Rommi 4 - Sümi Tiqhelimi Bible

Abraham Küpülü pesü Kiche-kipiye

¹ Tishiaye ningu pù-asü Abraham ye ashi gholau no pìní aye, Alhou lau achipikalu keu vehu lo kiu phuphelu kea?

² Kuchou lo ye Abraham no akümlà vechewo achipikalu püaghi aye, pa ye qhezakulupu kiuala anie—tishimu Alhou zülo ye qhezakulupu kühae.

³ Kughengu Kuchoyesü lo ishi pipüani, “Abraham no Alhou pülüluve, eno tipau no pa ye amikuchomi kepi kihitsüe.”

⁴ Akümlàmiqo ye ajume pesü aghò lakhi toi ikhilu chemoe ikemu panongu no qelu moayesa keu kiqi lono ikhilu cheni.

⁵ Tishiaghimu, timi khuno no pano kümlà shou pükhübemo püzü Alhou khuu alhou kümthami pelo achipikalu pe chekeu shou pükhübe cheni keno, pa no panongu küpülü vechewo achipiu mikuchomi kepi kihitsü cheni.

⁶ Akümlà vechewo no kumo püzü achipiu mikuchomi ipi Alhou no kihive tsü keu timi hu ye akümghapue ipi David ghí hitoi pipüani:

⁷ “Khunoqo hebideve keu kipimí qhive tsü akeno, khunoqo xiné nhavetsüa keno tipaqo kümghapue.

⁸ Ampeu no khuu xiné khilemu kihikülai tsümoni keno timi tipau ye akümghapue.”

⁹ Kükümgha hipau ye aphighüyiko ghave kemi ghengu likhi keo aphighüyiko ghamo kemi ghenguno ghí kea? Ningu no Abraham ye pa küpülü ghenguno pa pesü amikuchomi kepi kihitsü ipi cheni.

¹⁰ Kiu tüqhüdo lono achipiu mikuchomi ipi kihitsü kea? Tiye pa no aphighüyiko ghave kethiu no keo, tipau züu no kea? Tiye aphighüyiko ghave kethiu no kumoe, ikemu tipau züu no ke!

¹¹ Eno pa ye aphighüyiko-küghá shimphi züu no aküpülü vechewo achipiumikucho chishida keu michi shi aphighüyiko-küghá ikhilu ke. Tishiaye, pa ye aphighüyiko ghamo namu pülü chekemiqo kümtsü papù ke, tishi keu vechewo panoqo pelo achipiu mikuchomi kepi kihi kulupu shipe niye ke.

¹² Eno tilikhi kumo no Abraham ye aphighüyiko ghave kemi khunoqo no aphighüyiko ghave keu likhi kumo no pa no aphighüyiko ghamphi züu pape chekeu küpülü pukhu nepa lo checheni keno panongu papù ghí ke.

¹³ Abraham eno pa nuli-kughukoqo ye ayeza vechewo pa ye ayeghiqha mheghi kiyighiu shi nani kepi Alhou no piqhipüa keu ighílu ke kumoe, ikemu aküpülü lono achipiumikucho shilu chekeu vechewo no ke.

¹⁴ Kughengu ayeza shou pükhü chekemi no amheghi kiyighiu shike aye, aküpülü ye akiqi küha eno Alhou’w pikiqhi ye ameküha keu shiveni cheke,

¹⁵ kughengu ayeza no Alhou loghu süghi cheni ke. Eno khilehi ayeza küha keno tilehi hekibide kühae.

¹⁶ Tighenguno, Alhou’w pikiqhi ye aküpülü vechewo ighi cheni, tishianguno pikiqhi ye küpükini vechewo Abraham nuli-kughukoqo kümtsü lau mütsümishei shilu peniye ke—tiye ayeza papelu chekemiqo lau likhi kumo, ikemu Abraham küpülü toi aküpülü aghí kemiqo lau ghí ke. Abraham ye ningu kümtsü papù ke.

¹⁷ Kughengu hitoi yèpüani: “I no O pesü shiye kutomo papù lakhi shitsü ke.” Alhou zülo Abraham ye ningu papù ke. Abraham no pülü chekeu Lhou ye kithimi aküxü tsü chekeu eno püzüu küha no akeqo lhophe chekeu Lhou ke.

¹⁸ Lajupu kühamitheve kelomu Abraham ye lajupu lono pülülu ke eno tighenguno pa vilo, “O nuli-kughuko no kutomo shi nani,” ipi pipüa keu toi shiye kutomo papù shilu ke.

¹⁹ Pa küpülü lo miqemileivemo no pa ye kuchou lo ye pa phimpi ye thive ke kumlho shiva kepi ithi ake—kughengu pa ye ampe 100 qhalo shive ke—eno titoi Sarah ghí kitemi shive no anuhami shive ke.

²⁰ Tishiaghi namu, Abraham ye pülükümla vechewo Alhou’w pikiqhi lau no iqeve keu shimo ke, ikemu pa küpülü shikumtoluve no ajekipi pesü Alhou tsüke,

²¹ eno Alhou ye pa no kiu piqhi keno tipau shikulupu küká ani kepi tsaqüi pükhübeluve.

²² Hi ghenguno Alhou no “Abraham ye amikuchomi kepi kihitsüe.”

²³ “Achipiu mikuchomi ipi pa kihitsüe” ipikeu tsa ye pa ghengu likhi no yèpüamoe,

²⁴ ikemu ningu ghenguno ghí ke. Tiye ningu khunoqo no ningu Mpeu Jisü akithí lono xüputhuve tsü keu Lhou shou pülübeni keno pa no ningu ghí achipiu mikuchomi kepi kihitsü nani.

²⁵ Pa ye ningu xinéqo ghenguno akithí lau ikhiphe pe tsüve ke eno ningu pelo achipikalu pe nikeu ghenguno xüputhuveke.