Luke 24 - Southern Rakhine1 ရက်သတ္တပတ်ရဲ့ ပထမနိန့်ဖြိုက်တဲ့ တနင်္ဂနွေနိန့်၊ မိုးထစောစောမာ မမါ့တိဟာ ပြင်ဆင်ထားရေအမွှီးနံ့သာတိနဲ့ဆီမွှီးတိကို ယူပနာ သင်္ချိုင်းဂူကို လားကတ်တေ။ 2 သူရို့ဟာ သင်္ချိုင်းဂူပေါက်ဝနားကို ရောက်တဲ့အခါမာ ဂူပေါက်ဝကိုပိတ်ထားရေ ကျောက်တုံးကြီးကို တစ်ယောက်ယောက်က ဖယ်ထားဟာကြောင့် အဝီးတနီရာကို ရောက်နီဟာကို တွိ့ခကတ်တေ။ 3 သူရို့ဟာ သင်္ချိုင်းဂူထဲကို ရောက်ကတ်တေခါ ကိုယ်တော်ယေရှုရဲ့ ရုပ်ခန္ဓာကို မတွိ့ရယာ။ 4 သူရို့ဟာ ယင်းအကြောင်းအရာတိ ပဇောင် ဖြိုက်တေဆိုဟာကို တွေးနီကတ်တုံးမှာ ဖြူဆွတ်ပြီးကေ တောက်ပြောင်နီတဲ့ အဝတ်ဖြူဝတ်ထားတဲ့ လူနှစ်ယောက်ဟာ သူရို့ဘေးမာ ဗြုန်းခနဲပေါ်လာပနာ သူရို့နားမာရပ်နီကတ်တေ။ 5 ယင်းအခါ မမါ့တိလည်း ကြောက်လားလန့်လားကတ်ပနာ ခေါင်းကို ငုံ့ပြီးကေ ရပ်နီကတ်ဟာကြောင့် ယင်းလူနှစ်ယောက်က သူရို့ကို “သီရေလူတိရာထားရေ သင်္ချိုင်းမာ အသက်ရှင်ရေ လူကို အဇာဖြိုက်လို့ လာရှာကတ်ရောင်။ 6 ကိုယ်တော် အေနီရာမာ မဟိယာ။ သူဟာ သီဟာက အသက်ပြန်ရှင်လားယာ။ ဂါလိလဲမာ သူနဲ့တူတူဟိနီခါတုံးက သင်ရို့ကို သူမိန့်ကြားခဟာတိကို အမှတ်ရကတ်ပါ။ 7 ‘လူ့သားတော်ဟာ အပြစ်ဒုစရိုက်သားတိ လက်ထဲကို အအပ်ခံရလိမ့်မယ်။ လူ့သားတော်ဟာ လက်ဝါးကပ်တိုင်မာ တင်ပနာ အသတ်ခံရလိမ့်မယ်။ ယေတာလဲ သူဟာ သုံးရက်မြောက်နိန့်မာ အသက်ပြန်ရှင်တော်မူလိမ့်မယ်’ လို့မိန့်တော်မူခရေမဟုတ်လား” လို့ဆိုကတ်တေ။ 8 ယင်းခါ ယင်းမမါ့တိဟာ ကိုယ်တော်ယေရှု မိန့်ကြားခဟာတိကို မှတ်မိလားကတ်တေ။ 9 သူရို့ဟာ သင်္ချိုင်းဂူကပြန်လာပနာ သာဝကဆယ့်တစ်ယောက်နဲ့ အရာလူအားလုံးကို ဒေအကြောင်းအရာ အားလုံးကို ပြောပြကတ်တေ။ 10 သာဝကတိကို ဒေအကြောင်းရာကို ပြောပြကတ်တေမမါ့တိဟာ မာဂဒလမြို့သူ မေရိ၊ ယောဟန္န၊ ယာကုပ်ရဲ့ အမိဖြိုက်တေလူ မာရိနဲ့ သူရို့နဲ့တတူဟိခရေအရာမမါ့တိ ဖြိုက်တေ။ 11 သာဝကတိဟာ ယင်းမမါ့တိ ပြောရေစကားတိကို အဓိပ္ပါယ်မဟိလို့ ထင်ကတ်ဟာကြောင့် မယုံကတ်။ 12 ယေတာလဲ ပေတရုဟာ ထပနာ သင်္ချိုင်းဂူကို ပြီးလားပနာ အထဲကိုကြည့်ခါ ကိုယ်တော်ရဲ့ ရုပ်ခန္ဓာကိုမတွိ့ရဘဲနဲ့ ခန္ဓာကိုယ်ကို ပတ်ထားရေ အဝတ်တိယာဟိနီဟာကို မြင်ခရေ။ ယင်းကြောင့် သူဟာ ယင်းအဖြိုက်ပျက်တိကို တွေးရင်းနဲ့ အိမ်ကို ပြန်လာခရေ။ 13 ယင်းနိန့်ခါ ကိုယ်တော်ယေရှုရဲ့ တပည့်တော်တိထဲက နှစ်ယောက်ဟာ ဂျေရုဆလင်မြို့ကနီ ခုနစ်မိုင်လောက်ဝီးရေ ဧမောက် ရွာကို လားကတ်တေ။ 14 ယပြီးကေ သူရို့လားနီတုန်းခါ လွန်ခရေရက်ကဖြိုက်ပျက်ခရေ အကြောင်းတိကို ဆွေးနွေးရင်း လားနီကတ်တေ။ 15 ယင်းပိုင် သူရို့ဟာ တစ်ယောက်နှင့်တစ်ယောက် ပြောပြီးကေ ဆွေးနွေးရင်းလားနီချိန်မာ ကိုယ်တော်ယေရှုဟာ သူရို့နားကို လာပြီးကေ သူရို့နဲ့ အတူတူ လမ်းလျှောက်နီခရေ။ 16 ယေတာလဲ ဘုရားရှင်က သူရို့ကို ကိုယ်တော်ယေရှုကိုမမှတ်မိအောင် ဖုံးထားဟာကြောင့် သူရို့ဟာ ကိုယ်တော်ကို မြင်တာလဲ မမှတ်မိခကတ်။ 17 ကိုယ်တော်က သူရို့နှစ်ယောက်ကို “မတ်ရို့ လမ်းမာလားရင်း အဇာတိဆွေးနွေးနီကတ်ရောင်” လို့မီးလိုက်တေခါ သူရို့ဟာ မျက်နှာတိညှိုးပနာ လားနီဟာကရပ်လိုက်ကတ်တေ။ 18 သူရို့ထဲက ကလောဖ ဆိုရေတစ်ယောက်က ကိုယ်တော်ကို “အသင်ဟာ လွန်ခရေရက်အနည်းချေက ဂျေရုဆလင်မြို့မှာ ဖြိုက်ပျက်ခတဲ့ရက်အကြောင်းအရာတိကို မသိပဲနဲ့ ဂျေရုဆလင်မြို့ကိုအလည်လာတဲ့ အာဂန္တုဖြိုက်ဖို့” လို့ပြောလိုက်တေ။ 19 ကိုယ်တော်က “အဇာတိ ဖြိုက်ပျက်ခရောင်” လို့မီးလိုက်တေခါ သူက “နာဇရက်မြို့သား ကိုယ်တော်ယေရှုနဲ့ ပတ်သက်တဲ့ အဖြိုက်ပျက်တိ ဖြိုက်တေ။ သူဟာ ပရောဖက်တစ်ပါး ဖြိုက်ပြီးကေ ဘုရားရှင်နဲ့ လူတိရှေ့မာ သူ့ရဲ့ ဟောပြောသွန်သင်မှုနဲ့ လုပ်ဆောင်မှုတိအားလုံးဟာ တန်ခိုးအာဏာနဲ့ပြည့်စုံခပါရေ။ 20 ယေတာလဲသို့ ကျွန်နော်ရို့ရဲ့ ဂျူးပုရောဟိတ်အကြီးအကဲတိနဲ့ ခေါင်းဆောင်တိက သူ့ကို ဖမ်းပနာ ရောမအာဏာပိုင်တိလက်ထဲကို အပ်ခကတ်တေ။ ယင်းအာဏာပိုင်တိက သူ့ကို သီဒဏ်ချလိုက်ဟာကြောင့် သူဟာလက်ဝါးကပ်တိုင်မာတင်ပနာ သံခတ်ပြီးကေ အသတ်ခံခရရေ။ 21 သူဟာ ကျွန်နော်ရို့ အစ္စရေးလူမျိုးအပေါင်းကို ကျွန်နော်ရို့ရန်သူတိလက်ထဲကနီ ကယ်တင်တော်မူဖို့ မေရှိယအရှင်ဖြိုက်ဖို့လို့ ကျွန်နော်ရို့ မျှော်လင့်ထားခကတ်တာလဲ အဂု ယင်းအဖြိုက်ပျက်တိဖြိုက်ခဟာ သုံးရက်တောင် ကြာခယာ။ 22 ယင်းဟာတင်မက ကျွန်နော်ရို့ထဲက မမါ့တချို့ဟာ အံ့ဩစရာအကြောင်းတိကို ငါရို့ကို ပြောပြခရေ။ သူရို့ဟာ မိုးထစောစော သင်္ချိုင်းဂူကို လားခရေခါ 23 သူရို့ဟာ ကိုယ်တော်ယေရှုရဲ့ ရုပ်အလောင်းကို မတွိ့ခရဘဲ နတ်ဒေဝါအချို့ရောက်လာပနာ ကိုယ်တော် သက်ပြန်ရှင်လားယာလို့ လာပြောခရေလို့ ကျွန်နော်ရို့ကို ပြန်ပြောကတ်တေ။ 24 ယင်းကြောင့် ကျွန်နော်ရို့ထဲက လူတချို့က သင်္ချိုင်းဂူကို လားကြည့်ခါမာလည်း ယင်းမမါ့တိပြောပိုင်မျိုး ဖြိုက်နီပနာ သူရို့လည်း ကိုယ်တော် ယေရှုရဲ့ ရုပ်အလောင်းကို မတွိ့ခကတ်” လို့ဆိုကတ်တေ။ 25 ယင်းခါ ကိုယ်တော်က သူရို့ကို “မိုက်မဲတဲ့လူတိ၊ မတ်ရို့ အဇာဖြိုက်လို့ နားမလည်နိုင်ကတ်ရောင်။ ပရောဖက်တိရဲ့ မိန့်မှာချက်တိကို ယုံကြည်ဖို့အတွက်ကို အဇာဖြိုက်လို့ နှောင့်နှေးနီကတ်ရောင်။ 26 မေရှိယဟာ သူ့ရဲ့ ဘုန်းတန်ခိုးတော်တိ မထင်ရှားခင် ဒုက္ခဝေဒနာကိုခံစားရပနာ သီရဖို့ဆိုဟာကို မသိကတ်လား” လို့မိန့်ဆိုခရေ။ 27 ယပြီးကေ ကိုယ်တော်ဟာ မောရှေနဲ့ပရောဖက်တိရဲ့ကျမ်းတိမှာ သူ့အကြောင်းကို ဖော်ပြထားသမျှတိရဲ့ အဓိပ္ပါယ်တိကို သူရို့ကို ရှင်းပြခရေ။ 28 ယပြီးဟာနဲ့ သူရို့ နှစ်ယောက် လားနီရေရွာနားကို ရောက်လာရေခါ ကိုယ်တော်ဟာ အဝီးကြီးကို ဆက်လို့ ထွက်လားဖို့ပုံစံ မြင်ရဟာကြောင့် 29 သူရို့က “နီဝင်နီယာဖြိုက်ပနာ ကောင်းကြီး နောက်ကျနီယာ ဖြိုက်လို့ကျွန်နော်ရို့နဲ့ တတူတူ တည်းပါဖိ” လို့ကိုယ်တော်ကို ဖိတ်ခကတ်တေ။ ယင်းဟာကြောင့် ကိုယ်တော်က သူရို့နဲ့ တတူတူ တည်းဖို့ အိမ်ထဲကို ဝင်လားခရေ။ 30 အချိန်တကေကြာပြီးခါ သူရို့ဟာ စားသောက်ဖို့အတွက် စားပွဲမာ ထိုင်ကတ်တေ။ ကိုယ်တော်ဟာ ပေါင်မုန့်ကို လက်နဲ့ကိုင်ပနာ ဘုရားရဲ့ကျေးဇူးကို ချီးမွမ်းပြီးကေ မုန့်ကိုဖဲ့ပနာ သူရို့ကို ပီးခရေ။ 31 ယေခါ သူရို့ကို အမြင်အာရုံဖွင့်ပီးလိုက်ဟာကြောင့် ကိုယ်တော်ကို မှတ်မိလားကတ်တေ။ ယေတာလဲ ယင်းချိန်မာပင် ကိုယ်တော်ဟာ သူရို့မြင်ကွင်းထဲက ပျောက်လားခရေ။ 32 ယင်းလူတိကလည်း “ကိုယ်တော်ယေရှုက ငါရို့ကို လမ်းမာ ကျမ်းစာတိအကြောင်းကို ရှင်းပြနီတုံးက ငါရို့စိတ်ထဲမာ ရင်းရင်းနှီးနှီး သိနီရေလို့ စိတ်က ခံစားရရေမလား” လို့အချင်းချင်းပြောကတ်တေ။ 33 ယင်းကြောင့် သူရို့ဟာ ချက်ချင်းထပနာ ဂျေရုဆလင်မြို့ကို ပြန်လားကတ်တေခါ သာဝကဆယ့်တစ်ယောက်ဟာ အရာလူတိနဲ့ တူတူ စုလို့ဟိဟာကို တွိ့ကတ်ရရေ။ 34 ယင်းစုဝေးနီရေလူတိက ပြန်လာရေလူနှစ်ယောက်ကို “ကိုယ်တော်ယေရှုဟာ သီးခြင်းကနီ အသက်ပြန်ရှင်တော်မူပနာ ရှိမုန်ကို ထင်ထင်ရှားရှား ကိုယ်ထင်ပြဟာက အမှန်ဖြိုက်တေ” လို့ပြောပြကတ်တေ။ 35 ယေခါ ဧမောက်ရွာက ပြန်လာရေနှစ်ယောက်ကလည်း လမ်းမာ သူရို့ ကြုံခရသမျှနဲ့ မုန့်ကို ဖဲ့လိုက်တေခါ ကိုယ်တော်ယေရှုဖြိုက်နီကြောင်းကို သိလိုက်ရဟာတိကို ပြောပြကတ်တေ။ 36 ယင်းပိုင်နဲ့ တပည့်တော်တိဟာ ယင်းအကြောင်းတိ အဖြိုက်ပျက်တိကို ပြောပြနီခါပင် ကိုယ်တော်ဟာ သူရို့ရဲ့ အလယ်မာ ရုတ်တရက်ပေါ်လာပြီးကေ သူရို့ကို “ဘုရားရှင်က သင်ရို့ကို ငြိမ်းချမ်းခြင်းကို ပီးသနားပါစီ” လို့မိန့်တော်မူလိုက်တေ။ 37 ယေတာလဲ တပည့်တော်တိဟာ ကိုယ်တော်ကို မြင်ရဟာကို ဆိတ္ဆီမြင်ရေလို့ ထင်ပနာ အံ့ဩပြီးကေကြောက်လားခကတ်တေ။ 38 ယေတာလဲ ကိုယ်တော်က “မတ်ရို့ အဇာဖြိုက်လို့ ကြောက်နီကတ်ရောင်။ အဇာဖြိုက်လို့ ယုံမှားသံသယ ဝင်နီကတ်ရောင်။ 39 ငါ့လက်တိ၊ ခြီထောက်တိကို ကြည့်လိုက်။ ငါ့ကို တို့ထိကြည့်ကတ်။ အဇာဖြိုက်လို့ဆိုကေ ဆိတ္ဆီမာ အရိုးတိအသားတိမဟိ။ ငါ့မာ မတ်ရို့မြင်ရေအတိုင်း အသားတိ၊ အရိုးတိ ဟိရေ” လို့မိန့်တော်မူခရေ။ 40 ယပြီးကေ သူရို့ကို သူ့လက်တိ ခြီထောက်တိက အမာရွတ်တိကို ပြလိုက်တေ။ 41 တပည့်တော်တိလည်း အကြီးကျယ် အားရဝမ်းသာ ဖြိုက်ပနာ မယုံနိုင်အောင်ကို အံ့ဩလားခကတ်တေ။ ကိုယ်တော်က သူရို့ကို “စားစရာတစ်ခုခုဟိလား” လို့မီးလိုက်တေ။ 42 ယေခါ သူရို့က ငါးကင်တစ်ပိုင်းကို ပီးလိုက်တေ။ 43 ကိုယ်တော်ဟာ သူရို့ ရှေ့မာပင်စားလိုက်တေ။ 44 ယပြီးကေ ကိုယ်တော်က “မောရှေရဲ့ပညတ်ကျမ်း၊ ပရောဖက်တိရဲ့ ကျမ်းတိနဲ့၊ ဆာလံကျမ်းတိမာ ငါ့အကြောင်းကို ဖော်ပြထားရေအတိုင်း အမှန် ဖြိုက်လာလိမ့်မယ်လို့ မတ်ရို့ကို ပြောပြခရေအကြောင်းတိဟာ ဒေအဖြိုက်ပျက်တိ ဖြိုက်တေ” လို့မိန့်တော်မူခရေ။ 45 ယပြီးကေ ကိုယ်တော်ဟာ ကျမ်းစာကို နားလည်အောင် တပည့်တော်တိကို ရှင်းပြတော်မူရေ။ 46 ယပြီးကေ ကိုယ်တော်က သူရို့ကို “ကျမ်းစာထဲမာ ကယ်တင်ရှင်မေရှိယဟာ ဒုက္ခဆင်းရဲတိကို ခံစားရပြီးလို့ သုံးရက်မြောက်တေနိန့်မာ သီခြင်းက အသက်ပြန်ရှင်တော်မူလိမ့်မယ်။ 47 မေရှိယကို ယုံကြည်တဲ့လူတိက ဂျေရုဆလင်မြို့ကစပနာ ကမ္ဘာမာဟိတဲ့လူမျိုးတိုင်းပါးကို လားပြီးကေ ဘုရားရှင်ခွင့်လွှတ်ခြင်းကိုခံရဖို့အတွက် သူရို့ရဲ့အပြစ်ဒုစရိုက်တိကို နောင်တသံဝေဂရဖို့ ဟောပြောလိမ့်မယ် လို့ရေးထားရေ။ 48 ယင်းဟာကြောင့် မတ်ရို့ဟာလည်း ဒေအဖြိုက်ပျက်တိအားလုံးရဲ့ မျက်မြင်သက်သီတိဖြိုက်ကတ်တေ။ 49 ငါဟာ ငါ့ခမည်းတော် ပီးထားရေကတိအတိုင်း မတ်ရို့ပါးကို ဉာဏ်အလင်းတော်ကို စီလွှတ်မေ။ ယေတာလဲ ဉာဏ်အလင်းတော်ဟာ ရွှေမြို့တော်ကနီ မတ်ရို့ကို တန်ခိုးတော်ပီးအပ်တေအချိန်ထိ ဂျေရုဆလင်မြို့မာ စောင့်နီကတ်ပါ” လို့မိန့်တော်မူခရေ။ 50 ကိုယ်တော်ဟာ တပည့်တော်တိကိုခေါ်ပနာ မြို့ပြင်ကိုထွက်ခွါပြီးကေ ဗေသနိရွာနားကို ကြွတော်မူခရေ။ ယပြီးဟာနဲ့ ကိုယ်တော်ဟာ တပည့်တော်အားလုံးအတွက် လက်တော်ကို မြောက်ပနာ ချီးမွမ်းဆုတောင်းပီးတော်မူရေ။ 51 ယပြီးဟာနဲ့ ကိုယ်တော်ဆုတောင်းပီးနီတုန်းခါ ကိုယ်တော်ဟာ ရွှေမြို့တော်ကို ကြွမြန်းတော်မူခရေ။ 52 တပည့်တော်တိဟာ ကိုယ်တော်ယေရှုကို ဒူးထောက်ရှိခိုးကတ်ပြီးကေ ဝမ်းမြောက်ဝမ်းသာနဲ့ ဂျေရုဆလင်မြို့ကို ပြန်လားကတ်တေ။ 53 ယပြီးကေ သူရို့ဟာ ဗိမာန်တော်ထဲမာ ဆက်လို့နီပြီးကေ ဘုရားရှင်ကို ဆုတောင်းနီခကတ်တေ။ |
This translation of the Southern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.