1 Bakolinto 4 - Ilagano Ipya Lya

Mulungu hu ngʼwene wa kuyipima milimo ya batumami bakwe

¹ Munhu ose atubale biswe giki, tuli batumami ba ngʼwa Kristo, na babikijiwa ba ya kwigeniha ya Mulungu.

² Hangi igongile mu babikijiwa giki, munhu abonwe ali ngʼwishigwa.

³ Aliyo kuli nene guli mhayo ndo ulu nalekanyiwa na bingʼwe, nulu na kalekanije ka ki-munhu, hangi nulu natilekanyaga nene ngʼwenekele.

⁴ Iki natimanaga giki, ndi na kilingo; aliyo natubiza ntungiligijiwa kulwa mhayo uyu: aliyo Uyo wa kunilekanya ngʼwene Seba.

⁵ Kulwa iyo mutizulekanya mhayo gose aho ikanza lyago litali kushika, kushisha Seba aho aliza, Uyo alafumbula ngʼwisana mihayo ya giiti iyo yali ibisile, hangi alagatenda hape maganiko ga mu ngholo; huna lulu buli munhu alabona kukumilijiwa kufuma kuli Mulungu.

Bakorintho bikumilija; batungʼwa bidoheleja

⁶ Mihayo yeniyi, badugu, nayita hubiza kigemelo cha kuli nene na kuli Apolo kulwingʼwe; ngʼwilange mu biswe giki, mutiziganika kukilanya iyo yaandikwa; munhu ose atizudosela muli umo na kundalaha ungi.

⁷ Iki ni nani uyo wakubeja wikilile na ungi? hangi uli na ki icho utanukulile? na ulu waachanukula, ulikumilija giti utachanukulile ni buli?

⁸ Ngʼwamala kwiguta nose, ngʼwamala kusaba, mutemile na kutema biswe tuti ho; ni yabela ulu ni ngʼwatema gete, niswe tuteme hamo ningʼwe.

⁹ Iki niganika giki, Mulungu watolekije biswe a batungʼwa kubiza ba ku bukalikijo, giti banhu abakongʼwa kubulagwa: iki twaabiza cha kwilolelwa ku si, ku bamalaika, na ku banhu.

¹⁰ Biswe tuli bachiluchilu kulwa nguno ya ngʼwa Kristo, aliyo bingʼwe muli balalanghanu muli Kristo; biswe tuli bagokolo, aliyo bingʼwe muli ba nguzu; bingʼwe muli ba ikujo, aliyo biswe tuli badalahwa.

¹¹ Kushisha na kakanza kenaka tuli na butubu, na kukolwa nota, tuli bazuka, tukukundugagwa shingholoshi, na tuti na wikalo wa nghana;

¹² Hangi tukukoyaga tubyutumama na makono giswe. Ulu tolomyiwa, tukusungulilaga lubango; ulu tunyajanyajiwa, tukwiyumilijaga;

¹³ Ulu tusondagulwa, tukwikumbilijaga: twabile giti mapalala ga si, kibugulu cha shinhu shose, na kushisha haha.

Paulo, myaji wabo mu evangeli ya bupiji

¹⁴ Mihayo iyi natandikile kulwa kumudimya minala, aliyo kulwa kumuganikila gitumo bana bane batogwa.

¹⁵ Iki nulu ngʼubiza na balangi ba kihumbi muli Kristo, nahene muti na basingʼwe bingi: iki nene naamubyala bingʼwe muli Kristo Yesu, mu nzila ya evangeli ya bupiji.

¹⁶ Kulwa iyo, nangʼwikumbilija bingʼwe giki, bizagi balondeji bane.

¹⁷ Kulwa mhayo uyu nantumaga Timoteo ku bingʼwe, uyo ali ngʼwana wane ntogwa, na ngʼwishigwa muli Seba, ngʼwenuyo akungʼwizukija bingʼwe shimile shane umo shili muli Kristo, gitumo nakalangaga hose hose mu buli kanisa.

¹⁸ Aliyo bamo bakudosaga, giti natiza ku bingʼwe.

¹⁹ Aliyo nakwiza ku bingʼwe wangu, ulu Seba utogwa; huna kumana nakumana budula wa benabo abalidosa, iti kalungalungile kabo duhu.

²⁰ Iki butemi wa Mulungu buti mu kalungalungile, aliyo mu budula.

²¹ Mutogilwe ki? nize ku bingʼwe na nanga, nulu nize mu butogwa na moyo gwa bupolo?