1 Bakolinto 8 - Ilagano Ipya Lya

Bazunya bilanghane, baleme kubapamya badugu muli Kristo

¹ Mihayo ya ku shinhu isho shufunyiwa ku shikolile sha kulamiwa ili giki, tumanile biswe bose tuli nabo bumani: bumani bukenhaga budoshi, aliyo butogwa bukuzenjaga.

² Munhu ose ulu wiganika giki, amanile mhayo, atamanile mhayo nulu gumo gitumo shingʼwigelile kugumana.

³ Aliyo munhu ose ulu untogwa Mulungu, ngʼwenuyo wamanagwa nanghwe.

⁴ I mihayo ya kulya isho shufunyiwa ku shikolile sha kulamiwa, tumanile giki, chikolile cha kulamiwa kiti kinhu mu si, hangi giki, ati ho Mulungu ungi aliyo umo wike.

⁵ Iki nulu bali ho abitanwa bamulungu, nulu ngʼwigulu nulu mu si, gitumo bali ho bamulungu bingi na baseba bingi;

⁶ Aliyo ku biswe ali ho Mulungu umo, Ngʼwene Siswe, muli Wei shufumila shinhu shose, na biswe kuli Wei; hangi ali ho Seba umo, Ngʼwene Yesu Kristo, Uyo shinhu shose shili ho kulwa budula wakwe, na biswe kulwa budula wakwe.

⁷ Aliyo bumani ubu buti mo mu banhu bose: aliyo bamo kulava kumanila chikolile cha kulamiwa kushisha haha, bakulyaga giti kili kinhu chufunyiwa ku chikolile cha kulamiwa, na wiyanguji wabo iki buli bugokolo, busosohajiwa.

⁸ Aliyo shiliwa shitutubelejaga kuli Mulungu; iki nulu tulya, nahene tutongejaga kubelela, nulu ulu tutulyaga nahene tutugehejiwa kinhu.

⁹ Aliyo ilanghanagi budula wingʼwe ubu butizubiza mhayo gwa kwipamya ku bagokolo.

¹⁰ Iki ulu munhu ukubona bebe uyo uli na bumani wigashije ku shiliwa mu hekalu ya shikolile sha kulamiwa, wiyanguji wa ngʼwenuyo iki all ngokolo, angu, butuzengwa kulya isho shufunyiwa ku shikolile sha kulamiwa?

¹¹ Huna lulu ngokolo ngʼwenuyo akuyagala kulwa bumani wako, nanghwe ndugu uyo Kristo waanchilila.

¹² Aliyo giko, iki mukasobaja giko ku badugu, na kubusatya wiyanguji wabo ubuli bugokolo, mukusobaja kuli Kristo.

¹³ Kulwa iyo ulu shiliwa shungʼwipamya ndugu wane, natalalya nyama na hado kushisha welelo na welelo, natizungʼwipamya ndugu wane.