Titus 2 - Sümi Tiqhelimi Bible

Atsakiviu ghenguno Akümlà Kivi Shikeu

¹ Tishimu no ye, mütsümishei keu aküpülü külü lo kiu no achipi keno tipau shika moayesa ke.

² Layemiqo vilo aghibiu shini keu, timi no gihu küzüpu, alikhi aghasülu nikeu, aküpülü lo mütsümishei nikeu, kikimiye eno kutuukulu shini keu hipaqo shikalo.

³ Tihutoi, totimi kichimiqo vilo panongu küxü ghola lo gihu küzüpu shi xü nikeu, timi no pipüthamo nikeu momu aji shokümzümi shimo nikeu shikalo eno kiu no akivi keno tipau shikalo.

⁴ Tishianguno panongu ye panongu nguno ayitiuqo vilo panongu kimi eno panongu nuliqo kimiye lo ipi hakitelu nani,

⁵ alikhi aghasülu eno akimthe shilu, akibo lo mighimüghai shilu, kimiyekini shilu eno panongu kimiqo lau aghokulu shilu eno tishianguno khiu nomu Alhou tsa pipütha pemo niye ke.

⁶ Tihutoi, kipitimi lhothemiqo vilo alikhi aghasülu nikeu shikumtolo.

⁷ Thowkha kümtsü lo kiu no akivi keno tipau shi püzü panongu zülo kiche-kipiye lakhi shilo. Ow shiküka lo hipaqo pìyelo, kikhikighi, tsaqütsalei keu,

⁸ eno O tsapi lo thaighamla kepu shi mütsümishei shilo, tishianguno O mujochile chekemi pelo ningu ghili lhoküsa kiumu pi kepu küha kelau no kujove penike.

⁹ Aqüaxemiqo pelo thowkha kümtsü lo panongu mpemiqo qholo aghokulu shi ngo pe nikeu shikalo, ampemi pulou shini keu pükapütsa pelo eno ampemi ghechile pemo nikeu shikalo,

¹⁰ eno ampemi lau no püka kepu kumo, ikemu panongu shou pükhübelu pe kepu shi pìyelu pelo, tishilu keu vechewo alaghi jeli thowkha lo panongu pelo ningu Xakuluu eno ni Lhou ghili shika akeu jukivipu shi ithulu pe kepu shilo.

¹¹ Kughengu, Alhou’w küpükini ye timi kümtsü lau xakulu tsü niye ipeghivae.

¹² Hipau no ningu pelo akimthe kumo eno ayeghi lo mine chekeu jeliqo vilo “Moe” ipi nikeu shikalu cheni, eno alikhi aghasükulu küxü xü nikeu, amikucho eno hipau tiqheli lo akimthe küxü xü nikeu shika chenie.

¹³ Ningu no kükümgha lajupu khe akelo—Ni Lhou akughushuu eno Xakuluu Jisü Khristo, ajuküvü lono ipeghi niye akeu,

¹⁴ pa no pa küxü pesü ningu ghenguno ikhiphe pe tsüve eno küsakügha kümtsü lau no ningu xachilelu eno pa likhi paw timiqo shikimthe tsüke, tiye ningu pelo kiu no akivi keno tipau lo minemighei shi ape niye ke.

¹⁵ Tishiaye, no ye hipaqo vehu pesü shika moayesae. Kükagha kümtsü pephe no shikumto eno alòmi pilo. Khiu pelomu O jukünatha pe kevilo.