1 Bakolinto 7 - Ilagano Ipya Lya

Mihayo ya kwitola na ya kulekana

¹ Mihayo yeniyo ngʼwanandikilile ili giki, ili ya wiza kuli ngosha nulu kunkuumya nkima yaya.

² Aliyo kulwa kuwihunga bujingi, buli ngosha abize na nke wakwe ngʼwenekele, na buli nkima abize na ngoshi wakwe ngʼwenekele.

³ U ngosha angʼwinhage nke wakwe iyo ingʼwigelelilwe, giko hangi nkima nanghwe ite kuli ngoshi wakwe.

⁴ Nkima ati na busugi ku mili gwakwe ngʼwenekele, aliyo ngoshi wakwe; giko hangi ngosha nanghwe ati na busugi ku mili gwakwe ngʼwenekele, aliyo nke wakwe.

⁵ Mutiyimage benekele na benekele, ulu iti kulwa kulagana ikanza, mubize na ngʼwanya gwa kudila nzala na kulomba, nahene; na mushoke kubiza hamo hangi, Shetani atizumugema kulwa kulema kwilinda kwingʼwe.

⁶ Aliyo mhayo uyo nahaya gwa kuzunilija, guti gwa kilagilo.

⁷ Iki ni natogwa banhu bose kubiza gitumo ndi nene. Aliyo buli munhu ali na cha kwinhiwa chakwe cha ngʼwenekele kufuma kuli Mulungu, umo kingi na ungi kingi.

⁸ Aliyo ku abo abatatolile na ku bachilwa, nahaya giki, Ili ya wiza kubo ulu bikala gitumo ndi nene.

⁹ Aliyo ulu bati na kwilinda, bitole; iki ili hambuhambu kwitola kutinda kubaka moto.

¹⁰ Aliyo abatoleke nabakomeleja, nulu iti nene, aliyo Seba giki, Nkima atizulekana na ngoshi wakwe.

¹¹ Aliyo ulu ulekana, ikale na kutolwa yaya, nulu azunye kwisangija na ngoshi wakwe; hangi ngosha atizuneka nke wakwe.

¹² Aliyo a bangi nabawila nene, iti Seba, giki, Ndugu ose ulu ali na nke ati nzunya, na nkima ngʼwenuyo uzunya kwikala hamo nanghwe, atizuneka nke.

¹³ Hangi na nkima uyo ali na ngoshi ati nzunya, na ngosha ngʼwenuyo uzunya kwikala nanghwe, atizuneka ngoshi.

¹⁴ Iki ngoshi ati nzunya wejiwa muli nke wakwe, na nke ati nzunya wejiwa muli ngoshi wakwe; ulu ni iti giko, bana bingʼwe ni bali basoso; aliyo haha bali bela.

¹⁵ Aliyo uyo ati nzunya ulu ulekana, nahene alekane; ndugu ngosha nulu ndugu nkima ati ntungwa mu mihayo giti iyo; aliyo Mulungu waatwitanila mu mhola?

¹⁶ Iki bebe nkima, umanile kinahe, hamo ukumpija ngoshi wako? nulu bebe ngosha, umanile kinahe, hamo ukumpija nke wako?

¹⁷ Gwike gitumo Seba wangabilile buli munhu, chene gitumo Mulungu waangʼwitanila, ashiminzage giko. Hangi nakabalagilaga giko mu kanisa jose.

¹⁸ Munhu ose ulu wiitanwa asalilwe, atiziyita kubiza giti atasalilwe. Munhu ose ulu wiitanwa atasalilwe, atizusalwa.

¹⁹ Kusalwa kuti mhayo, na butusalwa buti mhayo; aliyo kushidima shilagilo sha Mulungu.

²⁰ Buli munhu ikalage mu kitanilwe ako wiitanilwa mo.

²¹ Bebe ulu wiitanwa uli nsese, utiganiligijage mhayo uyo; aliyo na kudula ulu wadula kutungulilwa kubiza ngʼwana wa banhu, hambuhambu uyitumamile.

²² Iki uyo wiitanwa muli Seba ali nsese, ngʼwene ali ntungulilwa wa Seba; giko hangi uyo wiitanwa ali ngʼwana wa banhu, ngʼwene ali nsese wa ngʼwa Kristo.

²³ Bingʼwe ngʼwaagulwa na mpango ntale; mutizubiza basese ba banhu.

²⁴ Badugu, buli munhu ikalage hamo na Mulungu mu kikalile ako wiitanilwa mo.

²⁵ Mihayo ya ku banhya bibembu, nati na kilagilo cha Seba; aliyo nangʼwinha kupima kwane, gitumo nene Seba wiswe akanichila kigongo nabize ngʼwishigwa.

²⁶ Kulwa iyo niganika giki, Ili ya wiza, kulwa nguno ya makoye agali ho agalitugwila, munhu ikale gitumo ali.

²⁷ Waatungwa kuli nkima? utizukoba kutungulilwa. Waatungulwa kuli nkima? utizukoba nkima.

²⁸ Aliyo nulu utola, nahene utitile shibi; na munhya ngʼwibembu ulu utolwa, nanghwe atitile shibi: aliyo abali giko bakubiza na kuluhaluhiwa mu ki-mili; na nene natogilwe kumugugila kigongo.

²⁹ Aliyo nahaya giki, badugu, lyasaga ikanza ido, kufuma haha abo bali na bakima babize giti bati nabo;

³⁰ Nabo abalila shisoji babize giti batulilaga; nabo abayega babize giti batuyegaga; nabo abagula shikolo, babize giti bati na kinhu;

³¹ Nabo abayitumamila si yeniyi, batizuyitumamila kibi; iki mihayo ya si iyi ikubitaga.

³² Aliyo natogilwe bingʼwe mubize muti na kwiganilija. Uyo atatolile akwikoyelaga mihayo ya Seba giki, anyeje Seba kinahe;

³³ Aliyo ngʼwenuyo ntoleke akiganilijaga mihayo ya si iyi giki, anyeje nke wakwe kinahe.

³⁴ Balekanile hangi shike na munhya. Uyo atatolilwe akiganilijaga mihayo ya Seba wiswe, abize ngʼwela mu mili na mu moyo; aliyo uyo atolilwe akiganilijaga mihayo ya si iyi giki, anyeje ngoshi wakwe kinahe.

³⁵ Nahaya iyi kulwa kumugunana; iti giki, namutege ikila yaya, aliyo kulwa iyibelile, mubizuntumamila Seba muti na mapinja.

³⁶ Aliyo munhu ose ulu upima giki, atungʼwitilaga chiza ngʼwana wakwe munhya ngʼwibembu, ulu wakulila bukulu, hangi ulu igelile kubiza chene, nahene, ite gitumo atogilwe, atita shibi: bitolage.

³⁷ Aliyo uyo uhandikila mu ngholo yakwe, na kuhadikijiwa yaya, aliyo ali na budula kusuga iyo atogilwe ngʼwenekele, na waalekana mu ngholo yakwe giki, akuninda ngʼwana wakwe munhya ngʼwibembu, nahene akubeja chiza.

³⁸ Huna lulu uyo ungʼwinha ko ngʼwana wakwe kutolwa, akubeja chiza; aliyo uyo atungʼwinha ko kutolwa, akubeja chiza kutinda.

³⁹ Nkima atungilwe mu shilagilo ikanza lyose aho ngoshi wakwe atali ho mpanga; aliyo ulu ngoshi wakwe ucha, ali ntungulilwa lulu kutolwa na munhu ose uyo antogilwe; aliyo muli Seba gwike.

⁴⁰ Aliyo gitumo napima nene, ali wa lubango kutinda ulu wikala giko; hangi napima giki, nene nane ndi nanghwe Moyo wa Mulungu.