1 Bakolinto 15 - Ilagano Ipya Lya

Kucha na kujuka kwa ngʼwa Kristo

¹ Na namumanikija bingʼwe, badugu, evangeli iyo nali namulomela, yene iyo ngʼwali ngʼwiyanukula, mu iyo ngʼwimila;

² Mu yeniyo ngʼwaapijiwa, ulu ngʼwiyumila mihayo iyo nali namulomela ulu iti ngʼwali ngʼuzunya dalali.

³ Iki, nali nangʼwinha bingʼwe kwandia iyo nene nali nanukula giki, Kristo wali ucha kulwa shibi shiswe gitumo Shandikwa shuhaya;

⁴ Na giki, wali ujikwa; na giki, waajuka ha lushiku lwa kadatu gitumo Shandikwa shuhaya;

⁵ Na giki, wali ungʼwilongela Kefa; na hanuma ku benabo ikumi na babili:

⁶ Hanuma ya yeniyo wali ubilongela banhu ba kukila magana atano kihamo, bingi babo batali ho bapanga kushisha haha, aliyo bamo bashutulile;

⁷ Hanuma ungʼwilongela Yakobo; hangi ubilongela batungʼwa bose;

⁸ Na wa kumalija wa bose unilongela nene, giti uyo uwabyalwa aho ikanza lyakwe lyali litali.

⁹ Iki nene ndi ndo mu batungʼwa, natigelile kwitanwa ntungʼwa, iki nali nuyinyajanyaja kanisa ya Mulungu.

¹⁰ Aliyo kulwa kigongo cha Mulungu ndi gitumo ndi: na kigongo chakwe icho nali ninhiwa chali kiti dalali; aliyo nene nubyutumama kutinda abo bose; aliyo iti nene, aliyo kigongo cha Mulungu icho chali hamo na nene.

¹¹ Kulwa iyo nulu nene nulu boi, giko tukulomelaga na giko ngʼwaazunya.

Ulu Kristo atajukile kuzunya kwiswe kuli dalali

¹² Ali lulu, ulu Kristo waalomelwa giki, waajuka mu bafu, ni buli bamo ba mu bingʼwe bakuhayaga giki, Kuduhu kujuka kwa bafu?

¹³ Aliyo kujuka kwa bafu ulu ni kuti ho, nahene Kristo nanghwe ni atajuchiwe:

¹⁴ Na hangi ulu Kristo ni atajuchiwe numho kulomela kwiswe ni kuli dalali, na kuzunya kwingʼwe ni kuli dalali.

¹⁵ Ali chene, na biswe twasangwa tuli bakaniji bamama ba Mulungu; iki twakanila Mulungu giki, waanjucha Kristo: Uyo atanjukije, ulu ili chene, bafu ni batujuchiwa.

¹⁶ Iki bafu ulu ni batujuchiwa nahene Kristo nanghwe ni atajuchiwe:

¹⁷ Na hangi ulu Kristo ni atajuchiwe, kuzunya kwingʼwe ni kuli dalali; bingʼwe mutali mu shibi shingʼwe.

¹⁸ Numho nabo abo abashutulile muli Kristo bajimilile.

¹⁹ Na biswe, ulu tuli na kwisagilwa muli Kristo mu bupanga ubu duhu, tuli bagayiwa kutinda banhu bose.

Kristo waajuka nghana

²⁰ Aliyo hambunyu Kristo waajuka mu bafu, waabiza itwajo lya kwandia lya benabo abakushutulaga.

²¹ Iki kucha kwali kwenhwa na munhu, giko na kujuka kwa bafu kwenhwa na munhu.

²² Iki gitumo muli Adamu bose bakachaga, giko hangi muli Kristo bose balahimbuchiwa kubiza bapanga.

²³ Aliyo buli munhu mu kwihela kwakwe: Kristo i litwajo lya kwandia; hanuma lulu abo abali ba ngʼwa Kristo aho aliza.

²⁴ Hanuma lulu nghalilo, aho alawinha ko butemi kuli Mulungu, Siswe; aho alamala kubujimija busugi bose na budula bose na nguzu jose.

²⁵ Iki shigelile ateme kushisha alabatuula banishi bose hasilili ya bupandijo wakwe.

²⁶ Ngʼwanishi wa kumalija uyo alajimijiwa ngʼwene kucha.

²⁷ Iki giki, waashisugija shinhu shose hasilili ya bupandijo wa magulu gakwe. Aliyo aho uhaya giki, Shinhu shose shaasugijiwa, tumanile giki, atakumbanijiwagwa Ngʼwenuyo ushisugija shinhu shose kuli Wei.

²⁸ Na aho shinhu shose shilasugijiwa kuli Wei, hunaho Ngʼwana nanghwe ngʼwenekele alasugijiwa kuli Ngʼwenuyo uwaashisugija shinhu shose kuli Wei giki, Mulungu abize shose mu shose.

²⁹ Ulu iti chene numho bakwita kinahe lulu abo abali bubatijiwa kulwa bafu, ulu bafu batujuchiwa na hado? kulwa kinahe hali bubatijiwa kulwabo?

³⁰ Na biswe kulwa ki tuli mu kwihiga buli ikanza lyose?

³¹ Ali chene, kulwa kwikumilija kwane uko nali nako muli Kristo Yesu Seba wiswe kulwa bingʼwe, badugu bane, giki, nakuchaga buli lushiku.

³² Nene ulu naalwaga na shinwele mu Efeso, kina shimile sha banhu, cha kunibelela ki ulu bafu batujuka? Nahene tulye na tungʼwe; iki ntondo tukucha.

³³ Mutalembagwe; Kunonia busumba na ba bubi kukabihaja shimile sha wiza.

³⁴ Kangukagi nghana, itagi butungilija, na mutizita shibi: iki bangi batamanile Mulungu. Nahaya iyi kulwa kumudimya minala.

Kujuka gitumo kulabiza

³⁵ Aliyo hamo munhu akuhaya giki. Bafu bajuchiwa kinahe? na mu mili ki biza?

³⁶ Mbuuli bebe, iyo wabiba, itubiza mhanga ulu itachile:

³⁷ Na iyo waabiba, utagubibaga mili ugulabiza ho, aliyo mbeke gwike, hamo ya ngano, nulu hamo yingi nayo:

³⁸ Aliyo Mulungu akwiyinhaga mili gitumo atogelilwe Wei ngʼwenekele, na ku buli mbiyu mili gwayo.

³⁹ Nyama jose jiti nyama imo duhu: aliyo ili ho nyama imo ya banhu, na nyama yingi ya ndimu, na nyama yingi ya noni, na nyama yingi ya ndilo.

⁴⁰ Ili ho hangi mibili ya ngʼwigulu, na mibili ya mu si: aliyo ikujo lya mili gwa ngʼwigulu lili heke, na ikujo lya mili gwa mu si, nalyo heke.

⁴¹ Ikujo lya limi lili heke, na ikujo lya ngʼweji lili heke, na ikujo lya sonda lili heke; iki sonda imo yalekanile na sonda yingi ngʼwikujo lyayo.

⁴² Giko na bujuko wa bafu. Gubiwa mu bubozu; gujuchiwa mu butubola:

⁴³ Gubiwa mu kudalahwa; gujuchiwa ngʼwikujo; gubiwa mu bugokolo; gujuchiwa mu budula:

⁴⁴ Gubiwa mili gwa ki-munhu; gujuchiwa mili gwa ki-moyo. Ulu guli ho mili gwa ki-munhu, guli ho na gwa ki-moyo.

⁴⁵ Giko yaandikwa giki, Munhu wa kwandia, Adamu, ubiza ngholo mhanga; Adamu wa nghalikijo moyo gwa kwinha bupanga.

⁴⁶ Aliyo, gwali gututonga gwa ki-moyo, aliyo gwa ki-munhu; hanuma lulu gwiza gwa ki-moyo.

⁴⁷ Munhu wa kwandia ali wa mu si, wa malongo: munhu wa kabili ali wa ngʼwigulu.

⁴⁸ Gitumo u wa malongo umo ali, na benabo ba malongo bali giko: na gitumo wa ngʼwigulu umo ali, na benabo ba ngʼwigulu bali giko.

⁴⁹ Hangi gitumo twikolanijiwa na chikolile cha ngʼwenuyu wa malongo, giko hangi tulikolanijiwa na chikolile cha ngʼwenuyo wa ngʼwigulu.

⁵⁰ Nalihaya iyi giki, badugu, i nyama na mininga shitudula kuwingila butemi wa Mulungu, nulu bubozu kuwingila butubola. Kucha kulapyenwa na kujuka

⁵¹ Lolagi, namuwila mhayo gwa kwigeniha, giki, tutalashutula bose, aliyo bose tulalujiwa,

⁵² Mu kakanza kado, mu kukabya ngohe, mu kakanza ka ipembe lya kumalija: iki ipembe lilalila, na bafu balajuka mu butubola, na biswe tulalujiwa.

⁵³ Iki mili gwenuyu gwa bubozu gwigelile guzwale butubola; na uyu gwa kucha guzwale butucha.

⁵⁴ Kulwa iyi mili gwenuyu gwa bubozu aho gulazwala butubola, na gwenuyu gwa kucha gulazwala butucha, hunaho gulashikilijiwa mhayo uyo gwaandikwa giki, Kucha kwakwelelagwa na Kupyena.

⁵⁵ Ee Kucha, kupyena kwako kuli hali? Ee Kucha, lubola lwako luli he?

⁵⁶ Lubola lwa kucha lwene shibi; na nguzu ja shibi jene shilagilo.

⁵⁷ Aliyo Mulungu akumilijiwe uwaatwinha kupyena kulwa Seba wiswe Yesu Kristo.

⁵⁸ Kulwa iyo badugu bane batogwa, lambagi, mutizunegenyiwa, ngʼongejage no shiku jose mu milimo ya Seba, iki mumanile giki, butumami wingʼwe buti wa dalali muli Seba.