Titus 3 - Sümi Tiqhelimi Bible

Akivi Kümlà Shipe nikeu Ghenguno Xalu

¹ Timiqo pelo kükami eno ayekipemiqo qhoqhü eno kiu no akivi keno tipau ghokulu shini keu kutò pe apenike ghutú alo,

² khiumu pipütha pemo nikeu, külakishi eno kümsükulumi shi apeni keu eno alhokuthu lo kümtsü lau akümtsha shi apenike ghutú alo.

³ Ghuthu lakhi ye ningu ghí nikhanigha, agholumo kemi, pishikiqhimi, eno minemighei keu ngò alokughuno jeli no qhasü pe acheke. Ningu ye axeküsü eno anhekushu lo xüche, ningu no kütami jumithi eno kütami no ningu jumithi ishi acheke.

⁴ Ikemu kughou ninguw Xakuluu eno ni Lhou küpüqhiyi keu eno kikimiye ipeghi keno,

⁵ pa no ningu xaluve ke, tiye ningu no amikucho kümlà shikeu ghenguno kumoe ikemu paw kimiyekini ghenguno ke. Qhukimthe keu lono punú kithe keu eno Aghungu Kimthe lono shikithe keu vechewo pa no ningu xalu ke,

⁶ eno ningu Xakuluu Jisü Khristo vechewo Alhou no kupukuno shi ningu shou Aghungu Kimthe lepuku tsüke,

⁷ tishianguno, paw küpükini vechewo ningu pelo achipikaluve pe no lajupu akeu gholo no lhokta küxü mheghi ighílu kemi shilu peniye ke.

⁸ Hiye pükhübekulu tsa lakhi ke. Eno ni ye O pelo hipaqo vehu müghachhoi pitsü penishi ani, tishianguno khunoqo no Alhou lau pükhübeluve akeno panongu pelo kutokupui shi püzü kiu no akivi keno tipaqo lo pulopiniyi ape niye ke. Hipaqo vehu ye akiqheu eno kümtsü ghenguno alá shikulupu ke.

⁹ Ikemu nikhanigha shi kütsalakile keu eno apù-asü kughuko ghili, eno ayeza ghili kütsala momu kighe keu shi kevilo, kughengu hi kümtsü kiumu alá shilu kepu küha eno avehupu küha ke.

¹⁰ Akikijé shive chekemi timi lau ghuthu lakhi pikichivelo, eno tisheno itaghi akiniù panongu pikichivelo. Tipau thiu ye, panongu sasü kiumu kütshükime akevilo.

¹¹ Timi titoi kemiqo ye müqüijo eno axinemi kepi ithive kepue; pano xiné no pano likhi pano kiléqhive anike.

Kishekha Tsa

¹² I no O lau Artemas momu Tychicus puwu kemtsa, Nicopolis lo I lau ighi nikeu pükapütsalo, kughengu ni ye süsü dolo tilau ngo niye püghüluvea ke.

¹³ Atsa küküghau Zenas eno Apollos pama kicheghüzü lo chekeu lo pama no avehupu shi akeu kümtsü apenike nono shikulupu thaqhü pama kuphu eno jutsülo.

¹⁴ Niw timiqo ye kiu no akivi keno tipau shi aní keu lo pulopiniyi amoayesae, tishianguno avehupu shi akemiqo kuphulu eno ameküha keu küxü xümo nani ke.

¹⁵ I gholo akemi kümtsü no petha O tsüpuwu ani. Aküpülü lono ningu kimiye chekemiqo lau petha tsü ani. Alhou’w küpükini nongu kümtsü gholo apeniu.