1 Bakolinto 6 - Ilagano Ipya Lya

Bakristo batizibula mu mabanza ga ba mu si

¹ Angu, munhu wa mu bingʼwe, ulu ali na mhayo na ngʼwiye, wagima kinahe kuja kulekanyiwa mu butongi wa bati batungilija, na mu butongi wa bela yaya?

² Himba mutamanile giki, bela balabalekanya nsango ba mu si? na ulu ba mu si balalekanyiwa nsango na bingʼwe, angu, mutigelelilwe kulekanya nulu tumihayo tudo?

³ Mutamanile giki, tulabalekanya nsango bamalaika? tulemelwe kinahe lulu mihayo ya bupanga ubu?

⁴ Nahene, ulu muli nayo mihayo ya kulekanya ya bupanga ubu, batuulagi ho ba kuyilekanya abo abati na ikujo mu kanisa.

⁵ Nahaya iyi ya kumudimya minala. Angu, ili giko mu bingʼwe nghana ati ko munhu wa masala nulu umo yaya, uyo akudula kubuta mihayo ya munhu na nduguye?

⁶ Aliyo ndugu akujaga na nduguye kulekanyiwa, na yeniyi mu butongi wa bati bazunya.

⁷ Nghana haha kilingo kili mo gete mu bingʼwe, iki muli nayo misango benekele na benekele. Hambuhambu muzunye kwitilwa kibi; hambuhambu muzunye kunyekejiwa.

⁸ Aliyo mukwitaga ya bubi na kubanyekeja na yeniyo mukubitilaga badugu bingʼwe.

Mili gulumamilwe kunkuja Mulungu; kushikilija shibi yaya

⁹ Nulu mutamanile giki, abati batungilija batalingila wingiji wa butemi wa Mulungu? Mutizulembalemva; nulu bajingi, nulu balamya shikolile, nulu bashihya, nulu ba kikima, nulu bikenaguji na bagosha,

¹⁰ Nulu bibi, nulu bigongi, nulu bakolwa walwa, nulu bolomya, nulu bataja, batalawingila butemi wa Mulungu yaya.

¹¹ Na bamo ba mu bingʼwe ngʼwali muli chene; aliyo ngʼoojiwa, aliyo ngʼweejiwa, aliyo ngʼwaatungiligijiwa mu lina lya Seba wiswe Yesu Kristo, na muli Moyo wa Mulungu wiswe.

¹² Shose shizuniligije kuli nene, aliyo iti giki, shose shili na bugunani; shose shizuniligije kuli nene, aliyo natuzunya kusugwa na kinhu chose chose.

¹³ Shiliwa shili ho kulwa nda, na nda nayo kulwa shiliwa; aliyo Mulungu alashita kubiza dalali shose, bubili washo, iyo na isho. Aliyo mili guti kulwa bujingi, aliyo kulwa Seba, nanghwe Seba kulwa mili:

¹⁴ Na Mulungu waanjucha Seba wiswe, hangi alatujucha na biswe mu nzila ya budula wakwe.

¹⁵ Mutamanile giki, mibili yingʼwe ili mabudika ga ngʼwa Kristo? Ninje ho lulu mabudika ga ngʼwa Kristo, nagite kubiza mabudika ga ngʼwimilizu? Na hado yaya.

¹⁶ Nulu mutamanile giiti, uyo wadimanyiwa na ngʼwimilizu ngʼwene ali mili gumo nanghwe? Iki Wei wahaya giki, U bubili wabo bakubiza ki-mili kimo.

¹⁷ Aliyo uyo wadimanyiwa na Seba wiswe ngʼwene ali moyo gumo nanghwe.

¹⁸ Bupelagi bujingi. Buli kibi chose icho munhu wita kili kunze ya mili gwakwe; aliyo uyo wita bujingi akwitaga shibi ku mili gwakwe ngʼwenekele.

¹⁹ Nulu mutamanile giki, mili gwingʼwe guli hekalu ya Moyo Ngʼwela, Uyo ali mu bingʼwe. Uyo muli nanghwe kufuma kuli Mulungu? hangi muti ba bingʼwe benekele;

²⁰ Iki ngʼwaagulwa na mpango ntale; nahene nkujagi Mulungu mu mibili yingʼwe, na mu mioyo yingʼwe, i shene shakwe Mulungu.