1 Bakolinto 11 - Ilagano Ipya Lya

Shimile ishibigelile bagosha na bakima mu kanisa

¹ Bizagi balondeji bane, gitumo nu nene ndi nondeji wa ngʼwa Kristo.

² Namukumilija, badugu, iki mukanizukagwa mu mihayo yose; hangi mukadimaga shimile gitumo naangʼwinha bingʼwe.

³ Aliyo natogilwe ngʼwitegeleje giki, ntwe gwa buli ngosha gwene Kristo; na ntwe gwa nkima gwene ngosha: na ntwe gwa ngʼwa Kristo gwene Mulungu.

⁴ Buli ngosha ulu ulomba nulu uhanga, afikigije ntwe gwakwe gukundikijiwe ko, wagudimya minala ntwe gwakwe.

⁵ Aliyo buli nkima ulu ulomba, nulu uhanga, na atazwalile ku ntwe wagudimya minala ntwe gwakwe; iki gwenuyu guli mhayo gumo na kumogwa.

⁶ Iki nkima ulu atafikigije ku ntwe, nahene asunzulwe: aliyo ulu ili minala kuli nkima kusunzulwa nulu kumogwa, afikilagwe ko.

⁷ Iki ngosha shitangʼwigelile kuzwala ngʼwenda ku ntwe, iki wei ali wikolile na Mulungu, na ikujo lya Mulungu; aliyo nkima ali ikujo lya ngosha.

⁸ Iki ngosha atafumile muli nkima; aliyo nkima afumile muli ngosha.

⁹ Iki hangi ngosha walatusengʼwa kulwa nguno ya nkima; aliyo nkima kulwa nguno ya ngosha.

¹⁰ Kulwa mhayo uyu, shingʼwigelile nkima kubiza na kalolelo ka busugwa ku ntwe gwakwe kulwa nguno ya bamalaika.

¹¹ Nahene muli Seba nulu nkima atubiza ho ulu ati ho ngosha, nulu ngosha atubiza ho ulu ati ho nkima.

¹² Iki gitumo nkima wali utuma muli ngosha, giko ngosha nanghwe wabiza ho iki wabyalwa na nkima; aliyo bufumanwa wa shinhu shose shaafuma kuli Mulungu.

¹³ Ilekanyagi bingʼwe benekele: angu, ibelelile nkima kulomba kuli Mulungu na atafikigije ku ntwe?

¹⁴ Kitungilwe chingʼwe chenekele kitumulangaga giki, ngosha ulu ubiza na nzwili ndipu yene minala kuli wei?

¹⁵ Aliyo ulu nkima ali na nzwili ndipu, lyene ikujo lyakwe; iki winhiwa nzwili jakwe kubiza cha kufikija.

¹⁶ Aliyo munhu ose ulu atogilwe kwenha kuhalalila, biswe tuti na shimile ishili giko nulu kanisa ja Mulungu.

Buhubi wa kusangila kwela buhangʼwa

¹⁷ Mu bulagiji wa yeniyi natumukumilijaga iki u kwibilinga kwingʼwe kuti na cha kumubelela, aliyo cha kumubihya.

¹⁸ Iki ya kwandia, nigwile giki, aho ngʼwibilingila mu kanisa, kulekana kuli mo mu bingʼwe; na nene naguzunyazunya hado mhayo uyu.

¹⁹ Iki wisolanya butukija kubiza ho mu bingʼwe, hunaho abo abazunilijiwa bigengeleke ku bingʼwe.

²⁰ Kulwa iyo aho ngʼwibilingila hamo, itudulika kulya sha kulagila sha Seba;

²¹ Iki mu kulya kwingʼwe buli munhu akwandiaga kwinja cha kulagila chakwe ngʼwenekele; na ungi atubile, na ungi akolilwe walwa.

²² Angu, muti na numba ja kulila na ja kungʼwela? Nulu hamo ngʼwadalaha kanisa ya Mulungu, na kubadimya minala abo abati najo? Namuwile kinahe? Angu, namukumilije mu yeniyi? Natumukumilija.

²³ Iki nene naanukula kuli Seba iyo naangʼwinha bingʼwe, giki, Seba Yesu mu bujiku ubo wali winhiwa ko, udima ngati;

²⁴ Aho umala kulumba, ugumeganya, uhaya giki, Uyu gwene mili gwane uguli ho kulwingʼwe; itagi giko kulwa kunizukwa Nene.

²⁵ Giko hangi na kikombe aho bumala kulya, uhaya giki, Kikombe iki kili ilangane ipya mu mininga gane: itagi giko, buli lukangala lose mulangʼwage ko, kulwa kunizukwa Nene.

²⁶ Iki buli aho mukugulyaga ngati uyu, na kungʼwa ku kikombe iki, mulikukumucha kucha kwa Seba kushisha aliza.

²⁷ Kulwa iyo, uyo ose ulu ugulya ngati gwenuyu nulu ukingʼwela kikombe iki cha Seba, gitumo itigelile, akubiza na nsango gwa mili na mininga ga Seba.

²⁸ Aliyo munhu ose igisilije ngʼwenekele, huna lulu agulye ngati, angʼwe ku kikombe.

²⁹ Iki uyu uwalya na ungʼwa gitumo itigelile, akulyaga na akungʼwaga nsango kulwakwe ngʼwenekele, kulwa butukomanya mili gwa Seba.

³⁰ Kulwa nguno ya mhayo uyu hali ko bingi mu bingʼwe abali bagokolo na balwile, na bingi bashutulile.

³¹ Aliyo ulu ni twilekanya chiza biswe benekele, ni tututindwa nsango.

³² Aliyo ulu twalekanyiwa nsango, twatwenyiwa na Seba giki, tutizulekanyiwa nsango kihamo na ba mu si.

³³ Kulwa iyo, badugu bane, aho ngʼwibilinga kulya, ngʼwilindiile.

³⁴ Munhu ose ulu watuba alye ku kaya; mutizibilingila nsango. Na iyasaga ho ulu ndiza nakuyibeja.