1 Bakolinto 5 - Ilagano Ipya Lya

Paulo ubaduka iki batampegije uyo ali mu shibi

¹ Nghana ikumukile giki, bujingi buli ho ku bingʼwe; na bujingi wenubu nulu kuhayiwa butahayiwagwa nulu mu bana mahanga, giki, munhu kubiza na nke wa ngʼwa ise.

² Na bingʼwe mulidosa, na kupinihala yaya, giki, injiwe ho mu bingʼwe ngʼwenuyo witile chitile cheniki.

³ Iki nene nghana, nulu nati ko mu mili, nahene ndi ko hamo ningʼwe mu moyo, namalaga kunekanya nsango uyo watumamile chitile cheniki giko, giti ni ndi ko,

⁴ Mu lina lya Seba wiswe Yesu Kristo, bingʼwe aho gnʼwibilinga hamo, na moyo gwane, hamo na budula wa Seba wiswe Yesu Kristo,

⁵ Kungʼwinha ko munhu uyo ali giko kuli Shetani nhungwa ya mili gwakwe ikenagulwe, moyo gwakwe gupijiwe mu lushiku lwa Seba wiswe Yesu.

⁶ Kwikumilija kwingʼwe kuti kwa wiza. Mutamanile giki, kakibimbya kado kakabimbaja mbiiya yose?

⁷ Injagi ho kibimbya cha kale ngʼwele, mubize mbilya mhya, gitumo muti na kibimbya. Iki Pasaka yiswe yaafunyiwa kitambo kulwa biswe, i yene Kristo.

⁸ Huna yene, twite lushiku lutale, iti na kibimbya cha kale, nulu na kibimbya cha isubi na buhunga, aliyo na shiliwa ishitabimbiwe, i sha wiza na nghana.

Bakristo baiizisangija na nzunya uyo atuleka shibi

⁹ Naangʼwandikila bingʼwe mu nyaluba yane giki, mutizisangija na bajingi;

¹⁰ Natuhayaga ya bajingi ba si iyi, nulu bigongi, nulu bataja, nulu balamya ba shikolile; iki ulu ni ili giko ni shigelile kwinga mu si:

¹¹ Aliyo haha, nangʼwandikila bingʼwe giki, mutizisangija hamo na munhu ose uyo akitanagwa ndugu ulu ali njingi, nulu ngʼwigongi, nulu namya wa shikolile, nulu ngʼolomya, nulu nkolwa walwa, nulu ntaja; munhu ali giko, nulu kulya nanghwe yaya.

¹² Iki guli mhayo ki kuli nene kubalekanya nsango benabo ba hanze? angu, mutubalekanyaga nsango benabo ba mugati?

¹³ Aliyo Mulungu akubalekanyaga nsango benabo ba hanze. Ngʼwinjagi munhu uyo nghunga mu bingʼwe.