1 Bakolinto 1 - Ilagano Ipya Lya

Kugisha kwa ngʼwa Paulo

¹ Paulo, wiitanwa ntungʼwa wa ngʼwa Yesu Kristo, kulwa kutogwa kwa Mulungu, na Sosthene ndugu wiswe,

² Ku Kanisa ya Mulungu iyili mu Korintho, ku aho abeejiwa muli Kristo Yesu, abitanwa bela, kihamo na bose ba mu buli ipande abakulitanaga lina lya Seba wiswe Yesu Kristo, ngʼwene Seba wabo na wiswe:

³ Kigongo kibize ku bingʼwe na mhola kufuma kuli Mulungu Siswe na kuli Seba wiswe Yesu Kristo.

Bulumbi wa ngʼwa Paulo

⁴ Nanumba Mulungu wane ka ka ka kulwa nguno yingʼwe, kulwa kigongo cha Mulungu icho ngʼwiinhiwa muli Kristo Yesu;

⁵ Iki mu buli mhayo ngʼwaasabiwa muli Wei, mu kalungalungile kose na mu bumani bose;

⁶ Gitumo bukaniji wa ngʼwa Kristo waadimyiwa mu bingʼwe:

⁷ Giko lulu mutalebije mu buli cha kwinhiwa chose; mukulindilaga kukundulwa kwa Seba wiswe Yesu Kristo;

⁸ Uyo akumudimya kushisha ku mhelo, mubize muti na buka mu lushiku lwa Seba wiswe Yesu Kristo.

⁹ Mulungu ali ngʼwishigwa, Uyo muli Wei ngʼwiitanwa kushika mu busangi wa Ngʼwana wakwe Yesu Kristo Seba wiswe.

Kwisolanya mu Kanisa ya Korintho

¹⁰ Namukomeleja bingʼwe, badugu bane, mu lina lya Seba wiswe Yesu Kristo, muhaye bose kihayile kimo, na kulekana kose kutizubiza ho mu bingʼwe; aliyo mubize ngʼwisangigije mu kwiganika kumo na mu kulomana kumo.

¹¹ Iki nusombolelwa nghulu jingʼwe, badugu bane, na ba mu kaya ya ngʼwa Kloe giki, buli mo wanishi mu bingʼwe.

¹² Nahaya mhayo uyu giki, buli munhu mu bingʼwe akuhayaga giki, Nene ndi wa ngʼwa Paulo; nene ndi wa ngʼwa Apolo; nene ndi wa ngʼwa Kefa; nene ndi wa ngʼwa Kristo.

¹³ Angu, Kristo walekanyiwa mo? Paulo waakongʼwa kulwingʼwe? Nulu hamo ngʼwaabatijiwa mu lina lya ngʼwa Paulo?

¹⁴ Nanumba Mulungu iki nali natamatigije nulu umo wa mu bingʼwe ulu iti Krispo na Gayo;

¹⁵ Munhu ose atizuhaya giki, naamubatija mu lina lyane.

¹⁶ Na hangi nubabatija ba kaya ya ngʼwa Stefano; a bangi natamanile ulu naamatija munhu ungi.

¹⁷ Iki Kristo atanitumile kubatija, aliyo kulomela evangeli ya bupiji; iti mu masala ga kalungalungile, nsalaba gwa ngʼwa Kristo gutizitwa kubiza dalali.

Kalomelele ka mhayo gwa nsalaba, u gwene budula wa Mulungu

¹⁸ Iki mhayo gwa nsalaba guli gwa buchiluchilu ku abo abakuyagalaga; I aliyo ku biswe aba tukupijiwagwa guli budula wa Mulungu.

¹⁹ Iki gwaandikwa giki, nakujimija masala gabo abali na masala, na kwitegeleja kwabo abali na kwitegeleja nakukwita kubiza dalali.

²⁰ Ali hali u wa masala? all hali u ngʼwandiki? ali hali u nghalali wa ikanza lyenili? Angu, Mulungu walatagitile masala ga si iyi kubiza buchiluchilu?

²¹ Iki ulu mu masala ga Mulungu, si yali itamanile Mulungu mu nzila ya masala gayo, yunyeja Mulungu lulu kubapija abazunya mu nzila ya buchiluchilu wa kulomela.

²² Iki a Bayudaya bakulombaga kimanikijo, na Bagriki bakukobaga masala;

²³ Aliyo biswe tukulomelaga mihayo ya ngʼwa Kristo uwali ukongʼwa, ku Bayudaya ali mhayo gwa kwipamya, na ku Bagriki ali buchiluchilu;

²⁴ Aliyo ku abo biitanwa, nulu Bayudaya nulu Bagriki, Kristo u budula wa Mulungu, na masala ga Mulungu.

²⁵ Iki buchiluchilu wa Mulungu buli na masala kutinda banhu; na bugokolo wa Mulungu buli na nguzu kutinda banhu. Kwikumilija kwa kimunhu kwene dalali kuli Mulungu

²⁶ Iki badugu bane, ngʼwabona kwitanwa kwingʼwe, giki, abitanwa a ba masala ba nhungwa ya ki-mili bati bingi, na ba budula bati bingi, na ba ikujo bati bingi;

²⁷ Aliyo Mulungu waashikoma i sha buchiluchilu sha si, abadimye minala a ba masala; na Mulungu waashikoma shinhu i shigokolo sha si, ashidimye minala isho shili na nguzu;

²⁸ Na shinhu sha si ishiti na ikujo, na shinhu shagayilijiwa Mulungu ushikoma, chene, na shinhu ishiti ho, ashite kubiza dalali shinhu ishili ho;

²⁹ Giki, i shose sha ki-mili shitizikumilija mu miso ga Mulungu.

³⁰ Aliyo kufuma muli Wei bingʼwe muli mo muli Kristo Yesu, Uyo kulwiswe wiitwa kubiza masala kufuma kuli Mulungu, chene butungilija, na wela, na kukomolwa;

³¹ Gitumo gwaandikwa giki, Uyo akwikumilijaga, ikumilije muli Seba.