Luke 24 - Shwe Palaung1 ခေဲင်နှားဆငည်းအူ၊ ခိင်ဇူႈႎါရ်ႈဘြည် ကောန်အီပ်ုန်ကဲ ကိုင်းဟာဝ်းအိုမ်အူရ်ႈငှူရ် ပ်ုန်ရဲန်အူန်းကဲ ပဆံင်ခဴင်ဒီန်။ 2 ကဲဇံင်းဒါဒီဒိုင်း ယိူဝ်း ဂေါႇမိုႈမိူဝ်ႈအူအီးအူကဝ် ပႎဲႈမာဝ်းဒါင်း ပ်ုန်ဘိအူန်းပမိုည်ႇပ္လိုႈဒီန်။ 3 ခိင်ကဲလီပ်ရောတ်ခေဲင်ထံမ်ဆံင်ခဴင်ဒီန် ကဲအာဝ်ယိူဝ်းယာ့် ခန္ဓာတိုပိုင်းစဝ်ဖြား။ 4 ဇိုချီုင်တဂေန်းကဲ တဘည်မိုႈအ်ုန်၊ မိူဝ်ႈဂါရ်အာရ်အီး ဒါဂြူအရော်င်လူည်ဟိူဝ်ကတား ရောတ်ဒေဲႈဇံင်း ရီမ်းပြောကဲ 5 ကောန်အီပ်ုန်ကဲဒီန် ဟောည်ႇကဒိုန်းဖါ်ႈ အံက်ဆီႇကြိုင်းတေဲင်ကတာည်း တိူဝ်ႈကနေဲႈပွံတ်။ မိုႈလိူည် ဂါရ်ဒီန် “ဆေဘာည်းပဲစီဒေဲႈ ဟြီုက်ကဝ်အီဟောည်ႇအီမ် ခေဲင်ထံမ်ဆံင်ခဴင် ဒီအူန်းအီးတတိုအီးယံမ်းနီန်? 6 စဝ်ဖြားယေရှုအာဝ်ဂေါည်ယာ့် ပနီန်။ အ်ုန်ယိူဝ်ႇယံမ်း အဆာက်အ်ုန်ဟည်ႎီရ်အီမ်းဒေဲႈယာ့်။ နောႈလှောႈပ်ုန်က္လာင်းအ်ုန်တပဲ ခိင်ဂေါည်ရူမ်ပဂါလိလဲဒိူန်။ 7 ‘ကဲနံင်အာပ်တိုကောန်စဝ်ဖြား ခေဲင်တည်းတိုအီးမိူဝ်ႈအီုင်ဂ္လံတ်ကဲ။ ကဲနံင်ဟံပ်အ်ုန် တရံင်က္လံပ်တည်း ပျံမ်ယံမ်းအ်ုန်။ မိုႈလိူည် ဆငည်းအိုည် အဆာက်အ်ုန်နံင်ႎီရ်အီမ်းဘိုး။’” 8 ခိင်ဒီန် ကောန်အီပ်ုန်ကဲ ဟည်ႎီရ်နောႈလှူႈ ပ်ုန်က္လာင်းဒါႈအူန်းစဝ်ဖြား 9 ကဲႎီရ်ပွံတ်ဒါႇဆံင်ခဴင်ဒီန် က္လာင်းဘည်မိုႈဘည်ဘာည်း ပည်ဒိုႇဒိုည်ႇ တအီးကဲ ကာည်း သာဝကအူကိူရ်လေႈအူအီးကဲဒီန်။ 10 ကောန်အီပ်ုန်ကဲအီက္လာင်း ဘည်မိုႈဘည်ဘာည်း တသာဝကကဲမိုႈ ကောန်ကီုင်းမာဂဒလ မေရိ၊ ယောဟန္န၊ မာယာကုက် မာရိ ကာည်း ကောန်အီပ်ုန်ဂဲကဲဟံရ် မံင်ခ္လ။ 11 ဂေါႇမိုႈသာဝကကဲနီန် ထာင်ကြောႈပ်ုန်က္လာင်းကောန်အီပ်ုန်ကဲဒီန် အာဝ်မိူဝ်ႈအဓိပ္ပါယ် စီပဲန်ကဲအာဝ်ညှူမ်မ။ 12 မိုႈလိူည် ပေတရုစီယိူဝ်ႇတဘုဟာဝ်း ခေဲင်ထံမ်ဆံင်ခဴင် တိူရ်ႈနှာခေဲင်ဒီန် အ်ုန်ယိူဝ်းလိူည် ဂြူပ်ုန်ကပ်ုရ်အူန်းကဲတစဝ်ဖြား ဆာ်မိုႈခန္ဓာတိုပိုင်း စဝ်ဖြားဒီန် အ်ုန်အာဝ်ယိူဝ်းယာ့်။ ဂေါႇဘည်ဒီန် အ်ုန်အာမ်းလာ်ဒါ ဘည်မိုႈဘည်ပဲန်ဒီန် ႎီရ်ဟာဝ်းပွံတ်တဂါင်။ 13 ဆငည်းဒီန် ခေဲင်တပဲ့တော်စဝ်ဖြားကဲဒီန် အာရ်အီး ယိူဝ်ႇတဂျေရုဆလင် ဟာဝ်းပရဝ်ဧမောက် အီဆငါည်ကပံတ်ပူရ်မဲင်။ 14 ကဲဟာဝ်းဒါကမိုန် ဘည်မိုႈဘည်ပဲန်ဒေဲႈ ဘည်မိုႈစဝ်ဖြား။ 15 ဇိုချီုင်လည်က္လာင်းဂါရ်ဒါဟာဝ်း အူအီးတောအူအီး စဝ်ဖြားဟည်ဇည်းဒါ စွဟာဝ်းရူမ်းတောပ်ဂါရ်။ 16 ဂေါႇမိုစဝ်ဖြားနီန် ရေဲန်မည်ဒဲႈကဲကအာ်မ်းအ်ုန် ကဲဘိူည်ယိူဝ်းအ်ုန်မာ် ကဲအာဝ်ကအာ်မ်းမအ်ုန်။ 17 စဝ်ဖြားစီဆမွံတ် “ဘည်မိုႈဘည်ဘာည်းဆေမိုႈ ပ်ုန်လည်ကမိုန်ပဲဒါဟာဝ်း?” ဂါရ်ဟည်ဇံင်းငါည်ဒဲႇလာ်ဒါ။ 18 ခေဲင်ကဲ ကဝ်အီဇီုဝ် ကလောဖစီဒါႈ စဝ်ဖြား “အီညှံမ်နံပ် ဘည်မိုႈဘည်ပဲန်ဒေဲႈ ခေဲင်ကီုင်းဂျေရုဆလင်နီန် မိူဝ်ႈလိူည်မည်းယာ့်” 19 စဝ်ဖြားစီဆမွံတ် “ဆေအ်ုန်ဘာည်းဒေဲႈ” အ်ုန်စီဒါႈ “ဘည်မိုႈဘည်ပဲန်ဒေဲႈ စဝ်ဖြားယေရှု ကောန်ကီုင်းနာဇရက်ကယ်။ အ်ုန်မိုႈ အာရိယာတိုအီးမှိူမ် ရေဲန်ဒေဲႈ ခံင်အီလှာက်မှိူမ်အာမ်း ကာည်း ဟောက္လာင်းဒဲႈ ကြောႈမံင်ဂလာ ခံင်ပဲန်နောႈပျောကဲနီန်။ တိုအီးကဲမာ် ယိူဝ်းဘည်ဟောက္လာင်းအ်ုန် မိူဝ်ႈအာနုဘော်တဂိုဒါင်း။ 20 မိုႈလိူည် ခြိူဝ်းဒါင်းဇူပုရောဟေက်ဂဲ ကာည်း အီအွံရ်ဂဲ စီတိုည်းအာပ်ဒဲႈအ်ုန် ခေဲင်တည်းကညာအာဏာရောမဂဲ။ ဂေါႇမိုႈကညာအာဏာကဲ ဒဲႈတာမ်ယံမ်းတအ်ုန် စီပဲန်အ်ုန်ကတူႈ ကဲတောက်အ်ုန်ဒါမနား ပျံမ်းယံမ်းအ်ုန် တေဲင်ရံင်က္လံပ်တည်း။ 21 ယဲဘိူည်မောင်အ်ုန်ပဲန် ကဝ်အီနံင်ကဇောည်ဒဲႈ တခြိူဝ်းမျိုးအစ္စရေးယဲပည်ဒိုႇဒိုည်ႇမာ် ကဇေန်နီန် ဘည်ပဲန်ဒေဲႈ ဘည်မိုႈဘည်ဘာည်းနီန် ဟည်မိုႈဘိူန်း အိုည်ဆငည်းယာ့်။ 22 မိုႈလိူည် ကောန်အီပ်ုန်ခေဲင်ယဲ ကဲစဝ်မိူဝ်ႈက္လာင်းခံင်လှာက်တယဲ။ ခိင်ကဲဟာဝ်း ပထံမ်ဆံင်ခဴင်ခီညှာအဒိူဝ်နီန် 23 ကဲအာဝ်ယိူဝ်းမ ခန္ဓာတိုပိုင်းစဝ်ဖြား မိုႈလိူည်ကန်ုမ်ဒေဝါကဲ ရောတ်ဒေဲႈက္လာင်းဒါႈ စဝ်ဖြားဟည်ႎီရ်အီမ်း စီပဲန်ကဲႎီရ်က္လာင်းပွံတ်တယဲ။ 24 တိုအီးခေဲင်ယဲမံင်ခ္လမာ် ဟာဝ်းတိူရ်ႈ မိုႈလိူည်က္လာင်းကောန်အီပ်ုန်ကဲဒီန် ကဲအာဝ်ယိူဝ်းဒေဲႈမခန္ဓာတိုပိုင်းစဝ်ဖြား။” 25 ဟောည်ႇဒီန် စဝ်ဖြားစီဒါႈတကဲ “ဆေဘာည်းစီအာဝ်လှံန်တနောႈပဲ။ ဆေဘာည်းပဲစီဂြဲ ကနာည်နံင်ညှူမ် ပ်ုန်က္လာင်း အာရိယာတိုအီးမှိူမ်ကဲ? 26 ပဲအာဝ်နံပ်မိုႈတ မေရှိယနံင်ဘ်ုပ်ခါမ်ဆဲ့ ကီန်းဒည်းဒုက္ခ အာည်ႇဘိူန်းအ်ုန်တဂိုးတော်အ်ုန်။” 27 ဟောည်ႇဒီန် စဝ်ဖြားစီႎီရ်က္လာင်းနှဲ မောရှေကာည်း အာရိယာတိုအီးမှိူမ်ကဲနီန် တငါဝ်း အိုမ်ကြောႈအဓိပ္ပာယ် ကျာမ်းပ်ုန်ယီုဝ်နှဲအူန်းကဲ ဘည်မိုႈအ်ုန်။ 28 ခိင်ဂါရ်ဟောည်ႇရောတ်ဒံတ် ရဝ်ဒီနံင်ဟာဝ်းဂါရ်ဒီန် ဂါရ်စီယိူဝ်း ပုင်ရံင်စဝ်ဖြားနှေရ်နံင်ဟာဝ်းဒိုင်းဘိုး 29 “ဂါရ်စီဖိက်ပါင်းစဝ်ဖြားဒါႈ ဂေါႇမိုႈဘြည်ဟည်မိုႈနံင်အံပ် ဒ်ုမ်လိူည်တောပ်ယာည်း။” စဝ်ဖြားစီလီပ်ဟာဝ်းတောပ်ဂါရ် ခေဲင်ဂါင် ကနာည်နံင်ဒ်ုမ်ပဒီန်။ 30 ခိင်အံက်ကဲ ကနာည်နံင်ဟောမ်တျံင် စဝ်ဖြားစီဘားကဘ တိူဝ်ႈကနေဲႈဂုင်တော်စဝ်ဖြား။ အ်ုန်စီပဲႈကဘဒီန် ဒဲႈတကဲ။ 31 ဂေါႇမိုႈအ်ုန်ႎိူဝ်ႈဒဲႈ အာရုံငါည်ကဲ ကဲစီကအာ်မ်းလာ့် စဝ်ဖြား။ မိုႈလိူည် စဝ်ဖြားမာ် ဟြာည်းကမာ်ႈပွံတ် ဒါႇငါည်ကဲ အူစာ်န်း။ 32 ကဲမာ် လည်ဒါႈခနားကဲ “ခိင်စဝ်ဖြား ကဘ္လာင်းဆာင်လာင် က္လာင်းအယ်တငါဝ်း ဘည်မိုႈကျာမ်းဒိူန် အာဝ်မိုႈ ခါမ်စာမိုႈတအယ်နံပ် ကမီုတ်ကဆာတ်တအ်ုန်?” 33 ဟောည်ႇဒီန် ကဲယိူဝ်ႇႎီရ်ပွံတ် ပဂျေရုဆလင် အူစာ်န်း ယိူဝ်းပွံတ်သာဝကအူကိူရ်လေႈအူအီးကဲဒီန် ကစုခမိုတောပ် ကဲအီဟံရ်။ 34 ကဲအီကစုခမိုကဲဒီန် က္လာင်းဘည်မိုႈ စဝ်ဖြားဟည်ႎီရ်အီမ်းအခည်း ကာည်း ဘည်ရှိမုင်ဘိူန်းအခွါင်းဂြူပ် စဝ်ဖြားယေရှု တဂါရ်အီရောတ်အာရ်အီးဂါရ်ဒီန်။ 35 ခိင်ဒီန် ဂါရ်အီယိူဝ်ႇတရဝ်ဧမောက်ဒီန်မာ် က္လာင်းဘည်ကတူႈဒေဲႈဂါရ်တောပ်ဒေင် ကာည်း ဘည်နံပ်ကဲတမိုႈယေရှု ခိင်ပဲႈဒဲႈတကဘ။ 36 ဇိုချီုင် တပဲ့တော်ကဲ လည်က္လာင်းတ ဘည်မိုႈဘည်ဘာည်းကဲဒီန် စဝ်ဖြားဟည်လေႈအံက်ခနားကဲ နှဲအရာင်တိုပိုင်း ဒါႈတကဲ “ဒဲႈစဝ်ဖြားကေႎဒဲႈယေန်ငံင် တပဲစိ။” 37 မိုႈလိူည် တပဲ့တော်အ်ုန်ကဲ ကဒိုန်း ကဲထာင်မိုႈ ကဲယိူဝ်းကဘြောဘည်ဒိူန်။ 38 မိုႈလိူည် စဝ်ဖြားစီဒါႈ “ဂေါႇဆေဘာည်းပဲစီယော? ဆေဘာည်းပဲညှူမ်ကလူည်ႇ မိူဝ်ႈသံသရ? 39 တိူရ်ႈ တည်းအော၊ ဇိူင်အော။ စီႇပဲတိူရ်ႈအော။ တကဘြောကဲ အာဝ်မိူဝ်ႈမ ကအာင်၊ ယံင်။ တအောမိုႈဘည်ယိူဝ်းပဲ မိူဝ်ႈကအာင်၊ မိူဝ်ႈယံင်။” 40 အ်ုန်ဟောည်ႇက္လာင်းဘည်ဒီန် အ်ုန်နှဲပွံတ် ဒီဆဝ်း (ဆဲဝ်) မိူဝ်ႈအ်ုန် တတည်းအ်ုန် ကာည်း တဇိူင်အ်ုန်။ 41 တပဲ့အ်ုန်ကဲမာ် ရျံန်ခိုည်းဇာဝ်း အာမ်းကံပ်နှေရ်အာဝ်ညှူမ်။ စဝ်ဖြားစီဆမွံတ်က “ပဲမိူဝ်ႈလာ့် ပ်ုန်ဟောမ်အူမျိုးအူနဲ?” 42 ခိင်ဒီန် ကဲစီဒဲႈ ကားဒံရ်ႈတအ်ုန် အူဒေါန် 43 စဝ်ဖြားမာ် ဒါပွံတ်ရအာည်ႇကဲ။ 44 ဟောည်ႇဒီန် စဝ်ဖြားစီဒါႈ “ဘည်မိုႈဘည်ပဲန်လှေနီန်မိုႈ ဘည်မိုႈဘည်ဘာည်းပ်ုန်က္လာင်းဒေဲႈအောဒါႈ နံင်ပဲန်ဒေဲႈအခည်း တောပ်ဘည်ယီုဝ်နှဲအူန်း ဘည်မိုႈအော ခေဲင်ပံပ်ကျာမ်းဆာလံ၊ ကျာမ်းအာရိယာတိုအီးမှိူမ်ဂဲ ကာည်း ခေဲင်ကျာမ်းမောရှေဂဲကဲနီန်။” 45 ဟောည်ႇဒီန် တပဲ့တော်စဝ်ဖြားကဲ ယီုဝ်နှဲရဒေင် ပနံဝ်းဒဲႈ ကနာည်ဘေဲႇကျာမ်းနီန် လှံန်တနောႈ။ 46 ဟောည်ႇဒီန် ကဒါႈ “ခေဲင်ဘေဲႇကျာမ်းဒါႈ မေရှိယ နီန် ဆာ်ဟောည်ႇခါမ်ကီန်းဒည်းဒုက္ခ အ်ုန်နံင်ႎီရ်အီမ်းဘိုး ဆငည်းအိုည်။ 47 အ်ုန်နံင်ႎီရ်ဟောက္လာင်း တခြိူဝ်းမျိုးဒိုႇဒိုည်ႇ ဇူႈပွံတ်ကီုင်ဂျေရုဆလင် ကနာည်နံင်ဘိူန်းပ်ုန်ပ္လိုတ်ႎါင်းခွါင်းဒဲႈ ကနာည်ကဲအီရေဲန်အီုင်ဂ္လံတ်တောပ်တြားလှေဲႇနောႈကဲနီန်။ 48 ဂေါႇဘည်ဒီန် ပဲမိုႈဆံက်ဆေ ကနာည်ပ်ုန်ပဲန်ဒေဲႈကဲနီန် ပည်ဒိုႇဒိုည်ႇယာ့်။ 49 အောနံင်ပ္လေႈငျာန်တော်ပ္လါင်တပဲ တောပ်ဘည်ကတိပ်ုန်ဒဲႈအူန်းအော တကူန်အော။ ဂေါႇဘည်ဒီန် နှံက်ရဲ့ပကီုင်းဂျေရုဆလင် ဂါအာဝ်ရောတ်အခိင် အာပ်ဒဲႈတဂိုးတော် ယိူဝ်ႇတဆျှိုည်မျို့တော်ဒီန်။” 50 ဟောည်ႇဒီန် စဝ်ဖြားဟည်တောႇတပဲ့တော်အ်ုန်ကဲ စွဟာဝ်းပနှာရိူဝ်ႇကီုင်းဗေသနိ အူဒီ။ ခိင်ရောတ်ကဲတဒီဒီန် အ်ုန်ယိူဝ်ႈတည်းအ်ုန်ဒဲႈ မံင်ဂလာ ကနာည်တပဲ့တော်အ်ုန်ကဲ ပည်ဒိုႇဒိုည်ႇ။ 51 ဟောည်ႇဒီန် စဝ်ဖြားယေရှုဟည်ဒဲႈမံင်ဂလာမှိူမ်မာ် ဟည်စွဟာဝ်း ပဆျှိုည်မျို့တော်။ 52 တပဲ့တော်အ်ုန်ကဲ ဟောည်ႇအံက်ဂြူပ်ဖါ်ႈစဝ်ဖြား ခိုည်းရျံန်လာ်ဒါ ႎီရ်ဟာဝ်းပွံတ် ပကီုင်းဂျေရုဆလင်။ 53 ခိင်ရောတ်ကဲ ပကီုင်းဂျေရုဆလင် ကဲတိူဝ်ႈကနေဲႈပွံတ် ဂုင်တော်စဝ်ဖြား ခေဲင်ဗိမာန်တော် တောန်အခိင်။ |
This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.