1 Bakolinto 13 - Ilagano Ipya Lya

Butogwa wa nghana umo buli

¹ Nene nulu nulungalunga na ndimi ja banhu nulu na ja bamalaika, aliyo ulu nati na butogwa, nabizaga giti kalumbete kakulilaga, nulu chuma chape ikikulilaga.

² Hangi nulu nabiza na cha kwinhiwa cha buhangi; nulu namanile mihayo yose ya kwigeniha, na bumani bose; hangi nulu nabiza na kuzunya kose kwa kwinja ho ngulu, aliyo ulu nati na butogwa, nahene nati kinhu.

³ Hangi nulu nagaba shikolo shane shose kubagisha bahabi, nulu niyinha ko mili gwane gupemve moto, aliyo ulu nati na butogwa, cha kunibelela nati nacho.

⁴ Butogwa bukwiyumilijaga, nabo bub na kisa; butogwa butitaga wilu; butogwa butikumilijaga, butadosaga,

⁵ Butogwa butagayaga logohano, butahuhumaga, butasayaga, butatungaga nhungi;

⁶ Butogwa butayegaga mu isho shiti sha butungilija, aliyo bukiiyegelaga nghana;

⁷ Butogwa buchulelile mu yose, bukazunyaga yose, bukisagilagwa yose, bukiyumilijaga yose.

⁸ Butogwa butalaleba ho welelo bose: aliyo nulu bubiza ho buhangi, bulagaya; nulu jabiza ho ndimi, jilafulika; nulu bubiza ho bumani, bulagaya.

⁹ Iki tukwitegelejaga ibudika, hangi tukuhangaga ibudika;

¹⁰ Aliyo iyo ishikanile aho iliza, hunaho lulu, iyi yene ya mabudika ilagaya.

¹¹ Aho nali natali ngʼwana nigini, naalungalungaga giti nigini, niitegelejaga giti nigini, niiganikaga giti nigini; aliyo aho nukula nushileka sha bunigini.

¹² Iki hambunyu tukabonaga giti ngʼwilole, tutabonaga chiza; aliyo mu welelo ubo bushu ku bushu: haha nitegeleja hado, aliyo mu welelo ubo nakwitegeleja gete gitumo nene namanagwa.

¹³ Aliyo haha shikikalaga ho kuzunya, na kwisagilwa, na butogwa, ishi shidatu; aliyo mu shenishi butogwa butindile butale.