1 Bakolinto 10 - Ilagano Ipya Lya

Bazunya bahugulwa na kagwile ka ba Israeli

¹ Badugu, natatogilwe bingʼwe kwikala mutamanile iyi giki, bakulugenji biswe bose bali bali hasilili ya ilunde, na bose bali bubita mu nyanza;

² Na bose bali bubatijiwa kuli Musa ngʼwilunde na mu nyanza;

³ Na bose bali bulya kiliwa icho kimo cha ki-moyo;

⁴ Na bose bali bungʼwa kingʼwiwa icho kimo cha ki-moyo; iki bali bungʼwa ku kiganga cha ki-moyo icho chubyubalondela: na kiganga icho chene Kristo.

⁵ Aliyo bingi babo Mulungu walatuyejiwa nabo; iki bubyumalilwa mu bu.

⁶ Aliyo mihayo yeniyi yabiza mabulolelo ku biswe, giki, tutizubiza bikumva ba sha bubi, gitumo benabo bali bikumva.

⁷ Nulu mutizubiza balamya ba shikolile, giti bamo mubo; gitumo gwaandikwa giki, Banhu bali bigasha kulya na kungʼwa, huna bubuka kubina mbina.

⁸ Nulu tutizita bujingi, gitumo bamo mubo bali bita bujingi, nabo bugwa bucha ku lushiku lumo banhu 23,000.

⁹ Nulu tutizungema Seba, gitumo bamo mubo bakangema, nabo buyagajiwa na mayoka.

¹⁰ Nulu mutizuduguma, gitumo bamo mubo bakaduguma, nabo buyagajiwa na nyagaja.

¹¹ Mihayo yeniyi yali yubagwila benabo kubiza mabulolelo, nayo yaandikwa kulwa kutuhugula biswe aba twapandikwa na bukalikijo wa makanza.

¹² Huna lulu uyo akwiganikaga giki, imilile, ilanghanage atizugwa.

¹³ Mutinadingʼwa na kugengʼwa ulu kuti uko bakagemagwa banhu bose; aliyo Mulungu ali ngʼwishigwa, Wei atuzunilija bingʼwe mugengʼwe na kugengʼwa kwa kumulebya budula wingʼwe; aliyo hamo na kugengʼwa akutuula ho nzila ya kupulugukiia, giko mudule kwiyumilija muko.

Ilemegije kusangila ku meza ya Seba, na ku masamva

¹⁴ Kulwa iyo, batogwa bane, bupelagi bulamya shikolile.

¹⁵ Nalilungalunga giti na banhu ba masala: ipimagi iyo nahaya.

¹⁶ Kikombe cha lubango icho tukukisungulilaga lubango, angu, kiti kusangila kwa mininga ga ngʼwa Kristo? Na ngati uyo tukumeganyaga, angu, guti kusangila kwa mili gwa ngʼwa Kristo?

¹⁷ Iki ngati gwene gumo, biswe aba tuli bingi tuli mili gumo: iki biswe bose tukusangilaga ku ngati gwenuyo gumo.

¹⁸ Balolagi ba Israeli ba mu mili: abo abakalyaga ku shitambo, angu, bati busangi bumo na ngʼwalilo?

¹⁹ Iyo nahaya ili kinahe lulu? himba chikolile cha kulamiwa kili kinhu, nulu icho chufunyiwa ku chikolile cha kulamiwa kili kinhu?

²⁰ Yaya, aliyo nahaya giki, isho bakashifunyaga kubiza shitambo a bana mahanga, bakagafunijaga masamva, iti kuli Mulungu yaya: natatogilwe bingʼwe kubiza ba busangi bumo na masamva.

²¹ Mutudula kungʼwa ku kikombe cha Seba, na ku kikombe cha masamva: mutudula kusangila ku meza ya Seba, na ku meza ya masamva.

²² Hamo twangʼwitya Seba wilu? nulu hamo tuli na nguzu kutinda Wei?

Nzunya shigelile kukoba kumpandikila ngʼwiye

²³ Shose shizuniligije kuli nene, aliyo iti giki, shose shili na bugunani; shose shizuniligije kuli nene, aliyo iti giki, shose shikuzenjaga.

²⁴ Munhu ose atizukoba kwipandikila ngʼwenekele, aliyo akobe kumpandikila ngʼwiye.

²⁵ Shose shikajinjiwagwa mu sokoni, shene lyagi, yaya kubugilija, kulwa nguno ya wiyanguji.

²⁶ Iki si yose ili ya Seba na shiyokagije shayo.

²⁷ Munhu ati nzunya ulu umulalika, ningʼwe ulu mutogilwe kuja ko; shose mukatengelwe lyagi, yaya kubugilija, kulwa nguno ya wiyanguji.

²⁸ Aliyo ulu munhu ose umuwila giki, kinhu iki chali chafunyiwa ku chikolile cha kulamiwa, mutizukilya, kulwa nguno yakwe uyo wakifubola, na kulwa nguno ya wiyanguji; iki si yose ili ya Seba;

²⁹ Nahaya giki, kulwa nguno ya wiyanguji, iti wako, aliyo wa ngʼwa ungi; iki butungulwa wane, bulilekanyiwa nsango na wiyanguji wa ngʼwa ungi ni buli?

³⁰ Iki nene ulu nusangila na kulumba, nadukwe ni buli kulwa nguno ya isho nanumba Mulungu kulwasho?

³¹ Kulwa iyo nulu mukulyaga, nulu mukungʼwaga, nulu mhayo gose uyo mukwitaga, itagi yose kulwa ikujo lya Mulungu.

³² Mutizutuula mhayo gwa kwipamya nulu ku Bayudaya, nulu ku Bagriki, nulu ku kanisa ya Mulungu.

³³ Gitumo nu nene nakubayejaga bose mu mihayo yose, natakobaga solobo yane, aliyo i ya banhu bingi giki, bapijiwe.