Rommi 8 - Sümi Tiqhelimi Bible

Aghungu lo Küxü

¹ Tighenguno Khristo Jisü’w shiluve kemi shou ye küghathabemo nani,

² kughengu Khristo Jisü vechewo Aghungu yeza khikhi aküxü tsü cheni keno tipau vechewo axiné eno akithí yeza lono nongu kuqhophevae.

³ Kughengu timi lhoaye no miqeve keu vechewo ayeza no kiu shilu kepu küká küha no ache keno, axinemi lhoaye jukimihi lono axiné kümlagho lakhi shipe niye Alhou no pa likhi pa Nu puwu keu vechewo ayeza no shimla no achekeu hu shive tsüae. Ikehu Alhou no timi lhoaye lono axiné kiléqhive ke,

⁴ tishi keu vechewo ashi kiqi lono kumo no Aghungu kiqi lono xüche kemiqo pelo ayeza lo achipiu kümlà ningu lau no avehupu shi akeu kümtsü shikupulu peniye ke.

⁵ Timi lhoaye lono xüche kemiqo kükümsü ye timi lhoaye no kiu shinishi cheni keno tipaqo shou kümsüpuku pe acheni; ikemu Aghungu pape ghi xüche kemiqo kükümsü ye Aghungu no kiu pulo cheni keno tipaqo shou kümsüpuku pe acheni.

⁶ Timi lhoaye no ghasüpe akeu kükümsü ye akithí süghi cheni, ikemu Aghungu no ghasüpe akeu kükümsü ye aküxü eno aloino keu süghi cheni.

⁷ Timi lhoaye no ghasüpe akeu kükümsü ye Alhou ghümi ke; eno tiye Alhou yeza qhoqhü chemoe, momu qhoqhü müla nanie.

⁸ Tighenguno timi lhoaye kükaqha lo xüche kemiqo ye khilemu Alhou pulou shimla nanie.

⁹ Ikemu Alhou Ghungu no nongu lolo aghí aye, nongu ye timi lhoaye kükaqha lo kumo no Aghungu kükaqha lo anike. Eno timi khukhumu Khristo Ghungu küha aye, pa ye Khristo laumi kumoe.

¹⁰ Axiné ghenguno nongu phimpi ye thive kepu shi aghí namu Khristo no nongu lolo aghí aye Aghungu no aküxü nongu tsü nani. Nongu no Alhou zülo achipikaluve keu ghenguno Aghungu no aküxü nongu tsüke.

¹¹ Eno Alhou Ghungu khuu Khristo akithí lono xüputhu keno pa no nongu lolo xü aghí aye pa no akithí lono Jisü xüputhuveke toi nongu lolo pa Ghungu xü akeu ghenguno nonguw thiveniküau phimpi lo ghí aküxüpu tsü nani.

¹² Tighenguno, athiküzümi ngò achelimiqo! ningu no shi moayesa keu ani eno tiye timi lhoaye ghola pape ghi xü nikeu kumoe.

¹³ Kughengu nongu no timi lhoaye ghola pape ghi xü aye, nongu ye thive nani; ikemu nongu no Aghungu vechewo aphimpi xiné lhoaye pìthíve aye, nongu ye xü nani.

¹⁴ Kughengu Alhou Ghungu no khunoqo sapheni keno panongu ye Alhou nuliqo ke.

¹⁵ Alhou no pa Ghungu nongu tsü keu ye nongu pesü aqüaxemi shive no nongu pelo itaghi msà kithe ghi xüpe niye tsümoe; ikemu nongu no Aghungu ithulu keu vechewo Alhou no saputhuluve keu anukishimi shitsüe, eno Aghungu küká lono ningu no, “Abba, Apùo!” ipi ighamuku cheni.

¹⁶ Aghungu ampiu no ningu ghungu gholo küqha no ningu ye Alhou nuliqo kepi thopi shitsü cheni.

¹⁷ Ningu ye Alhou nuliqo ke ghenguno ningu ye pa mheghi kiyighiuqo ke. Eno Khristo gholo ningu ghí Alhou juküvü mheghi ighiküqha ke. Ikemu pa juküvü gholo küsaje nishi aye ningu ye pa ghime lo ghí küsaje moayesa nani.

Ighi nikeu Juküvü

¹⁸ I no kiqiphelu keu ye ningu no itodolo ime akeqo ye khilemu ighi nikeu juküvü khikhi ningu lolo pephe-piye niye ani keno tipau sasü kimghi mülae.

¹⁹ Kughengu lhoqhipüa keu jeli kümtsü no Alhou nuliqo pephe-piye niye akeu shishe lakuju shi khekulhoshi anie.

²⁰ Kughengu lhoqhipüa keqo ye ameküha keu shive pe ke, tiye pa likhi pa pulou lono kumoe, ikemu khuu no tishi peniye shi keno pa pulou lono ke, tiye lajupu àghi

²¹ lhoqhipüa keqo pelo tsümave niye akeu kütsügha lono kuqhopheve no Alhou nuliqo juküvü gholo küsajelu pe nikeu ghenguno ke.

²² Ningu no ithi akeu no ishi kutólo lhoqhipüa keu kümtsü no apunu küsǜ sǜ akelo igha akeshi igha ani.

²³ Eno lhoqhipüa keu likhi kumoe, ikemu ningu khunoqo no Alhou Ghunguw amsüu ghò ithulu keno ningu ghí Alhou no saputhuluve keu anukishimi shiluve no ningu phimpiqo xachileluve penike ghenguno ningu lolo no igha acheni.

²⁴ Kughengu lajupu hipau vechewo ningu xalu ke. Ikemu ithuluve keu lajupu ye lajupu kumovae. Kughengu khuu no ithuluve keu thime shou lajupu qhicheni kea?

²⁵ Ikemu ningu no ithumla no akeu shou lajupu qhi aye, ningu ye kutuukulu shi tipau ngokhe acheni.

²⁶ Tipaphi lono, ningu kimiqe lo Aghungu no kuphu acheni. Ningu ye kiu ghenguno inikhu moayesa keno ithi chemoe, ikemu Aghungu ampi no piphe müla keu küsǜ ghügha vechewo ningu ghenguno alakipiu shi inikhu acheni.

²⁷ Eno Alhou khuu ningu mlo lheju cheni keno pa no Aghungu kükümsü ithi acheni, kughengu Aghungu no Alhou pulou kiqi lono Alhou’w timiqo ghenguno alakipiu shi inikhu tsü acheni ke.

²⁸ Eno ningu no ithi akeu no Alhou ye thowkha kümtsü lo pa kimiye chekemiqo kivipu ghenguno mülà tsü cheni. Panongu ye pa kimiji kiqi lono kulùve kemiqo ke.

²⁹ Alhou no azüu no khunoqo ithi akeno panoqo ghengu ye pa nu jukimihi lo küsaje penike püzüu no kughuchho pe qhive ke, tishianguno pa pelo athiküzümi eno achelimiqo kutomo gholo amsüu shilu peniye ke.

³⁰ Eno khunoqo azüu no kughuchho pe qhive keno, pa no panoqo ghí kulùve; pa no khunoqo kulùve keno, panoqo pelo no ghí achipikaluve pe: pa no khunoqo achipikaluve pe keno, panoqo pelo no ghí pa kimthe juküvü küsajelu pe ke.

Kiunomu Alhou Kikimiye lono Ningu Küixave tsü Mülae

³¹ “Tishiaye, ningu ye thime hipaqo lo kiu pi kepu ani kea? Alhou no ni küdau ani aye, khuu no ningu lachile kulupu kea?”

³² Alhou ye pa likhi pa Nu ghí msá pe qhivemo no ningu kümtsü ghenguno ikhiphe pesü tsüve ke, pa ye kíshi no thime kütau ghí kümtsü puloniqhiyi ningu tsümoni kea?

³³ Khuu no Alhou no kisheluve kemiqo shou akipimí tsülu nani kea? Achipikalu pe chekeu ye Alhou no ke.

³⁴ Tishiaye khuu no ningu kiléqhive kulupu kea? Khuu nomu kumoe. Khristo Jisü khuu thive keno—eno tilikhi kumo no khuu akithí lono xüputhuve keno—pa ye Alhou u ajeu küdau iqa no ningu ghenguno alakipiu shi ghi inikhu tsü acheni.

³⁵ Khuu no Khristo kikimiye lono ningu küghüxalu nani kea? Tiye aküküpüna no keo aghime no keo pishi-puju keu no keo püqümiye no keo athokha no keo akümsapu no keo akithipu no kea?

³⁶ Kughengu Kuchoyesü lo ishi yèpüani: “O je ghenguno tsalà kipetsü akithí pesü ningu kichi acheni; ningu pesü ghiqhive niye akeu ambeqo toi kümsü cheni.”

³⁷ Moe! hi kümtsü lo Khristo khuu ningu kimiye cheni keno pa vechewo ningu ye tokulumiqo nguno akiqheu ke.

³⁸ Kughengu I no ithi akeu no akithí na aküxü na, kungumiqo na tüghaküsaqo na, itehi na ighi nikeu na, kiu-kiu küká na,

³⁹ qhemghai keu na thonhei keu na, lhoqhipüa keu kümtsü dolo kiu-kiu shi aghí namu ningu Mpeu Khristo Jisü vechewo Alhou kikimiye akeu lono ningu küghüxa müla nani kepi I no pülübeluvae.