Rommi 5 - Sümi Tiqhelimi Bible

Külakishi eno Lajupu

¹ Tighenguno, ningu ye aküpülü vechewo achipikaluvea ke ghenguno ningu ye ningu Mpeu Jisü Khristo vechewo Alhou sasü külashiluvae, eno

² Jisü Khristo vechewo ningu pelo aküpülü lono ningu no itehi puthugho akeu küpükini lo ilolu pe ke. Ikehu ningu ye Alhou juküvü küsaje nikeu lajupu akeu lo alovini nolo.

³ Tilikhi kumoe, ikemu ningu ye ningu ghimeqo lo ghí alokivishi cheni, kughengu ningu no ithi akeu no aghime no tsükhoi keu iqiphe cheni;

⁴ tsükhoi keu no aghilisüqe iqiphe cheni; eno aghilisüqe no lajupu iqiphe cheni.

⁵ Eno lajupu hipau ye ningu pelo kujove pe chemo, kughengu Aghungu Kimthe ningu tsüpüa keu vechewo Alhou’w kikimiye ningu mlo lo lesüve tsüae.

⁶ Ado achipi lono eno ningu no miqemilei ake lono Khristo no ningu axinemiqo ghenguno thive ke.

⁷ Timi khunomu amikuchomi lakhi ghenguno thimo luvi, tishimu timi khami ye ighümo no timi kivimi lakhi ghenguno thive luvi.

⁸ Ikemu Alhou no hipau lono pa likhi paw kikimiye ningu lau pephe-piye ke: Ike tiye ningu no axinemi shi aphi lono Khristo no ningu ghenguno thive ke.

⁹ Itehi ningu ye pa jì vechewo achipikaluve akehu tinguno alau shi ningu ye pa vechewo Alhou loghu lau no süsholu nani!

¹⁰ Kughengu tsalá ningu no Alhou ghümi shi aphi lo thotsü pa Nu kithí vechewo pa sasü külashilu aye, ningu ye külashiluva ake tinguno alau pa küxü vechewo ningu süsholu nani.

¹¹ Tilikhi kumoe, ikemu ningu Mpeu Jisü Khristo khuu vechewo ningu no itehi külashiluvea keno pa vechewo no ningu ye Alhou lau ghí alovishe acheni.

Adam Vechewo Akithí Ighi, Khristo Vechewo Aküxü Ighi

¹² Ikehu, timi lakhi vechewo ayeghi lo axiné iloghive eno axiné vechewo akithí ighike toi, hipau ghola lono akithí no timi kümtsü lau ighive, kughengu timi kümtsü axiné shive ke.

¹³ Mütsüqhei nike ghenguno ayeza tsümphi züu no axiné ye ayeghi lo ache, ikemu khilehi ayeza küha keno tilehi ye timi lakhi shoumu axiné kihikülai tsümoe.

¹⁴ Tishimu, akithí ye Adam ghuloki lono Moses kutólo ka acheke. Kütami ye Adam no azakütsü hebide keu vechewo axiné shimo namu akithí ye panongu shou ghí ka acheke. Adam ye athiu timi lakhi ighi niye akeu kimihi ke.

¹⁵ Ikemu Alhou’w kümsá ghò ngò Adam xiné ye kütüqü ke. Kughengu tsalá timi lakhi hekibide ghenguno timi kutomo thive aghí aye, tinguno alau shi timi lakhi Jisü Khristo’w küpükini vechewo Alhou’w küpükini eno kümsá ghò ye timi kutomo lau khijehi qochili ighilu nani kea.

¹⁶ Momu Alhou’w kümsá ghò pesü timi lakhi no axiné shive keu sasü kimghi mülae: Timi lakhi xiné vechewo küghakütha eno kiléqhi keu saighike, ikemu Alhou no kümsá ghò tsü keu vechewo kutomo kipimí pevetsü no achipikalu pe ke.

¹⁷ Kughengu tsalá, timi lakhi’w hekibide ghenguno akithí no timi kutomo shou ka cheghi aye, tinguno alau shi khunoqo no Alhou’w küpükini kupukuno shitsü keu eno achipiumikucho shikulupu kümsá ghò ithuluvea keno panongu ye hi timi lakhi Jisü Khristo vechewo panongu küxü lo khijehi axiné eno akithí shou theqhikulu shilu nani kea!

¹⁸ Tighenguno, timi lakhi’w hekibide vechewo timi kümtsü kiléqhive keu toi, achipiu kümlà lakhi vechewo timi kümtsü pelo achipikalu pe eno aküxü aluve pe ke.

¹⁹ Timi lakhi ghokulu kumo vechewo timi kutomo pelo axinemi shive pe keu toi, timi lakhi ghokulu vechewo timi kutomo pelo achipiu mikuchomi shilu pe nani.

²⁰ Hekibide kighishe penike ghenguno ayeza iloghi ke. Ikemu khile axiné kighishe keno tilehi küpükini alau shi kighishe ke,

²¹ tishianguno axiné no akithí vechewo ka keu toi, ningu Mpeu Jisü Khristo vechewo lhokta küxü süghi nike ghenguno Alhou’w küpükini pelo achipiumikucho vechewo kalu peniye ke.