1 Bakolinto 2 - Ilagano Ipya Lya

Kalomelele ka ngʼwa Paulo mu masala ga Mulungu

¹ Na nene, badugu bane, aho nali niza ku bingʼwe, nali natizile na kalungalungile ka nyagaliligalili nulu ka masala aho numulomela u bukaniji wa Mulungu.

² Iki nali nulekana ngholo yane giki, natizumana mhayo gose mu bingʼwe, ulu iti Yesu Kristo, na Ngʼwenuyo giiti, ukougʼwa.

³ Hangi nali nubiza ko mu bingʼwe mu bugokolo, na mu boba, na mu kudetema kwingi.

⁴ Na kalungalungile kane na kalomelele kane kali kati mu mihayo ya kuhumbula ya masala ga ki-munhu; aliyo kali kali mu kolechiwa kwa Moyo Ngʼwela na kwa budula;

⁵ U kuzunya kwingʼwe kutizubiza mu masala ga banhu, aliyo mu budula wa Mulungu.

⁶ Tukugalungalungaga masala, hene, mu benabo bashikanu; nahene iti masala ga ikanza ili, nulu ga batale ba ikanza ili, abalihaya kwitwa kubiza dalali.

⁷ Aliyo tukugalungalungaga masala ga Mulungu ga mu kwigeniha, agabisile, ayo Mulungu waagatuula ho kale kwikujo lyiswe, aho si yali itali kubiza ho;

⁸ Masala ayo basugi ba ikanza ili bali batagamanile nulu umo; iki ulu ni bali bugamana, ni bali batankomile Seba wa ikujo:

⁹ Aliyo gitumo gwaandikwa giki, Mihayo iyo liso litibonaga, nulu kutu gutayigwaga, nulu itingilaga mu ngholo ya munhu, ya yeniyo yose Mulungu waababegeja abo abantogilwe.

Nimo gwa Moyo Ngʼwela ku bazunya

¹⁰ Aliyo Mulungu waayikundula ku biswe na Moyo wakwe; iki Moyo akakobaga mihayo yose, chene nulu mihayo mishimu ya Mulungu.

¹¹ Iki nani mu banhu ayitegelegije mihayo ya munhu, ulu iti moyo gwa munhu uguli muli wei? giko hangi mihayo ya Mulungu ati ho uyo ayitegelegije, ulu ati Moyo wa Mulungu.

¹² Na biswe tutanukulile moyo gwa si iyi, aliyo Moyo Uyo wa kufuma kuli Mulungu, tuyitegeleje iyo twiinhiwa dalali na Mulungu.

¹³ Nayo yeniyo tukuyilungalungaga, iti mu mihayo iyo ikulangagwa na masala ga ki-munhu, aliyo mu mihayo iyo ikulangagwa na Moyo Ngʼwela; tukuyipimaga mihayo ya ki-moyo mu nzila ya ki-moyo.

¹⁴ Aliyo munhu wa nhungwa ya kimunhu atuyanukulaga mihayo ya Moyo wa Mulungu; iki ili ya buchiluchilu kuli wei; nulu atudula kuyimana, iki yitegelejiwa ki-moyo.

¹⁵ Aliyo uyo ali wa ki-moyo akwitegelejaga yose, nulu wei ngʼwenekele atitegelejiwa na munhu ungi.

¹⁶ Iki nani uyo wali umana iganiko lya Seba, anange? Aliyo biswe tuli nalyo iganiko lya ngʼwa Kristo.