Luke 23 - Southern Rakhine1 ယပြီးကေ တရားလွှတ်တော်မှာ စုဝေးလာကတ်တေလူတိဟာ ကိုယ်တော်ယေရှုကို ရောမဘုရင်ခံ ပိလတ်ပါးကို ခေါ်လားကတ်တေ။ 2 “ဒေလူဟာ တိုင်းသူပြည်သားတိကို သူ့ကိုယ်သူ မေရှိယဆိုရေ ဘုရင်တစ်ပါးဖြိုက်တေလို့ လှည့်ဖြားပြောဆိုပနာ ဘုရင်ကြီးကို အခွန်မဆက်သဖို့ တားမြစ်နီဟာကို ကျွန်နော်ရို့ တွိ့ခရရေ” လို့ဘုရင်ခံပိလတ်ရှေ့မှာ ကိုယ်တော်ကို စွပ်စွဲပြောဆိုကတ်တေ။ 3 ယေခါ ပိလတ်က ကိုယ်တော်ယေရှုကို “မတ်ဟာ ဂျူးလူမျိုးတိရဲ့ဘုရင်ဟုတ်လား” လို့မီးလိုက်တေခါ ကိုယ်တော်က “အသင်ပြောရေအတိုင်းရာဖြိုက်တေ” လို့ပြန်လို့မိန့်တော်မူလိုက်တေ။ 4 ပိလတ်ဘုရင်ခံက ဂျူးပုရောဟိတ်အကြီးအကဲတိနဲ့ လူတိဘက်ကို လှည့်ပနာ “ဒေလူမှာ အပြစ်တစ်စုံတစ်ရာဟိဟာကို ငါမတွိ့ရ” လို့ပြောလိုက်တာလဲ 5 သူရို့အားလုံးက “အေလူဟာ ဂါလိလဲပြည်ကနီ ဂျေရုဆလင်မြို့အထိ လူတိကို ဆူပူအောင်လှုံ့ဆော်ပနာ ယုဒပြည်တစ်ခွင်လုံးမာ သူ့ရဲ့ဟောပြောသွန်သင်မှုတိနဲ့ ရုန်းရင်းဆန်ခတ်ဖြိုက်အောင် လာလို့လုပ်ဆောင်နီရေ” လို့ပြောကတ်တေ။ 6 ယင်းပိုင်မျိုး ပြောနီဟာကို ဘုရင်ခံပိလတ်ကကြားရေအခါ “ဒေလူဟာ ဂါလိလဲပြည်သားလား” လို့မီးလိုက်တေ။ 7 သူက ဟေရုဒ်အုပ်စိုးရေ ဂါလိလဲနယ်ကဖြိုက်ကြောင်းသိရေခါ ဘုရင်ခံဟေရုဒ်ပါးကို ကိုယ်တော်ယေရှုကို ပို့လိုက်တေ။ ယင်းအချိန်ခါ ဟေရုဒ်ဟာ ဂျေရုဆလင်မြို့ကို ရောက်နီခရေ။ 8 ဟေရုဒ်ဟာ ကိုယ်တော်ယေရှုရဲ့ အကြောင်းကို ကြားထားပနာမြင်ချင်ဟာကြာယာ ဖြိုက်ဟာကြောင့် ကိုယ်တော်ယေရှုကို မြင်ရရေခါ အကြီးကျယ် ဝမ်းသာခရေ။ သူဟာ ကိုယ်တော်ယေရှုပြုတော်မူရေ အံ့ဖွယ်နိမိတ်လက္ခဏာတစ်ခုခုကို မြင်ရဖို့ မျှော်လင့်နီခရေ။ 9 ယင်းကြောင့် ဟေရုဒ်ဟာ ကိုယ်တော်ကို မီးခွန်းတိအများကြီးမီးတာလည်း ကိုယ်တော်က တစ်ခုချေတောင် ပြန်မဖြေခ။ 10 ယပြီးဟာနဲ့ ဂျူးပုရောဟိတ်အကြီးအကဲတိနဲ့ ကျမ်းတတ်ဆရာတိဟာ မတ်တပ်ရပ်ပနာ ကိုယ်တော်ကို ပြင်းပြင်းထန်ထန်စွပ်စွဲကတ်တေ။ 11 ဟေရုဒ်နဲ့ သူ့ရဲ့ စစ်သည်တိဟာ ကိုယ်တော် ကိုလှောင်ရယ်ကတ်ပနာ ကိုယ်တော်ကို ဝတ်ရုံတစ်ခုဝတ်ခိုင်းပနာ ပိလတ်ဘုရင်ခံပါးကို ပြန်ပို့လိုက်ကတ်တေ။ 12 ဟေရုဒ်နဲ့ ပိလတ်ဘုရင်ခံရို့ဟာ အယင်ခါက ရန်ဖက်တိ ဖြိုက်တာလဲ ယင်းနိန့်မာပင် သူငယ်ချင်းတိဖြိုက်လားခကတ်တေ။ 13 ပိလတ်ဘုရင်ခံဟာ ဂျူးပုရောဟိတ်အကြီးအကဲတိ၊ ဂျူးလူမျိုးခေါင်းဆောင်တိနဲ့ လူပရိတ်သတ်တိကို စုဝေးခိုင်းလိုက်ပနာ 14 သူရို့က “အေလူဟာ လူတိကို လိမ်လည်ပြီးကေ ဆူပူမှုတိ လုပ်နီဟာကြောင့် ငါ့ပါးကို ခေါ်လာခကတ်တေ။ ယေတာလဲ ငါဟာ အသင်ရို့ ရှေ့မာပင် သူ့ကို စစ်ဆေးခတာလဲသို့ အသင်ရို့စွပ်စွဲဟာပိုင်မျိုး အပြစ်တိ ကျူးလွန်ထားဟာကို မတွိ့ရ။ 15 ဟေရုဒ်ဘုရင်ကလည်း သူ့ကို အပြစ်ရှာမတွိ့ဟာကြောင့် တစ်ခုအပြစ်ဒဏ်လည်းမပီးဘဲ ငါ့ပါးကို ပြန်ပို့လိုက်ကတ်တေ။ အေလူဟာ သီသင့်ရေအပြစ်တစ်စုံတစ်ရာတောင် မဟိဟာ သိသာရေ။ 16 ယင်းဟာကြောင့် သူ့ကိုကြိမ်ဒဏ်ပီးပနာ လွှတ်လိုက်မေ” လို့ဆိုရေ။ 17 ပိလတ်ဘုရင်ခံက ယင်းပိုင်ပြောရေဆိုဟာက ပွဲတော်ရက်မှာ လူတစ်ယောက်ယောက်ကို လွတ်မြောက်ခွင့်ပီးရဟာ ထုံးစံဖြိုက်ဟာကြောင့်ဖြိုက်တေ။ 18 ယေတာလဲ လူထုပရိတ်သတ်တိbက “သူ့ကို သတ်ပနာ ဗာရဗ္ဗကိုလွှတ်ပီးပါ” လို့တစ်ပြိုင်တည်းအော်လို့ တောင်းဆိုကတ်တေ။ 19 အဂုခါ ဗာရဗ္ဗဟာ မြို့ထဲမှာ ပုန်ကန်မှုနဲ့ လူသတ်မှုတိကို ကျူးလွန်ရေလူဖြိုက်ဟာကြောင့် ထောင်ကျနီရေလူဖြိုက်တေ။ 20 ပိလတ်ဘုရင်ခံဟာ ကိုယ်တော်ယေရှုကို လွှတ်ပီးချင်ဟာကြောင့် လူထုနဲ့ ဘာသာရေးခေါင်းဆောင်တိကို နောက်တစ်ခေါက်ထပ်မီးပြန်ရေ။ 21 ယေတာလဲ သူရို့က “သူ့ကိုလက်ဝါးကပ်တိုင်မာ တင်ပြီးကေ သတ်လိုက်ပါ။ သူ့ကိုလက်ဝါးကပ်တိုင်မာ တင်ပြီးကေ သတ်လိုက်ပါ” လို့ဆက်လို့တောင်းဆိုကတ်တေ။ 22 ယေခါ ပိလတ်ဘုရင်ခံက “သူဟာ အဇာပိုင်အပြစ်မျိုး ကျူးလွန်မိခလို့ရောင်။ သူ့ကို သီဒဏ်ပီးရလောက်တေအပြစ် ရှာမရ။ ယင်းကြောင့် သူ့ကို ဆုံးမပနာ လွှတ်ပီးလိုက်မေ” လို့တတိယတစ်ခါ ထပ်လို့ပြောလိုက်တေ။ 23 ယေတာလဲ လူထုပရိတ်သတ်တိကလည်း ကိုယ်တော်ယေရှုကို လက်ဝါးကပ်တိုင်ထက်မာ တင်လို့သတ်ပါလို့ အကျယ်ကြီးအော်နီကတ်တေ။ နောက်ဆုံးမာ သူရို့ရဲ့အသံကျယ်ကြီးဟာ အောင်နိုင်လားခရေ။ 24 ယင်းကြောင့် ပိလတ်ဘုရင်ခံဟာ လူတိတောင်းဆိုရေအတိုင်း လုပ်ပီးဖို့ဆုံးဖြတ်လိုက်တေ။ 25 သူဟာ လူပရိတ်သတ်တိလွှတ်စီချင်ရေ ထောင်ကျနီတဲ့ ရာဇဝတ်သားဗာရဗ္ဗကို လွှတ်ပီးလိုက်ပနာ ကိုယ်တော်ယေရှုကို ယင်းလူတိသဘောအတိုင်း လုပ်ဖို့အတွက် သူရို့ကို အပ်လိုက်တေ။ 26 စစ်သည်တိဟာ ကိုယ်တော်ကို ခေါ်လားခါ ကုရေနေမြို့ကလာတဲ့ ရှိမုန်ဆိုရေလူကို မြင်ဟာနဲ့ သူ့ကိုဖမ်းပနာ ကိုယ်တော်နောက်က လက်ဝါးကပ်တိုင်ထမ်းလို့ လိုက်ခိုင်းလိုက်တေ။ 27 လူတိအများကြီးနဲ့အတူ ဂျူးလူမျိုးမမါ့တိဟာ ကိုယ်တော်အတွက် ရင်ဘတ်စည်တီးပနာ ငိုနီကတ်ပြီးကေ ကိုယ်တော်နောက်က လိုက်လားကတ်တေ။ 28 ကိုယ်တော်က ယင်းလူတိဘက်ကိုလှည့်ပနာ “ဂျေရုဆလင်မြို့ကမမါ့တိ၊ ငါ့အတွက် မငိုကတ်ကေ့။ အသင်ရို့နဲ့ အသင်ရို့ သားသမီးတိအတွက်ရာ ငိုကတ်။ 29 ‘မြုံနီရေမမါ့၊ ကိုယ်ဝန်မဆောင်ဖူးရေဗိုက်နဲ့ နို့မတိုက်ဖူးရေ သားမြတ်တိဟာ မျက်နှာသာပီးဟာကိုခံရဖို့’ လို့လူတိပြောကတ်ဖို့နိန့်တိ မကြာခင် ရောက်လာလိမ့်မယ်။ 30 ယင်းအချိန်ကာလရောက်ကေ လူတိဟာ တောင်တိကို ‘ငါရို့ထက်ကိုပြိုကျပါ’ လို့ပြောကတ်ပနာ တောင်ကုန်းတိကို ‘ငါရို့ကိုဖုံးအုပ်ပါ’ လို့ဆိုကတ်လိမ့်မယ်။ 31 အဇာဖြိုက်လို့ဆိုကေ သူရို့ဟာ စိမ်းလန်းရေအပင်တိပိုင်မျိုး အပြစ်ကင်းရေ ငါ့ကိုတောင် ဒေပိုင်လုပ်ကေ ခြောက်သွိ့ရေအပင်တိပိုင်မျိုး မတ်ရို့ကို အဇာလောက်တောင်ပိုလို့ဆိုးဆိုးဝါးဝါးလုပ်ဖို့ရောင်” လို့မိန့်လိုက်တေ။ 32 ရာဇဝတ်သား နှစ်ယောက်ကိုလည်း ကိုယ်တော်နဲ့ တတူတူ သီဒဏ်ပီးဖို့ အခေါ်ခံလာရရေ။ 33 သူရို့ဟာ ဦးခေါင်းခွံလို့ခေါ်ရေနီရာကို ရောက်တေခါ ကိုယ်တော်ကို လက်ဝါးကပ်တိုင်ထက်ကိုတင်ပနာ သံနဲ့ခတ်ပြီးကေ သတ်လိုက်ကတ်တေ။ ရာဇဝတ်သား နှစ်ယောက်ကိုလည်း ကိုယ်တော်ရဲ့ ညာဖက်မှာတစ်ယောက်၊ ဘယ်ဖက်မှာတစ်ယောက် လက်ဝါးကပ်တိုင်ထက်မာတင်ပနာ သံနဲ့ခတ်လိုက်တေ။ 34 ယေခါ ကိုယ်တော်က “အဖဘုရားရှင်၊ သူရို့ဟာ သူရို့ကိုယ်သူရို့ အဇာတိလုပ်မိနီကတ်တေဆိုဟာကို မသိကတ်ဟာကြောင့် အေလူတိကို ခွင့်လွှတ်ပီးပါ” လို့ဆုတောင်းတော်မူရေ။ စစ်သည်တိဟာ ကိုယ်တော်ရဲ့ ဝတ်ရုံကို မဲနှိုက်ပြီးကေ ခွဲယူကတ်တေ။ 35 လူတိရပ်ကြည့်နီကတ်တုံးခါ ဂျူးလူမျိုးခေါင်းဆောင်တိဟာ ကိုယ်တော်ယေရှုကို သရော်ပြီးကေ “ဒေလူဟာ အရာလူတိကို ကယ်တင်ခရေ။ သူဟာ ဘုရားရှင်ရွီးချယ်ထားတဲ့မေရှိယဆိုကေ ကိုယ့်ဟာကိုယ် ကယ်တင်ပါ” လို့ပြောဆိုကတ်တေ။ 36 ရဲမက်တိကလည်း ကိုယ်တော်နားကိုလာပြီးကေ လှောင်ပြောင်ပနာ ဝိုင်ချဉ်c ကို တိုက်ကတ်တေ။ 37 သူရို့က ကိုယ်တော်ကို “အသင်က ဂျူးလူမျိုးတိရဲ့ ဘုရင်မှန်ကေ ကိုယ့်ဟာကို ကယ်တင်လိုက်” လို့ပြောကတ်တေ။ 38 ကိုယ်တော်ရဲ့ ဦးခေါင်းထက်မှာလည်း “ဒေလူဟာ ဂျူးလူမျိုးတိရဲ့ ဘုရင်” လို့ရေးထားရေ ဆိုင်းဘုတ်ကို ချိတ်ထားရေ။ 39 လက်ဝါးကပ်တိုင်ထက်မှာ ချိတ်ထားခံရရေ ရာဇဝတ်သားတစ်ယောက်က ကိုယ်တော်ကို “အသင်ဟာ ကယ်တင်ရှင်မေရှိယဆိုကေ ကိုယ့်ဟာကို ကယ်တင်ပနာ ငါရို့ကိုလည်း ကယ်ပီး” လို့စော်ကားပြောဆိုရေ။ 40 ယေတာလဲ နောက်ရာဇဝတ်သား တစ်ယောက်က ယင်းလူကို “အသင်ဟာ ဒေလူနဲ့ တူညီရေပြစ်ဒဏ်ကိုခံနီရဟာတောင် ဘုရားရှင်ကို မကြောက်သိမ်းလား။ 41 ငါရို့ဟာ ငါရို့ကျူးလွန်ခတဲ့ အပြစ်ဒုစရိုက်တိကြောင့် အပြစ်ဒဏ်ပီးခံရဟာက ထိုက်တန်ရေ။ ယေတာလဲ အေလူဟာ တစ်ခုအပြစ်ကိုလည်း ကျူးလွန်ခဟာတိ မဟိခ” လို့ဆူပူလိုက်တေ။ 42 ယပြီးကေ သူကဆက်လို့ ကိုယ်တော်ကို “ကိုယ်တော်ယေရှု၊ အသင်ဟာ ရှင်ဘုရင်တစ်ပါးအဖြိုက် အုပ်စိုးဖို့ ပြန်လာရေအချိန်ခါ ကျွန်နော့်ကို အောက်မိ့တော်မူပါ” လို့လျှောက်တင်ရေ။ 43 ယေခါ ကိုယ်တော်က “အသင့်ကို ငါအမှန်ပြောမေ။ အေနိန့်ပင် အသင်ဟာ ငါနဲ့အတူတူ ပရဒိသုဘုံdမာ ဟိလိမ့်မယ်” လို့မိန့်တော်မူခရေ။ 44 ယင်းအချိန်ဟာ နီမွန်းတည့်ချိန် ဖြိုက်တာလဲသို့ နိန့်ခင်းသုံးနာရီလောက်ထိအောင် ကမ္ဘာတစ်ခုလုံးက အာကာဟာ မဲမှောင်နီရေ။ 45 နီလုံးရဲ့ အလင်းရောင်ဟာပျောက်လားပနာ ဗိမာန်တော်ထဲက အမြင့်မြတ်ဆုံးနီရာကို ဖုံးထားရေလိုက်ကာဟာe နှစ်ခြမ်းကွဲလားခရေ။ 46 ကိုယ်တော်ဟာ အသံအကျယ်ကြီးနဲ့ “အဖဘုရားရှင်ရဲ့လက်ထဲကို သားတော်ရဲ့ဝိညာဉ်ကို အပ်နှံပါရေ” လို့ပြောပြီးကေ အသက်စွန့်တော်မူခရေ။ 47 အေအဖြိုက်ပျက်ကိုမြင်ရေ ရောမတပ်မှူးဟာ ဘုရားကိုချီးမွမ်းပနာ “ဒေလူဟာ အမှန်ကို ဖြောင့်မတ်မှန်ကန်ရေလူဖြိုက်တေ” လို့ဆိုရေ။ 48 ဒေအနိဌာရုံမြင်ကွင်းကို ကြည့်ဖို့အတွက် စုလို့ရောက်လာကတ်တေလူထုပရိတ်သတ်တိဟာ ကိုယ်တော်ရဲ့ အဖြိုက်ကို မြင်ရပနာ ရင်ဘတ်စည်တီးပြီးကေ ငိုပနာ ကိုယ့်အိမ်ကိုယ် ပြန်လားကတ်တေ။ 49 ယေတာလဲ ကိုယ်တော်ယေရှုရဲ့ မိတ်ဆွေအပေါင်းသင်းတိနဲ့ ဆွေမျိုးသားချင်းတိ၊ ဂါလိလဲက ကိုယ်တော့်နောက်ကို လိုက်လာကတ်တေမမါ့တိဟာ အဝီးတနီရာက ရပ်ပနာ စောင့်နီကတ်တေ။ 50 ယင်းချိန်ခါ ယုဒပြည် အရိမဿဲအရပ်က ယောသပ်ဆိုရေလူတစ်ယောက်ဟိရေ။ သူဟာ လူရိုးလူကောင်းတစ်ယောက် ဖြိုက်ပနာ ဂျူးလူမျိုးတိရဲ့လွှတ်တော်အဖွဲ့ ဝင်တစ်ယောက်လဲ ဖြိုက်တေ။ 51 သူဟာ ကိုယ်တော်ယေရှုကို သတ်ဖို့ကြံစည်ကတ်တေ အခြားလွှတ်တော်အဖွဲ့ဝင်တိရဲ့ ဆုံးဖြတ်ချက်နဲ့ လုပ်ဆောင်ချက်တိကို သဘောမတူခ။ ယင်းအပြင် ဒေကမ္ဘာကို ဘုရားရှင်ရဲ့သာသနာတော် ရောက်လာဖို့ အမှန်မျှော်လင့်တဲ့ လူလည်းဖြိုက်တေ။ 52 ယင်းလူဟာ ကိုယ်တော်ရဲ့ အလောင်းကို သင်္ဂြိုဟ်ခွင့်ပီးဖို့ ပိလတ်ဘုရင်ခံပါးက တောင်းခံရေအခါ ပိလတ်က ခွင့်ပြုပီးခရေ။ 53 ယင်းကြောင့် သူဟာ ကိုယ်တော်ရဲ့ခန္ဓာကိုယ်ကို လက်ဝါးကပ်တိုင်ထက်ကချပနာ ပိတ်စအကောင်းသားနဲ့ ပတ်လိုက်တေ။ ယပြီးဟာနဲ့ ကျောက်တောင်ကြီးတစ်ခုကို ထွင်းထားပနာ တစ်ယောက်ကိုတောင် မသင်္ဂြိုဟ်ရသိမ်းတဲ့ သင်္ချိုင်းဂူမာ ကိုယ်တော်ရဲ့ ခန္ဓာကိုယ်ကို ထားခရေ။ 54 ယင်းနိန့်ဟာ ပြင်ဆင်ရတဲ့နိန့်fဖြိုက်ပနာ ဥပုသ်နိန့်ရောက်ဖို့ နီးကပ်လာယာဖြိုက်တေ။ 55 ဂါလိလဲပြည်ကနီ ကိုယ်တော်ရဲ့နောက်ကို လိုက်လာခရေ မမါ့တိဟာ သင်္ချိုင်းဂူထဲမာ ကိုယ်တော်ရဲ့ ရုပ်အလောင်းကို မြင်တွိ့ခကတ်တေ။ 56 ယပြီးဟာနဲ့ သူရို့ဟာ အိမ်ကို ပြန်ပနာ ကိုယ်တော်ရုပ်အလောင်းကို ပူဇော်ဖို့အတွက် အမွှီးနံ့သာတိနဲ့ဆီမွှီးတိကို ပြင်ဆင်ကတ်တေ။ ယေတာလဲ သူရို့ဟာ ပညတ်တော်မာညွှန်ကြားထားတဲ့အတိုင်း ဥပုသ်နိန့်မာ အနားယူခကတ်တေ။ |
This translation of the Southern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.