1 Bakolinto 3 - Ilagano Ipya Lya

Kashiminzile ka ki-mili kakujijaga kukula

¹ Na nene, badugu, nali natudula kulungalunga ku bingʼwe gitumo ku ba ki-moyo, aliyo gitumo ku ba ki-mili; gitumo ku bana belele muli Kristo.

² Nali numungʼwisha mabele, nali natumulisha nyama yaya; iki ngʼwali mutali kushidula; chene nulu haha mutali kushidula;

³ Iki mutali muli ba ki-mili: iki gitumo buli mo mu bingʼwe wilu na buyombo, na kwilekanya, angu, muti ba ki-mili, hangi mukushiminzaga gitumo kili chimile cha ki-munhu?

⁴ Iki aho umo wahaya giki, Nene ndi wa ngʼwa Paulo; na ungi giki, Nene ndi wa ngʼwa Apolo; angu, muti ba ki-mili?

Banhu bali bahambi; Mulungu akuzwishaga

⁵ Ali lulu, Apolo ali nani? na Paulo ali nani? Bali binhilija gwike, abo ngʼwaazunya kulwabo; na buli munhu gitumo Seba waangʼwinha.

⁶ Nene nakahamba, Apolo wisila minzi; aliyo Mulungu ubyukuja.

⁷ Giko lulu, uyo akuhambaga ati kinhu, nulu uyo akwisilaga minzi; aliyo Mulungu Uyo akukujaga.

⁸ Uyo akuhambaga na uyo akwisilaga bali bumo: aliyo buli munhu alinhiwa mhela yakwe ngʼwenekele gitumo milimo yakwe umo yali ili.

⁹ Iki biswe tuli batumami biye ba Mulungu; bingʼwe muli ngunda gwa Mulungu, muli numba ya Mulungu.

Kazengele ka Bakristo na kupingʼwa kwako

¹⁰ Gitumo kigongo cha Mulungu icho niinhiwa, kina ntale wa bazengi wa masala, naagutuula ho musingi gwa numba; na ungi uzengela higulya yago. Aliyo buli munhu ilanghanage gitumo akuzengelaga higulya yago.

¹¹ Iki munhu atudula kutuula ho musingi gungi kuleka uyo gwaatuulwa ho, u gwene Yesu Kristo.

¹² Aliyo ulu munhu ose uzengela higulya ya musingi gwenuyu zahabu, nulu feza, nulu mawe ga mpango ntale, nulu miti, nulu maswa, nulu matindigisi;

¹³ Nimo gwakwe gwa buli munhu guligengelechiwa hape; iki lushiku ulo lulagufumbula, iki gulakundulilwa mu moto; na moto gwenuyo gulagugema nimo gwa b uli munhu, gumanike umo guli.

¹⁴ Nimo gwa munhu ose gwenuyo waaguzengelaga higulya yago, ulu gwikala ho, alinhiwa mhela.

¹⁵ Nimo gwa munhu ose ulu gupemva, alagayiwa; aliyo wei ngʼwenekele alapijiwa; aliyo nahene, giti wapijiwa mu moto.

Bazunya bali hekalu ya Mulungu

¹⁶ Mutamanile giki, bingʼwe muli hekalu ya Mulungu, hangi giki, Moyo wa Mulungu azengile mu bingʼwe?

¹⁷ Munhu ose ulu ukenagula hekalu ya Mulungu, ngʼwenuyo Mulungu akunkenagula; iki hekalu ya Mulungu ili nela, yene bingʼwe.

¹⁸ Munhu atizilembalemba ngʼwenekele. Munhu ose mu bingʼwe ulu wiyiganika ngʼwenekele giki, ali wa masala ngʼwikanza ili, leka ni abizage nchiluchilu, huna abize wa masala.

¹⁹ Iki masala ga si iyi gali buchiluchilu kuli Mulungu. Iki gwaandikwa giki, Wei akubagwashaga ba masala mu masalasala gabo ga benekele:

²⁰ Na hangi giki, Seba agamanile maganiko ga ba masala, giki, gali ga dalali.

²¹ Huna lulu munhu atizikumilija mu banhu; iki shinhu shose shili shingʼwe;

²² Nulu Paulo, nulu Apolo, nulu Kefa, nulu si, nulu bupanga, nulu kucha, nulu isho shili ho, nulu isho shilabiza ho; shose shili shingʼwe;

²³ Na bingʼwe muli ba ngʼwa Kristo; na Kristo ali wa Mulungu.