Rommi 9 - Sümi Tiqhelimi Bible

Paul no Israel Ghenguno Amloghuju Shikeu

¹ Ni ye Khristo lono kuchou tsa piani. Ni ye mikí amoe. I no kuchou tsa piakeu ye Aghungu Kimthe vechewo I lolo kighithi no ithitoilu ani.

² I lolo shishe amloküsa eno ashekha küha keu mloghuju ani.

³ Shikulupu shi aghí ke aye I likhi niu no ni shiaye eno niw timi Israelmiqo ghenguno Alhou ngusü shive no Khristo lau no küghüxave nishi cheni.

⁴ Israelmiqo ye Alhou no saputhu pesü anukishimi shilu pe ke; panongu pelo pa kimthe juküvü küsaje pe ke, pa no panongu sasü puloshoqhiqo shi eno ayeza pesü tsüke. Pa no panoqo pelo kuchou shi pa chineki lo mülá lupe eno panoqo sasü pikiqhi shike.

⁵ Abraham, Isaac, eno Jacob noqo ye panongu pù-asüqo ke, eno timi lhoaye kiqi lo phuwoju kelo Khristo ghí panongu lau no ighi kemi ke. Eno Khristo ye kümtsü shou Alhou eno pülhapuju lo sheqhe küzü ke! Amen.

Akughushu Lhou no Kishe keu

⁶ Alhou tsa ye shikupumove keu kumoe. Kughengu Israel polokughukomi kümtsü Alhou no kisheluve kemi ke kumoe.

⁷ Momu panongu no Abraham tikughukomi ke ghenguno kümtsü no pa nuliqo ke kumoe. Ikemu Kuchoyesü lo ishi yèpüani, “Isaac vechewo O nuli-kughukoqo kihikülai tsü nani.”

⁸ Tipau kiqi ye Abraham nuliqo ye pa jì lono ighike ghenguno Alhou nuli shilu ke kumoe, ikemu Alhou no piqhipüa keu nuliqo no Abraham nuli ipi kihi cheni.

⁹ Kughengu hitoi piqhipüa ke: “Kughupüa keu dolo no I no ideighi nani, eno Sarah ye anu lakhi ithulu nani.”

¹⁰ Apú tipau ye ningu pasü Isaac ke. Kughou pa no Rebekah gholo akibo shi keno li no anukishe punú.

¹¹ Ikemu, anukishe punú mphi züu no momu akivi eno alhoküsa kiumu shimphi züu no, Alhou no kishepüa keu kiqi lono apenike ghenguno li vilo ishi pike:

¹² “Akichiú no ayitiu qe nani.” Ikehu Alhou no kishelu keu ye timi lakhi kümlà vechewo kumoe ikemu Alhou no kulù keu vechewo ke.

¹³ Tiye Kuchoyesü lo ishi yèpüa keu toi ke: “Jacob ye I no kimiye, ikemu Esau ye I no mithi ke.”

¹⁴ Tishiaye, ningu ye kiu pìní kea? Alhou ye achipikumo keshea? Khilemu tishimoe!

¹⁵ Kughengu pa no Moses vilo ishi pi, “I no kimiye chekemi shou iw kimiyekini anani, eno I no kimiyeqhiyi chekemi shou iw kimiyeqhiyi keu anani.”

¹⁶ Tighenguno hiye timi no shinishi keu momu pükapütsa keu shou kumoe, ikemu Alhou’w kimiyekini shou ke.

¹⁷ Kughengu, Kuchoyesü lo Alhou no Pharaoh vilo ishi pike, “I no hipau kimiji ghenguno O süqhe ke, tishianguno O vechewo I küká pephe-piye niye ke eno I je pesü ayeghiqha kümtsü lo asheshu peniye ke.”

¹⁸ Tighenguno, Alhou no kimiyeqhiyi nishi chekemi shou kimiyeqhiyi keu acheni, eno pa no amlo shikümkave nishi chekemi mlo shikümkave tsü cheni.

¹⁹ Nongu gholo khami ye I vilo ishi piluvi: “Tishiaye, Alhou ye kushiye ningu nguku acheni kea? Kughengu khuu no Alhou pulou lachile kulupu kea?”

²⁰ Ikemu no ye khuu keno, timi lakhi keno kuu, Alhou ghechile nani kea? “Lhoqhipüa keu ye lhokipheu vilo, ‘No ye kushiye ishi ni lhophe kea?’ ipilu nani keshea?”

²¹ Ayeghi lì kümlàu ye ayeghi mqo lakhi lono alì khami no akimchi vehu ghenguno eno khami no inapügha peitha nikeu kimiji ghenguno mülàphelu kepu chipiu küha keshea?

²² Tihutoi, Alhou ye pa loghu eno pa küká pephe-piye kulupu chipiu aghí pinamu, pa ye pa loghu ikughi niye shi akemiqo shou shishe kutuuve cheni. Timi tipaqo ye kütsaleve nikeu shi kughupe qhive kemiqo ke.

²³ Pa no hitoi shikeu ye pa juküvü kiní pesü pa no kimiyeqhiyi chekemiqo lau alau vüqai pephe-piye niye ke. Panongu ye pa juküvü ithulu penike ghenguno pa no azüu no kutò pe qhive kemiqo ke.

²⁴ Eno ningu ye Alhou no kulùve kemiqo ke. Ningu kümtsü Jewmi kumo ke ikemu ningu kutomo no Jewkumomi ke.

²⁵ Alhou no Hosea kaku lo ishi pipüani: “Iw timi kumo kemiqo vilo I no ‘iw timi’ ipi ku nani; eno I no kimiye chemo kemiqo vilo, ‘I no kimiye chekemi,’ ipi ku nani,”

²⁶ eno, “A-a khilehi no panoqo vilo, ‘Nongu ye iw timi kumoe,’ ipipüa keno a-a tipau lono panongu vilo ‘xü akeu Lhou nuliqo,’ ipi ku nani.”

²⁷ Isaiah no Israelmi vehu lo ishi asheshue: “Israelmi kikihi no azüghi phivilo asàye toi aghí namu, ghüluve kemi likhi xaluve nani.

²⁸ Kughengu Ampeu no paikhavi eno ghuthukhavi lono ayeghi shou paw ashekhau xakütha be nani.”

²⁹ Tiye Isaiah no püzüu pipüa keu tho ke: “Akughushu Mpeu no ningu ghenguno atikughukomiqo qhitsümo ke aye ningu ye Sodom toiveni cheke eno ningu ye Gomorrah toiveni cheke.”

Israel no Pülü Müla Keu

³⁰ Tishiaye ningu ye kiu pìní kea? Jewkumomi khunoqo no achipiumikucho phumo keno panongu ye aküpülü vechewo achipiumikucho ithuluvae;

³¹ ikemu Israelmi khunoqo ayeza no achipiumikucho laghi ipi phu cheni keno panongu ye pano kimiji tolumphie ipini keshea?

³² Kushiye tishimoni kea? Kughengu panongu no aküpülü vechewo phumo no akümlàqo vechewo shilu kepu toi phu ke. Panongu ye küpüsülu chekeu tu shou püsüpukulu ke.

³³ Ishi yèpüani: “Julo! Timiqo pelo püsüpukulu peniye I no Zion lo atu lakhi qhike eno panoqo pelo veqhive peniye atuqu lakhi qhike. Ikemu timi khuu no pa shou pülüni keno pa ye khilemu kujove pemo nani.”