1 Bakolinto 14 - Ilagano Ipya Lya

Kulomela nimo ntale kutinda kulungalunga na ndimi

¹ Londelagi butogwa; hangi igongagi no sha kwinhiwa sha ki-moyo, aliyo kutinda yose mulomele.

² Iki uyo akulungalungaga mu lulimi atalungalungaga na banhu, aliyo na Mulungu; iki ati ho munhu uyo akwigwaga; aliyo mu moyo akulungalungaga mihayo ya kwigeniha.

³ Aliyo uyo akulomelaga akulungalungaga na banhu mihayo ya kubazenja, na ya kubatimbya ngholo, na ya kubalunguja.

⁴ Uyo akulungalungaga mu lulimi akwizenjaga ngʼwenekele; aliyo uyo akulomelaga akuyizenjaga kanisa.

⁵ Nene natogilwe bingʼwe bose ulu ni ngʼwalungalunga mu ndimi, aliyo kutinda no ulu ni ngʼwalomela: iki uyo akulomelaga antindile butale uyo akulungalungaga mu ndimi, numho ashomeleje, kanisa ibone kuzenjiwa.

⁶ Ali lulu, badugu bane, nene ulu niza ku bingʼwe nulungalunga mu ndimi, nakumubelela ki, ulu natumulungalungila mu nzila ya kukundulwa, nulu ya bumani, nulu ya kulomela, nulu ya kulanga?

⁷ Hangi shinhu ishiti na bupanga shikalilaga, giti filimbi nulu kita, ulu shitulekanya malaka, likumanwa kinahe ilaka ki ilo lilifulwa nidu ilo lilitulwa?

⁸ Iki ipembe ulu lyulila buyagabuyaga, nani akumalila ku bulugu?

⁹ Giko hangi na bingʼwe, ulu mutulungalungaga na lulimi mihayo ili hape kwitegelejiwa, ikumanwa kinahe iyo ilihayiwa? iki mukulungalungilaga ku nyaga duhu.

¹⁰ Hamo gali ho mu si malaka ga mbika ningi, na liti ho nulu limo iliti na makulu.

¹¹ Kulwa iyo, nene ulu natamanile makulu ga ilaka, nakubiza muna mahanga kuli uyo alilungalunga; nanghwe alilungalunga akubiza muna mahanga kuli nene.

¹² Giko hangi na bingʼwe, iki muhahalilile no sha kwinhiwa sha ki-moyo, komelagi mubize na ya kuyizenja kanisa.

¹³ Kulwa iyo uyo akulungalungaga mu lulimi lungi, alombe inhiwe kulushomeleja.

¹⁴ Iki ulu nulomba mu lulimi lungi, moyo gwane gukulombaga, aliyo kwitegeleja kwane kuti na matwajo.

¹⁵ Kinahe lulu? nakulomba mu moyo; na hangi nakulomba na kwitegeleja kwane: nakwimba mu moyo, na hangi nakwimba na kwitegeleja kwane.

¹⁶ Iki bebe ulu usungulila lubango mu moyo, uyo igashije kwipande lya batalangilwe aladule kinahe kuzunya Amina aho bebe walumba? iki atitegelegije iyo ukuhayaga.

¹⁷ Iki bebe nghana walumbaga chiza, aliyo ngʼwenuyo ungi atazenjiwe.

¹⁸ Nene nanumba Mulungu wane iki nalungalunga mu ndimi kutinda bingʼwe bose:

¹⁹ Aliyo mu kanisa natogwa kulungalunga mihayo itano na kwitegeleja kwane, nabalange bangi, kutinda kulungalunga mihayo 10,000 mu lulimi lungi.

²⁰ Badugu bane, mutizubiza banigini mu kwitegeleja: aliyo bizagi banigini mu sha bubi, aliyo mu kwitegeleja bizagi banhu bakulile.

²¹ Mu shilagilo yaandikwa giki, na banhu ba ndimi jingi, na milomo ya bageni nakulungalunga na banhu aba aliyo nulu ili giko batalanigwa, uhaya Seba.

²² Kulwa iyo, ndimi jene kalolelo, iti ku bazunya, aliyo ku abatuzunya; aliyo kulomela kuti kulwa benabo abatuzunya, aliyo kulwa bazunya.

²³ Kulwa iyo, ulu kanisa yose yibilingile hamo, na bose ulu bulungalunga mu ndimi, hunaho bingila banhu abatalangilwe, nulu abati a bazunya, angu batuhaya giki, Bingʼwe ngʼwasalaga?

²⁴ Aliyo bose ulu bulomela, na wingila mo munhu uyo utazunije, nulu atalangilwe, ukanilijiwa na bose, ulekanyiwa na bose;

²⁵ Giko ya kwigeniha ya mu ngholo yakwe yifumbula; na giko akugwa achimigije akunamya Mulungu, akutambula giki, Nghana Mulungu ali hamo ningʼwe.

²⁶ Kinahe lulu badugu bane? aho mukwibilingaga hamo, buli munhu ali na zaburi, ali na kalangile, ali na lulimi, ali na kukundulwa, ali na kushomeleja. Mihayo yose yitwe kulwa kwizenja.

²⁷ Munhu ose ulu ulungalunga mu lulimi lungi, balungalunge banhu babili nulu badatu, kukila ho yaya, hangi bibalilwe; na umo ashomeleje;

²⁸ Aliyo nshomeleja ulu ati ho, ahumule mu kanisa; ilunjalunje ngʼwenekele, na kuli Mulungu.

²⁹ Hangi balomeji balungalunge babili nulu badatu, na bangi bakomanye.

³⁰ Aliyo ungi uwigashije haho ulu ukundulilwa mhayo u wa kwandia afulike.

³¹ Iki bingʼwe bose ngʼwadula kulomela, umo umo, banhu bose bilange, na bose balungujiwe.

³² Hangi mioyo ya balomeji ibalyehelile balomeji.

³³ Iki Mulungu ati Mulungu wa buyagabuyaga, aliyo wa mhola, gitumo ili mu makanisa gose ga bela.

³⁴ A bakima bahumule mu kanisa; iki batuzunilijiwa kulungalunga; aliyo babize bigwi, gitumo shilagilo shuhaya.

³⁵ Hangi ulu batogilwe kwilanga mhayo, bababuje bagoshi babo benekele ku kaya: iki ili ya minala nkima kulungalunga mu kanisa.

³⁶ Angu, mhayo gwa Mulungu gwali gufuma ku bingʼwe? nulu gwali gushika ku bingʼwe bike?

³⁷ Munhu ose ulu akwiganika ali nomeji, nulu munhu wa ki-moyo, ayimaniche giki, mihayo iyi nangʼwandikila, yene kilagilo cha Seba.

³⁸ Aliyo munhu ose ulu ali mu butumana, ikale mu butumana.

³⁹ Kulwa iyo, badugu, igongelagi no kulomela, hangi mutizunemeja munhu kulungalunga mu ndimi.

⁴⁰ Mihayo yose yitwe chiza, na mu kwihela.