1 Bakolinto 12 - Ilagano Ipya Lya

Sha kwinha sha Moyo Ngʼwela

¹ Na ku mihayo ya sha kwinha sha ki-moyo, badugu, natatogilwe bingʼwe ngʼwikale na kumana yaya.

² Mumanile giki, aho ngʼwali muli bana mahanga, ngʼwali ngʼutwalanijiwa ku shikolile sha kulamiwa ishitalungalungaga, hose hose gitumo ngʼwali mutongelwa.

³ Kulwa iyo nangʼwitegeleja giki, ati ho munhu uyo akalungalungaga mu Moyo Ngʼwela wa Mulungu wa kuhaya giki, Yesu azumilwe; hangi ati ho munhu uwadula kuhaya giki, Yesu ali Seba, ulu iti mu Moyo Ngʼwela.

⁴ Kuli ho kulekana kwa sha kwinha, aliyo Moyo ali umo duhu.

⁵ Hangi kuli ho kulekana kwa kinhiligije, aliyo Seba ali umo duhu.

⁶ Na hangi kuli ho kulekana kwa katumamile, aliyo Mulungu ali umo duhu Uyo akashitumamyaga shose mu bose.

⁷ Aliyo buli munhu winhiwa kukundulilwa kwa Moyo, kulwa kubelela kwa bose.

⁸ Iki munhu umo winhiwa na Moyo mhayo gwa masala; na ungi mhayo gwa bumani, gitumo Moyo Ngʼwenuyo atogelilwe;

⁹ Na ungi kuzunya mu Moyo Ngʼwenuyo; na ungi sha kwinha sha kupija balwile mu Moyo Ngʼwenuyo umo;

¹⁰ Na ungi kwita shamahano; na ungi buhangi; na ungi kukomanya mioyo; na ungi ndimi jingi na jingi; na ungi kushomeleja ndimi.

¹¹ Aliyo iyi yose akayitumamyaga Moyo Ngʼwenuyo umo duhu, ugabanya ku buli munhu heke heke, gitumo atogelilwe Wei ngʼwenekele.

Bazunya bati miti gumo aliyo balekanile mu katumamile

¹² Iki gitumo mili guli gumo, nago guli na mabudika mingi, hangi mabudika gose ga mu mili gwenuyo nulu gali mingi, nahene gali mili gumo duhu; giko na Kristo ali chene.

¹³ Iki mu Moyo umo twaabatijiwa biswe bose kwingila mu mili gumo, nulu tuli Bayudaya nulu Bagriki, nulu tuli basese nulu bana ba banhu; na biswe bose twaangʼwishiwa mu Moyo umo.

¹⁴ Iki mili guti ibudika limo, aliyo mabudika mingi.

¹⁵ Kugulu ulu guhaya giki, Iki nene nati nkono, nati gwa mili; angu guti gwa mili lulu?

¹⁶ Nulu kutu ulu guhaya giki, Iki nene nati liso, nati gwa mili; angu guti gwa mili lulu?

¹⁷ Mili gose ulu ni gubiza liso, kwigwa ni kuli hali? mili gose ulu ni gubiza kwigwa, kununghilwa ni kuli he?

¹⁸ Aliyo Mulungu waagatuula mabudika aya mu mili, buli ibudika, gitumo walatogelilwe.

¹⁹ Aliyo mabudika gose ulu ni gali gubiza ibudika limo, mili ni gwabiza he?

²⁰ Aliyo haha, mabudika gali mingi, aliyo mili gumo duhu.

²¹ Na liso Utudula kuguwila nkono giki, Nene natakukalalagwa bebe; hangi nulu ntwe gutudula kugawila magulu giki, Nene natamukalalagwa bingʼwe.

²² Iti chene, aliyo kutinda no mabudika ga mu mili ayo giganikwa gati na nguzu, gene gigongilwe kutinda:

²³ Na mabudika ga mili ayo twiganika giki, gati na ikujo, gene ayo tugakugije kutinda; na mabudika giswe ayo gati ga wiza gene gagalilwa kutinda;

²⁴ Iki mabudika giswe agagalililwe gati na kugayiwa: aliyo Mulungu akagudimanya mili, ibudika ilyagehehva ikujo, lyene lyinhiwa ikujo kutinda;

²⁵ Butizubiza wilemelwa mu mili; aliyo mabudika gose gidilile genekele na genekele.

²⁶ Hangi ibudika limo ulu lyusata, mabudika gose gusata hamo nalyo; nulu ibudika limo ulu lyukujiwa, mabudika gose guyegela hamo nalyo.

²⁷ Giko bingʼwe muli mili gwa ngʼwa Kristo, hangi muli mabudika, buli ibudika ha lwande lwalyo.

²⁸ Mulungu waabatuula ho bangi mu kanisa, ba kwandia batungʼwa, ba kabili bahangi, ba kadatu balangi, hanuma shamahano, hanuma sha kwinhiwa sha kupija balwile, bugunani, na busugi, na ndimi jingi na jingi.

²⁹ Angu bose bali batungʼwa? bose bali bahangi? bose bali balangi? bose bali biti ba shamahano?

³⁰ Bose bali na sha kwinhiwa sha kupija balwile? bose bakalungalungaga na ndimi? bose bakashomelejaga?

³¹ Aliyo shigongelagi no sha kwinhiwa ishili sha wiza kutinda. Na hangi nangʼolekeja nzila ya wiza kutinda.