1 Bakolinto 16 - Ilagano Ipya Lya

Kufunya sha kwinha gitumo kuli

¹ Hangi, mihayo ya kasolelegeje kingʼwe kulwa bela ili giki, gitumo nali nulagila kanisa ja Galatia, itagi bingʼwe giko.

² Ha lushiku lwa kwandia lwa mfungo buli munhu mu bingʼwe ashisumbye ku ngʼwakwe, gitumo kwilukilwa kwakwe kuli; giko kutizubiza ho kusoleleja aho naliza.

³ Na aho naliza abo bose mulabashima mu nyaluba jingʼwe, abo bene nalabatuma kutwala sha wila wingʼwe Yerusalemi:

⁴ Na ulu inigelile nene kuja, nahene balaja hamo na nene. Ya kumalija na kubagisha

⁵ Aliyo naliza ku bingʼwe, aho nalamala kubita mu Makedonia; iki nalabita mu Makedonia;

⁶ Hamo nalashinga ku bingʼwe, ali chene hamo nalamala shiku ja mbeho hamo na bingʼwe, bingʼwe munigunane mu lugendo lwane, hose hose aho nalaja.

⁷ Iki natatogilwe kwibona ningʼwe haha nabitile duhu; iki nisagilwa kushinga hamo ningʼwe kakanza, ulu Seba unizunilija.

⁸ Aliyo nalikala mu Efeso kushisha Pentekote;

⁹ Iki nalugulilagwa ho nyango ntale na ngʼwanya gwa kwitila milimo, aliyo bali ho bahangija bingi.

¹⁰ Aliyo Timoteo ulu wiza, ilanghanagi ikale ku bingʼwe ati na boba; iki akatumamaga milimo ya Seba gitumo nakitaga nene:

¹¹ Kulwa iyo munhu ose atizundalaha. Aliyo munshishe mu lugendo lwakwe mu mhola, ize kuli nene; iki nalinolela hamo na badugu.

¹² Hangi mihayo ya ngʼwa Apolo ndugu wiswe, nali nungʼwikumbilija no giki, aje ku bingʼwe hamo na badugu: aliyo wei walatatogilwe kwiza haha, nahene aliza aho alabona ngʼwanya.

¹³ Ikalagi miso, handikilagi mu kuzunya, bizagi bagosha, bizagi ba nguzu.

¹⁴ Mihayo yingʼwe yose yitwe mu butogwa.

¹⁵ Hangi nangʼwikumbilija badugu, (ngʼwimanile numba ya ngʼwa Stefano, giki, ili matwajo ga kwandia ga mu Akaya, nabo biyinha ko ku nimo gwa kubinhilija bela),

¹⁶ Ali lulu balyehelagi abali giko, hangi na buli munhu uyo utumama hamo nabo na kukoya.

¹⁷ Hangi nayega kulwa kwiza kwabo kwa Stefano na Fortunato na Akaiko: iki isho mukalebya kunitila boi bakanishikiligija.

¹⁸ Iki bali bunifuja moyo gwane na mioyo yingʼwe: kulwa iyi bamanagi no abali giti abo.

¹⁹ Ba kanisa ja Asia bamugisha. Akula na Priskila bamugisha no muli Seba, kihamo na kanisa iyili mu numba yabo.

²⁰ Badugu bose bamugisha. Ngʼwigisijage mu kubipa kwela.

²¹ Uku kwene kugisha kwane nene Paulo na nkono gwane gwa ngʼwenekele.

²² Munhu ose ulu atantogilwe Seba Yesu Kristo, azungʼwe. Seba izile.

²³ Kigongo cha Seba wiswe Yesu Kristo kibize hamo ningʼwe.

²⁴ Butogwa wane bubize hamo na bingʼwe bose muli Kristo Yesu. Amina.