Luke 22 - Southern Rakhine1 ယပြီးကေ ပသခါပွဲတော်လို့ခေါ်ရေ တဆီးမပါတဲ့မုန့်ပွဲတော်အချိန်ဟာ နီးကပ်လာယာဖြိုက်တေ။ 2 ဂျူးပုရောဟိတ်အကြီးအကဲတိနဲ့ ကျမ်းတတ်ဆရာတိဟာ လူတိကို ကြောက်ကတ်ဟာကြောင့် ကိုယ်တော်ယေရှုကို ပဇောင်ပိုင်မျိုးအကြောင်းရှာပနာ တိန်းလို့ချေသတ်ရဖို့နည်းလမ်းကို ရှာနီကတ်တေ။ 3 ယပြီးဟာနဲ့ သာဝကဆယ့်နှစ်ပါးမာပါရေ ယုဒရှကာရုတ်ပါးကို မာရ်နတ် ဝင်ပူးလိုက်တေ။ 4 ယပြီးကေ ယုဒဟာ ဂျူးပုရောဟိတ်အကြီးအကဲတိနဲ့ ဗိမာန်တော်အရာရှိတိပါးကို လားပနာ ကိုယ်တော်ယေရှုကို သူရို့လက်ထဲကို ပဇောင်ပိုင်မျိုးအပ်ရဖို့ဆိုဟာကို ဆွေးနွေးတိုင်ပင်ခရေ။ 5 ယင်းလူတိကလည်း ဝမ်းသာလားခနာ ယုဒကိုပေသာပီးမေလို့ သဘောတူလိုက်တေ။ 6 ယုဒကလည်း သဘောတူဟာကြောင့် လူစုလူဝေး မဟိရေချိန်မာ ကိုယ်တော်ယေရှုကို ဖမ်းဖို့အခွင့်ခါကောင်းကို စောင့်နီခရေ။ 7 ယပြီးဟာနဲ့ တဆီးမပါတဲ့မုန့်ပွဲတော်လို့ခေါ်ရေ ပသခါပွဲတော်အတွက် သိုးအငယ်ချေတိကို သတ်ပနာ ပူဇော်ရရေနိန့်ကို ရောက်လာခရေ။ 8 ယင်းကြောင့် ကိုယ်တော်ယေရှုက ပေတရုနဲ့ ယောဟန်ကို “ပသခါပွဲတော်ကို ငါရို့ တတူတူစားဖို့အတွက် လားလို့ ပြင်ဆင်လိုက်ကတ်” လို့မိန့်ဆိုလိုက်တေ။ 9 သူရို့က ကိုယ်တော်ကို “အရှင်၊ ကျွန်နော်ရို့ကို အဇာနီရာမာ ပြင်ဆင်စီချင်ပါရောင်” လို့မီးလျှောက်လိုက်တေ။ 10 ကိုယ်တော်က “မြို့ထဲကို ဝင်ရေခါ ရီအိုး ထမ်းလာရေ လူတစ်ယောကို မတ်ရို့တွိ့လိမ့်မယ်။ သူ့နောက်ကိုလိုက်ပနာ သူဝင်ရေ အိမ်ကို ဝင်လီကတ်။ 11 ပြီးကေ အိမ်ရှင်ကို ‘ကျွန်နော်ရို့ရဲ့ဆရာက တပည့်တော်တိနဲ့ ပသခါပွဲတော်ညစာကို စားရဖို့အခန်း အဇာမှာဟိရောင်လို့ အသင့်ကို မီးခိုင်းလိုက်ပါရေ’ လို့ ဆိုကတ်။ 12 ယေခါ အိမ်ရှင်က မတ်ရို့ကို အိမ်အထက်ထပ်ကို ခေါ်လားပနာ ကျယ်ကျယ်ဝန်းဝန်းဟိရေ အခန်းတစ်ခန်းကို ပြလိမ့်မယ်။ ယင်းအခန်းမာ ပသခါအစားအစာအတွက် ပြင်ဆင်လိုက်ကတ်” လို့မိန့်တော်မူခရေ။ 13 ယပြီးဟာနဲ့ ပေတရုနဲ့ ယောဟန်ရို့လည်း ထွက်လားကတ်ပနာ ကိုယ်တော် မိန့်တော်မူရေအတိုင်း တွိ့ခကတ်ဟာကြောင့် ပသခါပွဲတော်အတွက် အဆင်သင့် ပြင်ဆင်ခကတ်တေ။ 14 ပသခါပွဲတော်စားသောက်ဖို့ အချိန်ကျလာရေအခါ ကိုယ်တော်ဟာ သာဝကတိနဲ့ အတူတူ စားပွဲဝိုင်းမာထိုင်ကတ်တေ။ 15 ယပြီးကေ ကိုယ်တော်က သူရို့ကို “ငါဟာ ဒုက္ခဝေဒနာမခံစားရခင် ဒေပသခါပွဲတော်ကို မတ်ရို့နဲ့တတူတူစားရဖို့ ငါကောင်းအလိုဟိရေ။ 16 မတ်ရို့ကို ငါပြောမယ်။ ဘုရားရှင်ဟာ ပသခါပွဲတော်aကအစပြုပနာ ဘုရားရှင်ဟာ နောက်ဆုံးအချိန်မာ နီရာတိုင်း၊ လူတိုင်းကို အုပ်စိုးဖို့အချိန်မရောက်ခင်ထိ ငါဟာ နောက်ထပ်ပသခါပွဲတော်ကို စားသုံးဖို့မဟုတ်ယာ” လို့မိန့်တော်မူခရေ။ 17 ယပြီးဟာနဲ့ ကိုယ်တော်ဟာ စပျိုက်ရည်ခွက်ကို ယူပနာ ဘုရားကျေးဇူးကို ချီးမွမ်းပြီးကေ “အေခွက်ကို ယူပနာ အချင်းချင်း မျှလို့သောက်ကတ်။ 18 မတ်ရို့ကို ငါပြောမယ်။ ငါဟာ ဘုရားရှင်ရဲ့သာသနာတော်မပေါ်ထွန်းခင်အချိန်ထိ စပျိုက်သီးကရတဲ့စပျိုက်ရည်ကို ငါသောက်ဖို့မဟုတ်ယာ” လို့မိန့်ဆိုရေ။ 19 ယပြီးကေ ကိုယ်တော်ဟာ ပေါင်မုန့်ကိုယူလို့ ဘုရားရှင်ရဲ့ကျေးဇူးကို ချီးမွမ်းပြီးကေ ပေါင်မုန့်ကိုဖဲ့ပနာ တပည့်တော်တိကို ပီးလိုက်ပြီးကေ “ဒေမုန့်ဟာ မတ်ရို့အတွက် ငါပီးရေ ငါ့ခန္ဓာကိုယ် ဖြိုက်တေ။ ငါ့ကို အောက်မိရေအနီနဲ့ စားကတ်” လို့မိန့်တော်မူခရေ။ 20 ယင်းနည်းအတိုင်း စားလို့ပြီးရေခါ ကိုယ်တော်ဟာ စပျိုက်ရည်ခွက်ကို ကိုင်ထားပနာ “ဒေစပျိုက်ရည်ဟာ မတ်ရို့အတွက် ငါရဲ့အသွီးနဲ့သွန်းလောင်းထားတဲ့ ဘုရားရှင်ရဲ့ကတိတော်အသစ် ဖြိုက်တေ။ 21 ယေတာလဲ ငါ့ကို ရန်သူတိလက်ထဲကို အပ်ဖို့လူဟာ အဂုငါနဲ့တတူတူ စားသောက်နီရေ။ 22 လူ့သားတော်ဟာ ဘုရားရှင်ရဲ့အလိုတော်တိုင်း လားရဖို့ဆိုတာလဲ လူ့သားတော်ကို သစ္စာဖောက်တေ ယင်းလူကတော့ ဒုက္ခနဲ့ကြုံရလိမ့်မေ” လို့မိန့်တော်မူခရေ။ 23 ယေခါ တပည့်တော်တိဟာ ကိုယ်ရို့ထဲမာ အသူက ယင်းပိုင်မျိုးလုပ်ဖို့ ကြံနီရောင်လို့ အချင်းချင်းမီးနီကတ်တေ။ 24 ယပြီးကေ တပည့်တော်တိဟာ သူရို့ထဲမာ အသူက အကြီးမြတ်ဆုံးပုဂ္ဂိုလ် ဖြိုက်တေလို့မှတ်ယူရဖို့ ဆိုပနာ ငြင်းနီကတ်ဟာကြောင့် 25 ကိုယ်တော်က “ဂျူးလူမျိုးမဟုတ်တဲ့လူတိရဲ့ ရှင်ဘုရင်တိဟာ သူရို့ရဲ့ ပြည်သူလူထုတိကို အာဏာရှင်ဆန်ဆန် အုပ်ချုပ်တတ်ကတ်ကေလည်း သူရို့ကိုယ်သူရို့ အများအကျိုး လုပ်ဆောင်ရေလူတိလို့ လူတိကို ခေါ်ခိုင်းပြီးကေ သူရို့က ကောင်းမြတ်တေခေါင်းဆောင်တိပါလို့ ထင်စီချင်ကတ်တေ။ 26 ယေတာလဲ မတ်ရို့ဟာ ယင်းလူတိပိုင်မျိုး မဖြိုက်သင့်။ ယင်းအစား မတ်ရို့ထဲမာ အရေးပါအရာရောက်ဆုံးလူဟာ အရေးမပါဆုံးလူပိုင်မျိုး နီသင့်ပနာ ခေါင်းဆောင်ဖြိုက်တေလူဟာ အစီခံပိုင်မျိုးနှိမ့်ချပနာ နီထိုင်သင့်ရေ။ 27 စားပွဲမှာ စားဖို့ထိုင်နီတဲ့လူနဲ့ အစားသောက်ပြင်ပီးရေလူမှာ အသူကပိုလို့ကြီးမြတ်ရောင်။ စားပွဲမှာထိုင်နီရေလူက ပိုလို့ကြီးမြတ်တေမဟုတ်လား။ ယေတာလဲ ငါဟာ မတ်ရို့ကြားမှာ အစားသောက်တိ ပြင်ဆင်ပီးရေလူပိုင်မျိုးဖြိုက်တေ။ 28 ငါဟာ အခက်အခဲတိနဲ့ကြုံလာရရေအချိန်မှာ မတ်ရို့ဟာ ငါနဲ့အတူတူ ရပ်တည်ခကတ်တေလူတိဖြိုက်တေ။ 29 ငါ့ရဲ့ အဖက သူ့ရဲ့သာသနာတော်ကို ငါ့ကို အုပ်စိုးပိုင်ခွင့် ပီးအပ်ဟာပိုင်မျိုး ငါ့ရဲ့သာသနာတော်ကိုလည်း မတ်ရို့ကို အုပ်စိုးပိုင်ခွင့်ကို ပီးထားခရေ။ 30 ယင်းကြောင့် မတ်ရို့ဟာ ငါ့ရဲ့သာသနာတော်ထဲက ငါ့စားပွဲမာ စားသုံးရရေအခွင့်နဲ့ ပလ္လင်မာထိုင်ပနာ အစ္စရေးမျိုးနွယ်စု ဆယ့်နှစ်စုကို အုပ်ချုပ်စိုးစံရလိမ့်မယ်” လို့မိန့်တော်မူရေ။ 31 ကိုယ်တော်က ဆက်ပြီးကေ “ရှိမုန်၊ ရှိမုန်၊ နားထောင်၊ လယ်သမားဟာ စပါးစိနဲ့ အခွံကို ခွဲရေပိုင်မျိုး မာရ်နတ်ကလည်း မတ်ရို့ တစ်ယောက်ချင်းစီကို စမ်းသပ်ခွဲခြားဖို့ အခွင့်အခါ တောင်းနီယာ။ 32 ယေတာလဲသို့ မတ်ရဲ့ ယုံကြည်မှုက ခိုင်မြဲနီဖို့ ငါဆုတောင်းရေ။ မတ်အသိတရားပြန်ရရေခါ မတ်ရဲ့ ညီအစ်ကိုတိဖြိုက်တဲ့ အရာတပည့်တော်တိကို ယုံကြည်မှု ခိုင်မြဲစီဖို့ ကူညီလုပ်ဆောင်ပီးပါ” လို့မိန့်ဆိုခရေ။ 33 ယေခါ ပေတရုက “ကိုယ်တော်၊ ကျွန်နော်ဟာ ကိုယ်တော်နဲ့အတူ ထောင်ကို ဖြိုက်ဖြိုက်၊ သီရွာကိုပင် ဖြိုက်ဖြိုက် လိုက်ဖို့အတွက် အဆင်သင့်ဟိပါရေ” လို့လျှောက်ထားခရေ။ 34 ကိုယ်တော်က “ပေတရု၊ မတ်ကို ငါပြောမေ။ ဒေနိန့် ကြက်မတွန်ခင်မာ မတ်ဟာငါ့ကိုမသိပါလို့ သုံးခေါက်တိုင်တိုင် ငြင်းလိမ့်မယ်” လို့မိန့်တော်မူခရေ။ 35 ယပြီးဟာနဲ့ ကိုယ်တော်က တပည့်တော်တိကို “ငါဟာ မတ်ရို့ကို ပေသာအိတ်၊ ခရီးဆောင်အိတ်နဲ့ ဖိနပ်ကိုတောင် မယူလားဘဲ လွှတ်ဖူးခရေခါက မတ်ရို့မာလိုအပ်ဟာတစ်ခုခု ဟိခလား” လို့မီးခရေခါ တပည့်တော်တိက “မဟိခပါ” လို့လျှောက်ခရေ။ 36 ယေခါ ကိုယ်တော်က “အဂုတစ်ခေါက်မာကျကေ ပေသာအိတ်ဟိကေ ယူလား။ ခရီးဆောင်အိတ်ကိုလည်း ယူကတ်။ မတ်ရို့မာ ဓါးမဟိကေ အဝတ်တိကို ရောင်းပနာ ဓါးဝယ်ကတ်။ 37 မတ်ရို့ကို ငါပြောမယ်။ ‘သူဟာ ရာဇဝတ်သားအဖြိုက် သတ်မှတ်ခံရဖို့’ လို့ ကျမ်းစာပိုဒ်မာ ငါ့အကြောင်းကို ရေးထားတဲ့အတိုင်း ပြည့်စုံလာရဖို့ရာ ဖြိုက်တေ” လို့မိန့်တော်မူခရေ။ 38 ယေခါ တပည့်တော်တိက “ကိုယ်တော်၊ ကြည့်ပါ။ ကျွန်နော်ရို့မာ ဓါးနှစ်ချောင်းဟိပါရေ” လို့လျှောက်တေခါ ကိုယ်တော်က “လုံလောက်ယာ” လို့မိန့်တော်မူခရေ။ 39 ယင်းနောက် ကိုယ်တော်ဟာ ပြုတော်မူလေ့ဟိရေအတိုင်း သံလွင်တောင်ထက်ကို ကြွတော်မူခရေ။ တပည့်တော်တိလည်း သူ့ရဲ့နောက်တော်သို့ လိုက်လာကတ်တေ။ 40 ယင်းနီရာကို ရောက်လာရေအခါ ကိုယ်တော်က တပည့်တော်တိကို “ဖြားယောင်းသွီးဆောင်မခံရအောင် ဘုရားရှင်ပါးမှာ ဆုတောင်းကတ်” လို့မိန့်တော်မူခရေ။ 41 ယင်းနောက် ကိုယ်တော်ဟာ သူရို့ပါးက ကျောက်ခဲတစ်ပစ်စာလောက် တကေ ဝီးရေနီရာကိုလားပြီးကေ ဒူးထောက်ပနာ 42 “အို အဖဘုရား၊ အဖဘုရားအလိုတော်ဟိကေ ကျွန်နော့်ပါးမာ ဖြိုက်ပျက်လာဖို့ ဒုက္ခဆင်းရဲတိကို ဖယ်ရှားပီးတော်မူပါ။ ယေတာလဲ အဖဘုရားရှင်ရဲ့ အလိုတော်အတိုင်းယာ ဖြိုက်စီတော်မူပါ။ ကျွန်နော့်ရဲ့ အလိုအတိုင်း မဖြိုက်ပါစီကေ့” လို့ဆုတောင်းတော်မူခရေ။ 43 ယေခါ ရွှေမြို့တော်က နတ်ဒေဝါတစ်ပါးလာပနာ ကိုယ်တော်ကို အားပီးခရေ။ 44 ကိုယ်တော်ဟာ ပြင်းထန်ရေ ဝေဒနာကို ခံစားရပနာ အာရုံစိုက်လို့ ဆုတောင်းတော်မူခါ ကိုယ်တော်ပါးက စီးကျလာရေ ချွေးသီးချွေးပေါက်တိဟာ သွီးစက်တိပိုင်မျိုး မြီကြီးထက်ကို ကျတော်မူရေ။ 45 ကိုယ်တော်ဟာ ယင်းပိုင်မျိုးဆုတောင်းပြီးကေ တပည့်တော်တိပါးကို ပြန်ကြွလာရေခါ တပည့်တော်တိဟာ ဝမ်းနည်းပူဆွေးပနာ ပင်ပန်းလို့ အိပ်နီကတ်ဟာကိုတွိ့ခရေ။ 46 ယေခါ ကိုယ်တော်က တပည့်တော်တိကို “အဇာဖြိုက်လို့ အိပ်နီကတ်ရောင်။ ထပနာ သူများရဲ့ ဖြားယောင်းသွီးဆောင်မှုထဲကို မကျရောက်အောင်ဆုတောင်းကတ်” လို့မိန့်တော်မူလိုက်တေ။ 47 ကိုယ်တော် အေပိုင်မျိုးမိန့်တော်မူနီတုံးမှာ သာဝကဆယ့်နှစ်ယောက်ထဲက တစ်ယောက်ဖြိုက်တေ ယုဒဟာ လူအုပ်ကြီးကို ဦးဆောင်ပနာ ကိုယ်တော်ပါးကို ခေါ်လာခပြီးကေ သူဟာကိုယ်တော်ကို နမ်းဖို့ ကပ်လာခရေ။ 48 ကိုယ်တော်က သူ့ကို “မတ်ဟာ လူ့သားတော်ကိုအနမ်းနဲ့ သစ္စာဖောက်ဟာလား” လို့မီးလိုက်တေ။ 49 တပည့်တော်တစ်ယောက်က ယင်းအရာတိကို မြင်ရေခါ “ကိုယ်တော်၊ ကျွန်နော်ရို့ သူ့ရို့ကို ဓါးနဲ့ တိုက်ခိုက်ရဖို့လား” လို့မီးလျှောက်ခရေ။ 50 ယပြီးဟာနဲ့ အကြီးဆုံးပုရောဟိတ်တစ်ယောက်ရဲ့ နောက်လိုက်တစ်ယောက်ကို ဓါးနဲ့ခွပ်လိုက်တေခါ ညာဖက်နားကိုကျပနာ ပြတ်လားခရေ။ 51 ကိုယ်တော်က “ဒေလောက်နဲ့ရပ်လိုက်ဖိ” လို့မိန့်တော်မူလိုက်ပနာ အစီခံရဲ့ ယင်းပြုတ်ခရေ နားရွက်ကို လက်တော်နဲ့ထိလိုက်ပနာ နဂိုတိုင်းဖြိုက်စီခရေ။ 52 ယင်းနောက်မာ ကိုယ်တော်က သူ့ကို လာဖမ်းကတ်တေ ဂျူးပုရောဟိတ်အကြီးအကဲတိ၊ ဗိမာန်တော်အစောင့်တပ်သားတိနဲ့ ဂျူးလူမျိုးခေါင်းဆောင်တိကို “အသင်ရို့ဟာ ငါ့ကိုဖမ်းဖို့အတွက် ဓါးတိ၊ တုတ်တိနဲ့ အဇာဖြိုက်လို့ လာကတ်ဟာရောင်။ ငါ့ကို ရာဇဝတ်သားလို့ ထင်နီကတ်လား။ 53 ငါဟာ နိန့်တိုင်း ဗိမာန်တော်ထဲမာ ဟိနီချိန်တိမာ မတ်ရို့ အဇာဖြိုက်လို့ ငါ့ကို လာမဖမ်းကတ်ရောင်။ ယေတာလဲ ဒေအချိန်ဟာ မတ်ရို့ရဲ့ အချိန် ဖြိုက်ပနာ မာရ်နတ်ဟာလည်း သူ့ရဲ့ ယုတ်ညံ့ရေအမှုအရာတိကို လုပ်ဆောင်ရေအချိန်ဖြိုက်တေ” လို့မိန့်တော်မူခရေ။ 54 ယပြီးကေ သူရို့ဟာ ကိုယ်တော်ကို ဖမ်းပနာ အကြီးဆုံးပုရောဟိတ်ရဲ့အိမ်တော်ကို ခေါ်လားခရေခါ ပေတရုဟာ ခပ်လှမ်းလှမ်းကနီ နောက်ယောင်ခံနာ လိုက်လားခရေ။ 55 ခြံထဲမာ လူတချို့ ဝိုင်းလို့ ထိုင်ပနာ မီးလှုံနီကတ်ခါ ပေတရုဟာ သူရို့ကြားမှာထိုင်လိုက်တေ။ 56 ယင်းနောက် အစီခံမမါ့တစ်ယောက်ဟာ ပေတရုထိုင်နီဟာကိုမြင်ရေခါ သူ့ကိုလက်ညှိုးထိုးပနာ “ဒေလူဟာ ယေရှုရဲ့အပေါင်းပါဖြိုက်တေ” လို့ပြောရေ။ 57 ယင်းခါ ပေတရုက “အစ်မကြီး၊ ကျွန်တော် ယင်းလူကို မသိပါ” လို့ငြင်းလိုက်ရေ။ 58 တအောင့်ကြာခါ လူတစ်ယောက်ဟာ ပေတရုကိုမြင်ဟာနဲ့ “မတ်ဟာ သူရို့ထဲက တစ်ယောက်ဖြိုက်တေ” လို့ပြောဟာကြောင့် ပေတရုက “ကျွန်နော် သူရို့ထဲက မဟုတ်” လို့ငြင်းပြန်ရေ။ 59 နောက်တနာရီကြာရေခါ အရာလူတစ်ယောက်က “ဒေလူဟာ ဂါလိလဲပြည်က ဖြိုက်ပနာ ယေရှုနဲ့တတူတူဟိနီခဟာသေချာရေ” လို့အခိုင်အမာပြောရေ။ 60 ယေတာလဲ ပေတရုက “မတ်ရို့ပြောနီဟာတိကိုငါမသိ” လို့ငြင်းလိုက်ပြန်ရေ။ ယင်းပိုင်မျိုး ပြောနီတုန်းမာပင် ကြက်တွန်ရေ။ 61 ယေခါ ကိုယ်တော်က ပေတရုကို လှည့်ကြည့်လိုက်တေ။ ပေတရုဟာ ကိုယ်တော် မိန့်မှာခရေ “အေနိန့်ပင် ကြက်မတွန်ခင်မာပင် မတ်ဟာ ငါ့ကိုမသိလို့ သုံးခေါက်တိုင်တိုင်ငြင်းလိမ့်မယ်” လို့ပြောခဟာကို အတွက်ပေါ်ခဟာကြောင့် 62 အပြင်ကို ထွက်လားပနာ အသည်းသန်ငိုနီခရေ။ 63 ကိုယ်တော်ယေရှုကို စောင့်ကြပ်နီကတ်တဲ့လူတိဟာ ကိုယ်တော်ကို သရော်ကတ်ပနာ သတ်ပုတ်ကတ်တေ။ 64 ကိုယ်တော်ရဲ့ မျက်စိကို အဝတ်နဲ့ စည်းပနာ ပိတ်ထားကတ်ပြီးကေ “မတ်ကို အသူသတ်နီလဲ ဆိုဟာကို ဟောကြည့်ပါ” လို့ဆိုပနာ 65 နည်းမျိုးစုံနဲ့ ကိုယ်တော်ကို နှိပ်စက်ပနာ စော်ကားပြောကတ်တေ။ 66 မိုးလင်းရေအခါ ဂျူးပုရောဟိတ်အကြီးအကဲတိ၊ ကျမ်းတတ်ဆရာတိပါဝင်တဲ့ ဂျူးလူမျိုးခေါင်းဆောင်တိဟာ တရားလွှတ်တော်bမှာ ကိုယ်တော်ကို စစ်ဆေးမီးမြန်းကတ်တေ။ 67 သူရို့က ကိုယ်တော်ကို “အသင်ဟာ ကယ်တင်ရှင်မေရှိယ ဟုတ်လား၊ မဟုတ်လားဆိုဟာ ဖြေပါ” လို့ဆိုကတ်တေ။ ယေခါ ကိုယ်တော်က “ငါပြောကေလည်း မတ်ရို့ ငါ့ကို မယုံကတ်။ 68 မတ်ရို့ကိုငါမီးကေလဲ မတ်ရို့က ပြန်မဖြေကတ်။ 69 ယေတာလဲသို့ အေချိန်ကစလို့ လူ့သားတော်ဟာ တန်ခိုးကြီးမြတ်တဲ့အဖဘုရားရဲ့ ညာဖက်မာထိုင်ပနာ အုပ်ချုပ်စိုးစံရဖို့ဖြိုက်တေ” လို့မိန့်ဆိုခရေ။ 70 ယေခါ သူရို့က “ဒေပိုင်ဆိုကေ အသင်ဟာ ဘုရားရှင်ရဲ့သားတော်လား” လို့မီးကတ်ခါ ကိုယ်တော်က “မတ်ရို့ပြောရေအတိုင်း ဖြိုက်တေ” လို့ပြန်ပြောရေ။ 71 သူရို့ကလည်း “သူဒေပိုင်ပြောဟာကို ငါရို့ ကိုယ်တိုင်ကြားရယာဖြိုက်လို့ အရာသက်သီမလိုယာ” လို့ဆိုကတ်တေ။ |
This translation of the Southern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.