Rommi 6 - Sümi Tiqhelimi Bible

Axiné no Akithí, Khristo no Aküxü

¹ Tishiaye, ningu ye kiu pìní kea? Küpükini alau shi kighishe penike ghenguno ningu ye axiné shiauve kepu keshea?

² Khilemu tishimoe! Ningu ye axiné lo thive kemiqo ke; ningu ye kíshi no axiné lo xü aní kea?

³ Momu nongu ye ningu khunoqo no baptiz shikeu vechewo Khristo Jisü gholo küqhaluva keno pa kithí gholo baptiz shi küqhaluva kepi mtha keshea?

⁴ Tighenguno ningu ye baptiz shikeu vechewo pa gholo thive no qho küqhavae, tishi keu vechewo Apù juküvü vechewo akithí lono Khristo xüputhuve keu toi, ningu ghí aküxü kithé xülu peniye ke.

⁵ Kughengu tsalá ningu no pa kithí kimihi shi pa gholo küqhaluve aye, ningu ghí mütsüqhei no pa no xülekuthu shive keu toi pa gholo küqhaluve nani.

⁶ Kughengu ningu no ithi akeu no ningu küxü aqau ye pa gholo yedaküqhavae, tishianguno axiné no qhasü pe achekeu phimpi hu ye shipühave peniye ke, eno ningu ye axiné qüaxe shipemove niye ke—

⁷ kughengu khunoqo no Khristo gholo thiküqhavea keno panongu ye axiné lono khaqhipheve ake.

⁸ Ike ningu no Khristo gholo thiküqhave aye, ningu ghí pa gholo xü nani kepi pülü cheni.

⁹ Kughengu ningu no ithi akeu no Khristo ye akithí lono xüputhuvea ke ghenguno, pa ye akiniù thikithe müla nani; akithí ye pa shou aküka kühavae.

¹⁰ Pa no thikeu kithí ye axiné lo ghuthukhavi ghenguno thivae; ikemu pa no xü akeu küxü ye Alhou juküvü ghenguno xüani.

¹¹ Tihutoi, nongu ye axiné lo thive kemi kemu Khristo Jisü lono Alhou gholo xü akemi shi nongu likhi nongu kihi lo.

¹² Tighenguno axiné pelo O phimpi thiveniküau qhasü pesü O phimpi pelo küsakügha kümlà shinishi keu gholu pe kevilo.

¹³ Nongu phi-au lakhimu pesü küsaküghaw küghaküsü shi ghi axiné lau ikhiphe tsü kevilo, ikemu tishini ke züqhulo akithí lono aküxü shive kemiqo toi O likhi O küxü pesü Alhou lau ikhiphe pe tsülo; eno O phi-au eno O mlo kükümsü kümtsü pesü achipiumikucho küghaküsü lakhi toi ikhiphe pe pa tsülo.

¹⁴ Axiné ye nongu mpeu shimae, kughengu nongu ye ayeza qholo kumo no küpükini qholo xü anike.

Achipiumikucho Qüaxemiqo

¹⁵ Tishiaye ningu ye kiu pìní kea? Ningu ye ayeza qholo kumo no küpükini qholo anike ghenguno axiné shi aní keshea? Khilemu tishimoe!

¹⁶ Kughou nongu no nongu likhi nongu pesü khiuala lau aghokulu shi aqüaxemi shi ikhiphe pe tsüveni keno, nongu ye nongu no agholu chekeuw aqüaxemiqo kepi mtha keshea? Tiye nongu no axiné khikhi akithí lo sawu cheni keno tipau qüaxe shi aghina, momu aghokulu khikhi achipiumikucho lo sawu cheni keno tipau qüaxe shi aghí namu ke.

¹⁷ Ikemu Alhou shikimthi ani, kughengu nongu no axiné qüaxemiqo shi ache namu nongu ye nongu mlo lono ipeghino akükütsü jeli apasü shi nongu tsü keqo ikhilu no tipau ghokulu shiluvea ke.

¹⁸ Nongu ye axiné lono kuqhophevae eno achipiumikucho qüaxemi shiluvae.

¹⁹ Timi lhoaye lo tomo-chhimo keu achekeu nongu gholo akeu ghenguno ni ye tsalakipe küxüw kiche-kipiye peitha ani. Nongu no nongu likhi nongu pesü mithekumo ngò küsakügha qüaxe shi ikhiphe pe tsü cheke toi, itehi ye nongu likhi nongu pesü achipiumikucho qüaxemi shi ikhiphe pe tsülo eno tishi keu vechewo akimthe küxü lo xülo.

²⁰ Kughou nongu no axiné qüaxemi shi akeno, nongu ye achipiumikucho ghaküsü lono kuqhopheve no acheke.

²¹ Thime khipaqo ghenguno itehi ye nongu nokujo ani keno tipaqo lau no kiu alá shilu kea? Thime tipaqo ye ashekha lo akithí ke.

²² Ikemu itehi ye nongu ye axiné lono kuqhopheve no Alhou qüaxemiqo shivae, nongu no alá shilu keu hu no akimthe lo sawu cheni, eno ashekha lo tiye lhokta küxü ithulu cheni.

²³ Kughengu axiné jume ye akithí ke, ikemu Alhou’w kümsá ghò ye ningu Mpeu Khristo Jisü lono lhokta küxü ke.