanya kuli giki,

⁴ Angu, biswe tuti na budula kulya na kungʼwa?

⁵ Angu, biswe tuti na budula kuntwala hamo niswe nke uyo ali ndugu mu kuzunya, gitumo bakwitaga a batungʼwa bangi, na bana ba ngʼwawe ba Seba, na Kefa?

⁶ Nulu hamo nene wike na Barnabas tuti na budula wa kuleka kwita milimo?

⁷ Nshilikale nani akujaga ku bulugu na kwilisha ngʼwenekele? Nani akulimaga ngunda gwa mizabibu, nanghwe atalyaga ku matwajo gago? Nulu nani akudimaga idale, nanghwe atangʼwaga ku mabele ga idale?

⁸ Himba nalungalunga mihayo yeniyi ki-munhu duhu nulu shilagilo nasho shituhayaga chene?

⁹ Iki gwaandikwa mu shilagilo sha ngʼwa Musa giki, Utalizutunga nomo gwa ngʼombe aho ikupandagilaga busiga. Himba Mulungu ajikalalilwe ngʼombe?

¹⁰ Nulu uguhaya kulwa nguno yiswe gete? Ali chene, gwaandikwa kulwa nguno yiswe, giki, uyo akulimaga alime mu kwisagilwa, na uyo akutulaga busiga, atule mu kwisagilwa kwa kupandika ya kwisagilwa kwakwe.

¹¹ Ulu biswe twamubibilile sha ki-moyo, guli mhayo ntale lulu ulu tulashigesa shinhu shingʼwe sha ki-mili?

¹² Ulu bangi bali na budula ubu ku bingʼwe, angu, itigelile biswe kutinda benabo? Aliyo biswe tutabutumamilaga budula wenubu; aliyo tukiyumilijaga mu yose, tutizuhangija evangeli ya bupiji ya ngʼwa Kristo.

¹³ Mutamanile giki, abo abakatumamaga mu milimo ya mu hekalu bakalyaga sha mu hekalu, na benabo abakinhilijaga ku ngʼwalilo bali na ngabo gwabo mu isho sha ha ngʼwalilo?

¹⁴ Giko hangi na Seba waalagila giki, abo abakalomelaga evangeli ya bupiji, balishiwe mu i sha evangeli ya bupiji. Gitumo Paulo wilecha kulwa evangeli ya bupiji

¹⁵ Aliyo nene natayitumamilaga mihayo yeniyi na hado, hangi natiyandikilile mihayo yeniyi giki, yitwe giko kuli nene: iki ili hambuhambu kuli nene kucha, kutinda munhu ose atizita kubiza dalali kwikumilija kwane.

¹⁶ Iki nene nulu nulomela evangeli ya bupiji, nahene nati nayo ya kwikumiligija; iki ndi nghadikijiwa; nghana nalasangwa ulu natulomela evangeli ya bupiji.

¹⁷ Iki ulu nene nita mhayo uyu kulwa butogwa wane, ndi na mhela; aliyo ulu iti kulwa butogwa wane nalekelwa kalongeje.

¹⁸ Mhela yane ili ki lulu? Ili giki, aho nulomela evangeli ya bupiji, nayite evangeli ya bupiji ya ngʼwa Kristo dalali na mhela yaya, natizushikilija gete budula wane mu evangeli ya bupiji.

¹⁹ Iki nene nulu natasugilwe na munhu ose, nahene niisesehaja ngʼwenekele ku bose, nabapandike bingi kutinda.

²⁰ Hangi ku Bayudaya nubiza giti Nyudaya, nabapandike a Bayudaya; ku abo abasugilwe na shilagilo, nubiza giti nasugilwe na shilagilo, nabapandike abasugilwe na shilagilo;

²¹ Ku abo abati na shilagilo, nubiza giti nati na shilagilo, (iti giki, nati na shilagilo mu butongi wa Mulungu, aliyo ndi mo mu shilagilo sha ngʼwa Kristo,) nabapandike abati na shilagilo.

²² Ku bagokolo nubiza giti ngokolo, nabapandike bagokolo. Nabiza wa shimile shose ku banhu bose, giki, mu nzila jose nabapije bamo.

²³ Nakwitaga yeniyi kulwa nguno ya evangeli ya bupiji, nabize na nsangiji muyo.

²⁴ Mutamanile giki, abakapelaga mu kwishiganilwa, kupela bakapelaga bose, aliyo uyo wa kwanukula mhela ali umo wike? Pelagi giko, ningʼwe mu-pandike.

²⁵ Buli munhu uyo akugagabalaga kutinda mu mawigusha akilindaga ngʼwenekele mu mihayo yose. Benabo lulu bakitaga giko, banukule ngikili ya butindi nghenaguku, aliyo biswe iyo iyiti nghenaguku.

²⁶ Kulwa iyo nene nakapelaga giko, iti mu kwihulahuja; nakutimbagulaga iti giti uyo akuyitimbagulaga miuyi,

²⁷ Aliyo nakugutulagulaga mili gwane na kugusesehaja, itizubiza aho namalaga kubalomela bangi hanuma u nene ngʼwenekele nabize nahagwe.