Luke 3 - Southern Rakhine1 ရောမဘုရင်ကြီးတိဗေရိရဲ့နန်းသက် ဆယ့်ငါးနှစ်ဟိတဲ့အချိန်မာ ပုန္တိပိလတ်ဟာ ယုဒပြည်ရဲ့ဘုရင်ခံဖြိုက်ပနာ၊ ဟေရုဒ်အန္တိပaဟာ ဂါလိလဲပြည်ကို အုပ်ချုပ်တဲ့လူဖြိုက်တေ။ ဟေရုဒ်အန္တိပရဲ့ညီ ဖိလိပ္ပုဟာ ဣတုရဲပြည်နဲ့ တရာခေါနိတ်ပြည်ကို အုပ်ချုပ်တဲ့လူဖြိုက်ပနာ၊ လုသာနိဟာလည်း အဘိလင်ပြည်ကို အုပ်ချုပ်တဲ့လူဖြိုက်နီကတ်ပြီးကေ 2 အန္နနဲ့ကယာဖရို့ဟာ အကြီးဆုံးပုရောဟိတ်bတိဖြိုက်ကတ်တေ။ ယင်းအချိန်ခါ ဘုရားရှင်ရဲ့နှုတ်ကပတ်တော်ဟာ တောကန္တာရထဲမာနီရေ ဇာခရိရဲ့သား ယောဟန်ပါးကို ရောက်လာခရေ။ 3 ယောဟန်ဟာ ဂျော်ဒန်မြစ်တလျှောက်လုံးမာဟိတဲ့နီရာဒေသအားလုံးကို လှည့်လို့ပတ်လို့လားပနာ လူတိက သူရို့ရဲ့အပြစ်ဒုစရိုက်တိကို နောင်တသံဝေဂရပနာ ခွင့်လွှတ်ခံရဖို့အတွက် ရီနှိုက်မင်္ဂလာခံယူကတ်ဖို့အကြောင်းကို လိုက်လို့ ဟောပြောနီခရေ။ 4 ပရောဖက်ဟေရှာယက သူ့ရဲ့ကျမ်းမာ ယောဟန်အကြောင်းကို ကြိုပနာနိမိတ်ဖတ်ရေးထားခဟာက “တောကန္တာရထဲမှာ တစ်ယောက်ယောက်က အသံအကျယ်ကြီးနဲ့ အော်ပြောဖို့ဟာက ‘အရှင်သခင် ကြွလာဖို့လမ်းကို ပြင်ဆင်ကတ်ပါ။ သူ့ရဲ့လမ်းကို ဖြောင့်ဖြူးစီကတ်ပါ။ 5 တောင်ကြားချိုင့်ဝှမ်းတိုင်းကို မြီဖို့ပနာ တောင်ကုန်း၊ တောင်တန်းတိကို ညီညာစီပါ။ ကောက်နီရေလမ်းတိကို ဖြောင့်အောင် လုပ်ကတ်ပနာ လမ်းကြမ်းတိကို ချောချောမွိ့မွိ့ဖြိုက်အောင် လုပ်ကတ်ပါ။ 6 ယပြီးဟာနဲ့ လူသားအားလုံးဟာ ဘုရားရှင်ရဲ့ ကယ်တင်ခြင်းကို မြင်တွိ့ကတ်ရလိမ့်မေ’” လို့ဖြိုက်တေ။ 7 ယင်းဟာကြောင့် ယောဟန်က သူ့ပါးမှာ ရီနှိုက်မင်္ဂလာcခံဖို့ ရောက်လာခကတ်တေ လူအများကြီးကို “အို အဆိပ်ပြင်းယေ မြွီဆိုးအမျိုးတိd၊ ကျရောက်လာဖို့ ဘုရားရှင်ရဲ့အမျက်ဒေါသကနီ ရှောင်ပြီးကတ်ဖို့ကို အသင်ရို့ကို အသူက သတိပီးခရောင်။ 8 အသင်ရို့နောင်တရကြောင်းကို အလုပ်နဲ့ သက်သီပြကတ်။ အသင်ရို့ကိုယ်အသင်ရို့ ‘အာဗြဟံရဲ့မျိုးဆက်ဖြိုက်လို့ ဘုရားရှင်က ငါရို့ကိုအပြစ်ပီးဖို့မဟုတ်’ ဆိုပနာ ပြောမနီကတ်ကေ့။ အသင်ရို့ကို ငါပြောမေ၊ ဘုရားရှင်က ဒေကျောက်ခဲတိကိုတောင် အာဗြဟံရဲ့ မျိုးဆက်တိအဖြိုက် ဖန်ဆင်းနိုင်ရေ။ 9 eအဂုချိန်မာ ဘုရားရှင်က နောင်တသံဝေဂ မရရေလူတိကို အပြစ်ပီးဖို့ အဆင်သင့်ဟိနီရေ။ ယင်းကြောင့် နောင်တသံဝေဂမရဘဲ ကောင်းယေအရာတိကို မလုပ်တဲ့လူတိုင်းဟာ ဘုရားရှင် ပြစ်တင်ရှုံ့ချဟာကိုခံရပနာ ငရဲမီးထဲကို အပစ်ခံရဖို့” လို့ဆိုခရေ။ 10 ယေခါ လူပရိတ်သတ်တိက ယောဟန်ကို “ယကေ ကျနော်ရို့ အဇာလုပ်သင့်ပါရောင်” လို့ မီးကတ်တေ။ 11 ယောဟန်ကလည်း “အသင်ရို့ထဲက အင်္ကျီနှစ်လုံးဟိတဲ့လူဟာ အင်္ကျီမဟိလူကို တစ်လုံးပီးရဖို့။ မတ်ရို့မှာ အစားအသောက်တိဟိကေလည်း မဟိရေလူတိကို ဒေပိုင်ပဲမျှရဖို့” လို့ ပြန်ဖြေခရေ။ 12 အခွန်ကောက်တေလူတချို့ကလည်း ရီနှိုက်မင်္ဂလာခံယူဖို့ ရောက်လာကတ်ပနာ ယောဟန်ကို “ဆရာ၊ ကျနော်ရို့က ပဇောင်ပိုင် လုပ်သင့်ရောင်” လို့ မီးကတ်တေ။ 13 ယောဟန်က “အသင်ရို့ဟာ အခွန်တိကို သတ်မှတ်ထားဟာထက် ပိုလို့မကောက်ကတ်ကေ့” လို့ပြန်ပြောခရေ။ 14 စစ်သားတချို့က ယောဟန်ကို “ကျွန်နော်ရို့ကား ပဇောင်လုပ်သင့်ရောင်” လို့မီးရေခါ ယောဟန်က “မတ်ရို့တိ လူတိပါးက ပေသာတိကို အားဓမ္မ မတောင်းကေ့။ တစ်ယောက်ကိုလည်း အဟုတ်မမှန် မစွပ်စွဲကတ်ကေ့။ မတ်ရို့ရတဲ့လုပ်အားခနဲ့ ရောင့်ရဲတင်းတိမ်အောင် နီကတ်” လို့ပြန်ပြောခရေ။ 15 လူတိဟာ မကြာခင် မေရှိယ လာဖို့ယာဆိုဟာကို အများကြီးမျှော်လင့်ပနာ စောင့်နီကတ်ဟာကြောင့် လူအများစုက မေရှိယဟာ ယောဟန် ဖြိုက်နီဖို့လားလို့ သူရို့ရဲ့စိတ်နှလုံးထဲကနီ တွေးနီကတ်တေ။ 16 ယင်းကြောင့် ယောဟန်က သူရို့ကို “ငါဟာ လူတိကို ရီနဲ့ရီနှိုက်ခြင်းမင်္ဂလာ လုပ်ပီးရေဆိုဟာမှန်ရေ။ ယေကေလဲသို့ ငါ့ထက်ကြီးမြတ်တဲ့လူတစ်ယောက် ကြွလာနီယာ။ ငါဆိုဟာ သူ့ဖိနပ်ကြိုးကိုတောင် ဖြည်ပီးဖို့ မထိုက်တန်။ သူဟာ လူတိကို ဉာဏ်အလင်းတော်နဲ့ ရီနှိုက်မင်္ဂလာပြုပြီးကေ မီးနဲ့သန့်စင်ပီးလိမ့်မယ်။f 17 သူ့ရဲ့လက်ထဲကကောက်ဆွနဲ့ ကောက်တလင်းနယ်ကို ရှင်းလင်းပနာ စပါးစိအကောင်းနဲ့အဖျင်းကို ခွဲခြားပြီးကေ စပါးစိတိကို ကျီထဲမာ သိမ်းထားပနာ အဖျင်းတိကိုကျကေ တစ်ခါလဲမငြိမ်းရေမီးထဲကို ထည့်လိမ့်မယ်။ ဆိုလိုဟာက သူဟာ နောင်တသံဝေဂရတဲ့လူတိကို စုဝေးပနာ နောင်တသံဝေဂမရတဲ့လူတိကို အပြစ်ပီးလိမ့်မေ” လို့ဆိုခယေ။ 18 ယောဟန်ဟာ ဒေပိုင်နည်းလမ်းအမျိုးမျိုးနဲ့ မင်္ဂလာသတင်းကောင်းကို ဟောပြောပနာ လူတိကို နောင်တသံဝေဂရဖို့အတွက် တိုက်တွန်းနှိုးဆော်ခရေ။ 19 ယေတာလဲ ယောဟန်ဟာ ဂါလိလဲပြည်ကိုအုပ်ချုပ်တဲ့ ဟေရုဒ်အန္တိပက သူ့ ညီရဲ့ မယားဖြိုက်တေ ဟေရောဒိကို သိမ်းပိုက်ခဟာနဲ့ အရာမကောင်းမှုအားလုံးကိုလုပ်ခဟာကြောင့် ပြစ်တင်ရှုံ့ချခရေ။ 20 ယင်းဟာကြောင့် ဟေရုဒ်ဟာ ယောဟန်ကို ထောင်ချစီပြီးကေ နောက်ထပ်ဆိုးဝါးရေ အပြစ်တစ်ခုကို ကျူးလွန်ခရေ။ 21 ယင်းပိုင်ထောင်ချမခံရခင် ယောဟန်ဟာ လူတိအများကြီးကို ရီနှိုက်မင်္ဂလာလုပ်ပီးခရေ။ ကိုယ်တော်ယေရှုဟာ ယောဟန်ပါးမှာ ရီနှိုက်မင်္ဂလာခံယူပနာ ဆုတောင်းနီရေချိန်ခါ အာကာဟာ ဟင်းလင်းပွင့်လားခယေ။ 22 ယင်းအချိန်ခါ ဉာဏ်အလင်းတော်ဟာ ချိုးငှက်ပုံစံနဲ့ ကိုယ်တော်ပါးကို ဆင်းလာရေ။ ယင်းအချိန်မာ ရွှေမြို့တော်ကဘုရားရှင်က “အသင်ဟာ ငါချိုက်မြတ်နိုးတော်မူရေ ငါ့သားတော်ဖြိုက်တေ။ ငါဟာ အသင့်ကို အကြီးကျယ်နှစ်သက်အားရတော်မူရေ” ဆိုတဲ့ အသံတော်တစ်ခု ထွက်လာခရေ။ 23 ကိုယ်တော်ယေရှုဟာ အမှုတော်တိကို စလို့လုပ်ဆောင်ချိန်မာ သက်တော်သုံးဆယ်လောက် ဟိယာဖြိုက်တေ။ လူတိရဲ့အမြင်အရ သူဟာ ယောသပ်ရဲ့ သားဖြိုက်ပနာ ယောသပ်ဟာ ဧလိရဲ့သားဖြိုက်တေ။ 24 ဧလိဟာ မဿတ်ရဲ့သား၊ မဿတ်ဟာ လေဝိရဲ့သား၊ လေဝိဟာ မေလခိရဲ့သား၊ မေလခိဟာ ယန္နရဲ့သား၊ ယန္နဟာ ယောသပ်ရဲ့သား၊ 25 ယောသပ်ဟာ မတ္တသိရဲ့သား၊ မတ္တသိဟာ အာမုတ်ရဲ့သား၊ အာမုတ်ဟာ နာဟုံရဲ့သား၊ နာဟုံဟာ ဧသလိရဲ့သား၊ ဧသလိဟာ နဂ္ဂဲရဲ့သား၊ 26 နဂ္ဂဲဟာ မာအတ်ရဲ့သား၊ မာအတ်ဟာ မတ္တသိရဲ့သား၊ မတ္တသိဟာ ရှေမိရဲ့သား၊ ရှေမိဟာ ယောသပ်ရဲ့သား၊ ယောသပ်ဟာ ယုဒရဲ့သား၊ 27 ယုဒဟာ ယောဟန္နရဲ့သား၊ ယောဟန္နဟာ ရေသရဲ့သား၊ ရေသဟာ ဇေရုဗဗေလရဲ့သား၊ ဇေရုဗဗေလဟာ ရှာလသေလရဲ့သား၊ ရှာလသေလဟာ နေရိရဲ့သား၊ 28 နေရိဟာ မေလခိရဲ့သား၊ မေလခိဟာ အဒ္ဒိရဲ့သား၊ အဒ္ဒိဟာ ကောသံရဲ့သား၊ ကောသံဟာ ဧလမောဒံရဲ့သား၊ ဧလမောဒံဟာ ဧရရဲ့သား၊ 29 ဧရဟာ ယောရှုရဲ့သား၊ ယောရှုဟာ ဧလျေဇာရဲ့သား၊ ဧလျေဇာဟာ ယောရိမ်ရဲ့သား၊ ယောရိမ်ဟာ မဿတ်ရဲ့သား၊ မဿတ်ဟာ လေဝိရဲ့သား၊ 30 လေဝိဟာ ရှိမောင်ရဲ့သား၊ ရှိမောင်ဟာ ယုဒရဲ့သား၊ ယုဒဟာ ယောသပ်ရဲ့သား၊ ယောသပ်ဟာ ယောနန်ရဲ့သား၊ ယောနန်ဟာ ဧလျာကိမ်ရဲ့သား၊ 31 ဧလျာကိမ်ဟာ မေလေရဲ့သား၊ မေလေဟာ မဲနန်ရဲ့သား၊ မဲနန်ဟာ မတ္တသရဲ့သား၊ မတ္တသဟာ နာသန်ရဲ့သား၊ နာသန်ဟာ ဒါဝိဒ်ရဲ့သား၊ 32 ဒါဝိဒ်ဟာ ယေရှဲရဲ့သား၊ ယေရှဲဟာ ဩဗက်ရဲ့သား၊ ဩဗက်ဟာ ဗောဇရဲ့သား၊ ဗောဇဟာ စာလမုန်ရဲ့သား၊ စာလမုန်ဟာ နာရှုန်ရဲ့သား၊ 33 နာရှုန်ဟာ အမိနဒပ်ရဲ့သား၊ အမိနဒပ်ဟာ အဒ်မိန်ရဲ့သား၊ အဒ်မိန်ဟာ အာရံနိရဲ့သား၊ အာရံနိဟာ ဟေဇရုံရဲ့သား၊ ဟေဇရုံဟာ ဖာရက်ရဲ့သား၊ ဖာရက်ဟာ ယုဒရဲ့သား၊ 34 ယုဒဟာ ယာကုပ်ရဲ့သား၊ ယာကုပ်ဟာ ဣဇက်ရဲ့သား၊ ဣဇက်ဟာ အာဗြဟံရဲ့သား၊ အာဗြဟံဟာ တေရရဲ့သား၊ တေရဟာ နာခေါ်ရဲ့သား၊ 35 နာခေါ် ဟာ စေရောက်ရဲ့သား၊ စေရောက်ဟာ ရာဂေါရဲ့သား၊ ရာဂေါဟာ ဖာလက်ရဲ့သား၊ ဖာလက်ဟာ ဟေဗာရဲ့သား၊ ဟေဗာဟာ ရှာလရဲ့သား၊ 36 ရှာလဟာ ကာဣနန်ရဲ့သား၊ ကာဣနန်ဟာ အာဖာဇဒ်ရဲ့သား၊ အာဖာဇဒ်ဟာ ရှေမရဲ့သား၊ ရှေမဟာ နောဧရဲ့သား၊ နောဧဟာ လာမက်ရဲ့သား၊ 37 လာမက်ဟာ မသုရှလရဲ့သား၊ မသုရှလဟာ ဧနောက်ရဲ့သား၊ ဧနောက်ဟာ ယာရက်ရဲ့သား၊ ယာရက်ဟာ မဟာလေလရဲ့သား၊ မဟာလေလဟာ ကာဣနန်ရဲ့သား၊ 38 ကာဣနန်ဟာ ဧနုတ်ရဲ့သား၊ ဧနုတ်ဟာ ရှေသရဲ့သား၊ ရှေသဟာ အာဒံရဲ့သားဖြိုက်ပြီးကေ အာဒံဟာ ဘုရားရှင်ဖန်ဆင်းတော်မူတဲ့လူဖြိုက်တေ။ |
This translation of the Southern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.